Предыдущая публикация
Тудым Пошкырт кундемыште веле огыл, Марий Элыштат сайын палат.
Караидель район Шопкер ялын эргыже - ынде ятыр ий Мишкан районысо историй да тӱвыра рӱдерыште тӱҥ специалист, «МуроЭм» ансамбльым чумырен да вуйлата. Ковай-влак шке вуйлатышыштым пеш пагалат да аклат, «Алексей Васильыч веле шокта». А ме тудым самодеятельный композитор да мурызо семын палена. Эше тудо ӱшанле эрге, сай пелаш да ача.
– Тыйым Алексей Васильевич манын нигузе ом керт, койышетлан Васли Ольош чотрак келша гай чучеш. Эрвелмарий-влак манмыла, пеш уҥган улат: марий семӱзгар-влакым ыштылат (шӱвырым, ковыжым, тӧтретпучым), авиамоделирований дене заниматлет, пу гыч тӱрлӧ ӱзгарым (шагатым монь) пӱчкын луктат, шкеак тракторым да тудлан ӱзгарым погкалет… Ыштен моштыдымо сомылетат уке ала мо? Кӧ деч чыла тидлан тунемынат?
– Чонышто мо уло, тудым кучен сеҥен от керт. Мом Юмо пуэн, тидын ден шогылтам: муремат изиш, шоктемат изиш, пу денат, кӱртньӧ денат шогылтам. Коклан кочкашат тамлын шолтем (пелашем туге манеш). Иктым посна ойырен ом керт. Пашаштат тугак шогылташ перна: сценарист, ведущий, дизайнер, художник, актер, режиссер, музыкант, ремонтник, мер пашаеҥ..
– Тый ешет дене шочмо ялыштет илет. Ават-ачат дене пырля улыда але шканет посна суртым ыштенат? Моло самырык-влак семын олашке илаш каяш шонымаш лийын огыл?
– Ачам-авамын кок икшыве веле: акам (шукертсек марлан каен, пошкудо Мишкан район Арзамат ялыште ешыж дене верланен. Олаште ятыр ий иленыт, кум икшывышт олаште шочын-кушкыныт гынат, пеш моторын марла ойласат) да мый. Ачам изием годым эре ойлен: ик эргым гына улат, ялыште илаш тÿҥалат, шоҥгемына гын – мемнам кö ончышаш?
Адакшым шочмо кундем деч сайже мо уло? Тыште коремат, курыкат, пакча шеҥгелат – тыйынак, чылажат чонлан лишыл. А олаште мо уло? Пошкудо денат ала ойласет, ала уке… Олаш илаш каяш нигунамат шонен омыл.1912-шо ийыште у пöртым ыштенна. Вара ÿдырым налынам. Ача-авам дене пырля ик суртышто илена.
– Пелашетланат ялыште келша?
– Келша. Ачам жапыштыже мыйым ял илышым йӧраташ туныктен гын, мый кызыт пелашемлан тидымак ойлем. Ялыште чыла шке да шканет ыштет. Да эн тÿҥжö – экологий, свежа юж, мотор пӱртӱс. Нелылыкше шуко конешне… но…илена ынде… Пелашем такшым – ялысе ÿдыр (Балтач район гыч), но олаште илаш тунем шуктен ыле. А мый ойлен-сымыстарен тудым мöҥгешла ялыш кондышым. Келшыш. Келшышна. Ме тудын дене коктын тыгай самырык еш шке ялыштына икте веле улына чай. Ялышке илаш толмыжлан тау. А молышт… Айда тек кайышт олаш, ипотекым пел ÿмыр тек тÿлат, Йÿдвел кундемыш тек пашаш коштышт.
Ирина Степанова-Ябердина.
Фото-влакым еш альбом гыч налме.
Умбакыже 28 июньышто лекше "Кугарня" газетыште лудса.
Следующая публикация
Комментарии 15