КУГАРНЯ газет

Слётчик-влакым Микрӓк кыдалаш школ порын вашлийын. Кечывал кочкышым авызлымеке, ÿдыр-рвезе-шамыч организатор, лужа-влак дене палыме лийыныт. Тыгак марий йылме, марий калыкын историйже, еш, социальный проектирований теме-влак дене шинчымашым налыныт. Яра минут лекмеке, марий мурым муралтат, кушталтат.

Марий самырык тукым слёт 💫 💥Таче Курыкмарий районышто Козьмодемьянск олаште верланыше Кава йымалысе этнографий тоштерыште XVI Марий самырык тукым слёт почылтын. Марий ӱдыр-рвезе-влакым вич кече жапыште Микрӓк селаште поян программе вуча. Самырык тукым мастер-классыште шуаралтын, марла куштен-мурен да палыме еҥ-влак дене мутланен. 📷📹Д.Быкова.

🌊 «МАРИЙ СПЛАВ» Тений самырык-влак икымше гана 5-6 июльышто Пошкырт кундемыште Ош Виче эҥер мучко пуш да катамаран дене воленыт. Ты сомылым Екатерина Шабдарова, Карина Шамиева да Екатерина Павлова тарватеныт. – Марий шӱлышан иктаж-могай мероприятийым ышташ шонымаш дене кок ий наре иленам. Карина йолташ ӱдырем шуко гана пуш дене эҥер мучко волен, тыге шкаланжат канышым эртараш да молым ушаш кумылаҥын. Тений телым коктынат ик шонымашыш шуынна: марий- влакым эҥер мучко волаш чумырена. Шошым программым лончылаш, калыклан увертараш тӱҥалынна. Карина Пошкырт вел Пӱрӧ олаште ила. Сандене тиде кундемым сайын пала да тыштак «Марий сплавым» эртараш темлен. Ош Виче эҥер шке вӱдшӧ, сылне пӱртӱсшӧ дене сымыстарен, сандене тудым ойырен налме, – палдара Е.Шабдарова. Чылаже 39 участник погынен. Нуно Марий Эл, Татарстан да Башкортостан гычлийыныт. Эн самырык еҥ – 13 ияш, эн кугу– 63. Южышт ешге толыныт. – Ме Бурзянский район Старосубхангулово села гыч ияш тӱҥалынна да Шульган-Таш пещер дене мучашленна. Икымше кечын 17 меҥгым ийын во ленна гын, кокымшо кечын – 22 меҥгым. Корно мучко ме марий мурым муренна, шуко мутланенна, – ойла Е.Шабдарова. «Марий сплавын» программыже оҥай да кумда лийын. Участник-влак Старосубхангулово селаште каныме базыште иленыт, нуным эрдене, кечывалым да кастене пукшеныт, тыгак мончаш пурен, имне дене коштын да пикш гыч лӱйкален кертыныт. Шульган-Таш пещерыште экскурсий дене лийыныт. Эҥер дене ийын волышо-шамыч палаткыште иленыт. – Каснам веселан да пайдалын эртараш манын, ме кок артистым: Алексей Рябинин ден Антон Измарьевым – ӱжынна. Нуно мыланна шӱвыр, тӱмыр, гармонь, умша гармонь, гитар да шиялтыш дене шоктеныт., - ойла Екатерина. "Марий сплав" нерген кумданрак Дарья Быкован статьяштыже 12 июльысо газетыште лудса. 📸Е.Шабдарован фотожо-влак.

ГРАНТЫМ КУЧЫКТЫМО👬 💯 Марий Элым Вуйлатыше Ю.Зайцев профессионал мастарлык шотышто Марий Эл Правительствын грантшым кучыктен. Тудым 43 сеҥышылан да 33 наставниклан пуымо. «Профессионалы» толкыным идалык ончыч ыштыме. Ты чемпионатым кызыт тӱрыснек эртарен кертме. Участник-влак шке мастарлыкыштым тӱрлӧ отрасльыште ончыктеныт. Чынжымак, тений 24 март гыч 19 апрель марте эртыше чемпионатыште 355 студент да 40 тунемше 54 компетенций дене мастарлыкым ончыктен. Пашаштым 408 эксперт аклен. Кызыт чемпионатын 233 призёржо ден сеҥышыже-влак Марий Элысе 84 предприятий ден организацийыштыже стажировкым эртат. 📷Д.Речкин/ Марий Элым Вуйлатышын пресс-службыжо.

