Гастрит годым 200 мл шокшо вӱдыш ик кугу совла изватышудо лышташым да тынарак пӱчмышудым (тысячелистник) пыштыман, ик шагат шинчыктыман. Ты лемым кочмо деч ончыч да вара ик гана гыч подылман.
Туберкулёз годым изватышудо лышташым тыгыдемдыман, сокшым пунчал налман. Ик стакан сокым пел стакан сакырложаш дене варыман. Тудым пычкемыш юалге верыште аралыман. Сокым ик кугу совла дене кечеш ныл-вич гана йӱман.
Придатке пуалме (воспалений) годым изватышудо лышташ ден умдылашудым (донник) икнаре гыч налын варыман. Ик кугу совла шудо вартышым ик стакан шокшо вӱдыш пыштыман, ик-кок минут шолтыман, ик шагат шинчыктыман да шӱрыман. Лемым кум-ныл совла дене кечеш вич гана йӱман. Тыге кок-кум арня ыштыман.
Рожа дене орланеда гын, свежа лышташым сусыр верыш опташ пайдале. Эше сайрак коштымо лышташым порошок марте тыгыдемдаш да эмганыше верыш шаваш. Тыгак лемым йӱман: ик стакан шокшо вӱдлан 10 г лышташым налман, йӱкшымешке шинчыктыман да ик изи совла дене кечеш кум-ныл гана кочмо деч ончыч йӱман.
Изватышудо лышташ сок иммунитетым пеҥгыдемдаш полша. Тудым ик-кок кугу совла дене кечеш ныл-куд гана 7-10 кече йӱман, июньышто сайрак.
Присоединяйтесь к ОК, чтобы подписаться на группу и комментировать публикации.
Нет комментариев