КУГАРНЯ газет

Шуко сорт виноградым ончен кушта 🍇 Российысе шокшо кундемлаште веле огыл, мемнан денат виноградым кушташ лиеш. Тидым Волжский район гыч Сергей Иванов пеҥгыдемден. Тудо ты сомылым 20 ий вораҥда. Кузе моштен, туге ончен Сергей Чодыраялыште (Помар ял шотан илемыш пура) шочын-кушкын, туштак икымше гана виноградым шынден ончен. – Латвич ияшем годым пазарыш паша дене миенам да виноград вондым ужалыше кочам ужынам. Туддеч вигак «Изабелла» (саскаже шемалге-канде) да «Маленгыр» (ужарге) сорт-влакым налынам. Тыгак коча кузе ончаш, шындаш да пӱчкедаш – каласкален, тетрадьышкат сӱретлен ончыктен. Но ойлаш – тиде икте, а шке ышташ моткоч неле улмаш. Сандене кузе моштенам, туге шынденам, онченам. Кум ий гыч «Изабелла» икымше лектыш дене куандарен, а «Маленгыр» – вич ий гыч, – ойла самырык еҥ. __________ 📰 Умбакыже Дарья Быкован статьяштыже лудаш темлена: https://кугарня24.рф/shuko-sort-vinogradym-onchen-kushta/

🎨Козьмодемьянск оласе пассажир-влак причаллан у тӱсым пуртымо. Тале сӱретче Илья Белов причалын пырдыжыштыже тӱрлӧ сӱретым келыштарен. Сӱретче пашаштыже ола дене кылдалтше событий-влакым ончыктен. Тидыже пассажир ден турист-шамычлан эшеат оҥайрак лийшаш.

Марий ӱдыр – тӱнямбал конкурсышто Красноярск олаште «Азия Сибирь-2024» XVIII Тӱнямбал талант да моторлык конкурсын финалже лийын. Тушко 18 ий жапыште икымше гана марий ӱдыр логалын. Ю.Аксюбина – Татарстан Республикысе марий-влакын национально-культурный автономийыштын самырык-влак тӱшкан ончылъеҥже да Татарстанысе калык-влакын молодёжный ассамблейыштын советшын еҥже. Юлия – пеш чолга да марий калыкшым йӧратыше ӱдыр. Тудо Морко район Шлань ялыште шочын-кушкын, ача-аваже кызыт Волжск олаште илат. Озаҥ оласе музык консерваторийым тунем пытарен. Всероссийский да Тӱнямбал конференцийлаште марий музыкальный культур нерген докладым лудеден. Ӱмаште Озаҥ олаште эртаралтше Российысе Специальный олимпиадыште волонтёр семын пашам ыштен. Юлия яра жапшымат пайдалын кучылтеш, бокс дене тренировкыш коштеш, кӱсле дене шокташ туныкта. Юлия дене кугешнена. Ончыкшымат тӱрлӧ кӱкшытан мероприятийлаште марий калыкшым чапландараш тӱҥалеш манын ӱшанена. «Азия Сибирь» тыглай конкурс гына огыл. Тушто участнице-влак шке калыкын тӱвыраж дене палдарат. Тений финалыш лекше 12 ӱдыр сӱан йӱла дене палымым ыштеныт, еш йӱла нерген видеороликым шкеак режиссироватленыт да шкеак тушто сниматлалтыныт, национальный вургем да кас тувыр дене дефилем ончыктеныт. Любовь Михайлова. Татарстан.

Кызыт модмо рольжо йӧршеш весе… Марий самырык театрыш спектакльым ончаш коштшо-влак шекланеныт, очыни, пытартыш кок ийыште Артём Куклинын сценыште модмыжо ок кой. Самырык пӧръеҥын илышыже 2022 ий сентябрьыште тӱрыснек вашталтын – тунам тудлан специальный военный операцийыш каяш повестке толын. Тиде жап марте моло еҥ семынак тыглай илышым иленам манын палемда Артём. Кажне кечын актёр театрыш репетицийыш коштын, спектакльлаште модын. Яра жапшым Светлана пелашыже да Ангелина ӱдыржӧ дене пырля эртарен. Ульяновскышто учебкыште кок арня лиймеке, салтак-влакым Херсон областьыш наҥгаеныт. Тидын нерген Артём тыгерак каласкалыш: – Тылеч вара – распределений, ик вер гыч весыш чӱчкыдын колтат ыле. Лӱдмаш тушко миен шумеке лектеш, кунам чыла шке шинча дене ужат, чонет дене шижат. Тӱҥалтыште корнышто шогымо: тыглай вер, тыглай илыш, манаш лиеш. Пел ий гыч «ончыкрак» колтышт. Туштыжо военный технике шукырак, куш от ончал, чыла вере военный-влак. лач тунам куш логалме нерген умылымаш толын. Пасуштат малаш, чодыраштат нӧрен да кылмен кияш логалын. А кызыт шуктышаш задачына эшеат неле манын кертам. Эн йӧсыжӧ – от пале, мо умбакыже лиеш, эрла тыйым мо вуча. Мом ыштышашетым шуктет, сайлан ӱшанет. Ешем деке йыҥгыртен кутыремат, кӧргыштем вий ешаралтмым шижам. Пырля служитлыше-шамыч коклаште Марий Эл гычат икмыняр еҥ уло. Чоным почын марла кутыраш эре куанле. Шукерте огыл Артём шочмо кундемышкыже толын каен. Кок ий наре жаплан тиде – нылымше отпускшо. – Специальный военный операцийыште улмемлан кок ий наре эртен. Тиде жапыште илыш умылымаш сайынак вашталтын. Мо тӱҥжӧ, а мом ӧрдыжкат шӱкалаш лиеш, палаш тунемынам. Южгунам тушто улмем годым шоналтеш: «Эх, кызыт сценыште модаш ыле! Мемнан театрын актёржо-шамыч иктаж олаш але ялыш гастроль дене каеныт докан». Вуйуш эре пашам ышта. Йоча кушкеш, тудын ончыкылыкшо нергенат тургыжланем, – ойла салтак.

🐿Эртыше каныш кечылаште Йошкар-Оласе рӱдӧ тӱвыра да каныме парк эше ныл урлан поянрак лийын. Кажне кечын ты вер гыч шуко еҥ эртен кая. Ынде ола уремыште урым чӱчкыдынракат вашлияш лияшн. Тыгак изи янлык-влаклан паркыште кок автокормушкым вераҥдыме. Кумылан еҥ-влак туддене пайдаланен, урым пукшен кертыт. 📸 П.Васильевын фотожо-влак.

🚘📝Таче журналистна-влак Параньга районысо «Победа» озанлыкыште улыт. Нуно тыште тыршыше-влакын сомылышт нерген умылкалат.