✨🧨ТОКТАРСОЛАЛАН - 230 ий 🎉13 июльышто У Торъял район Токтарсола ял 230 ияш лӱмгечыжым пайремлен. Эн ончыч онаеҥ В.Г.Блинов Юмылан пелештен. Вара мутым организатор Е.В.Небогатиковлан пуымо. 🎇А вара ятыр саламлымаш йоҥген. "Эн сай сурт" конкурсышто кум сеҥышым палемдыме.13 шуко шочшан ешым, тений шочшан лийше-влакым, 18 юбилярым, кум сӱан юбилейым ыштыше-влакым саламлыме. Йоча-влак тӱрлӧ модыш дене модыныт. А кугыеҥ-влак марла куштеныт.

🎉🎉🎉САЛАМЛЕНА ЧАПЛӰМ дене! "Марий Эл Республикысе тӱвыран сулло пашаеҥже" чаплӱмым налмышт дене: - Мер-политик рӱдерын пашаеҥже, Марий юмыйӱла ушемын секретарьже Галина Ласточкинам, - Звениговысо кидмастар пӧртын пашаеҥже Ирина Чугуновам, - Национальный сымыктыш гимназийын преподавательже Лилия Семёновам.

Мончаште выньык дене кыралтат – таза лият 🧖‍♀🍃 Марий калык таза, ӱнаран лияш манын, мончаште выньык дене кыралтеш. Тидлан кӧра тӱрлӧ пушеҥгын укшыжым кеҥежым поген ямдыла, выньыкым пидеш. Лудшына-влак тидын шотышто мом ойлат? 💭 Лиана Семёнова, Марий Турек район: – Мончаш арнялан ик гана, шуматкечын, пурем. Изи годсек тыге тунемалтын. Но выньык дене кыралташ ок келше, молан манаш гын шокшым йӧсынрак чытем. А выньыкашым налаш йӧратем. Куэ выньыкым уло ешна дене ыштена. Утларакше рвезе куэ гыч укшым посадкыште секатор дене пӱчкедена. Вара, мӧҥгӧ конден, тудым выньыкыш пидына. Выньыкашым 7-21 июль коклаштеналаш тыршена: Йыван кече пайрем ден Юмынаван пайрем кечыла коклаште. Тыгак тылзымат ончена. Тошто тылзын погымо годым лышташ огеш його, маныт. Мончаште кыралташ ачана пеш йӧрата. Садлан шӱдӧ наре куэ выньыкым кажне ийын ямдылена.

Мончаште выньык дене кыралтат – таза лият 🧖‍♀🍃 💭 Валя Евсеева, Морко район: – Ешем дене мончаш пураш чот йӧратена. Тидлан кӧра кажне шуматкечым вучена. Ик монча кечат выньык деч посна огеш эрте. Выньыклан ладыра куэн укшыжым налына, лышташын нарынчалгаш тӱҥалмешкыже погена. Ялыште гын Йыван кече пайрем деч вара погаш шӱдат. Теле гочлан мыланна 23 мужыр сита.

Мончаште выньык дене кыралтат – таза лият🧖‍♀🍃 💭 Виктория Калугина, Параньга район: – Мончаш пураш пеш йӧратем. Кызыт вес кундемыште пашам ыштем, сандене монча мыланем огеш сите. Телым арнялан кок гана мончаш пурена гын, кеҥежым чӱчкыдынрак. Куэ выньыкым шке ыштен ямдылена. Укшым погаш лӱмын куэрыш коштына. Теле гочлан ситыже манын, 46 мужырым ыштена.

Мончаште выньык дене кыралтат – таза лият 🧖‍♀🍃 💭 Карина Бочарова, Кужэҥер район: – Мончаш пурымо годым могыр веле огыл кана, тыгак чонланат ласкан чучеш. Уда шонымаш, нелылык йомыт. Мончаш кажне арнян пурем. Выньыкым куэ укш гыч ыштена, тудын коклаш тумо да лӱмегож укшым ешарена. Выньыкым июль кыдалне ямдылаш тӱҥалына. Кок-кум кече ты сомыллан кая. Иктаж 50 мужырым ыштена.