Республикамыз аймағында ҳаўа температурасының кескин төменлеп кетиўи фонында бақланып атырған бүгингидей сынаўлы күнлерде халқымыз бир-бирине демеў болып, үлкен аўызбиршилик ҳәм адамгершиликтиң үлгисин көрсетпекте.
Метан заправкалардың жумысы ўақытша тоқтатылғанлығы себепли жүзеге келиўи мүмкин болған жәмийетлик транспорт машқаласы көплеген жақсы инсанлар, исбилерменлер, жәмийетлик шөлкемлер тәрепинен әмелге асырылып атырған басламалар нәтийжесинде унамлы шешимин таўып атыр.
Нөкис қаласындағы бир топар белсенди пуқаралар, Транспорт министрлигиниң жуўапкерлери өзлериниң жеке автомобильлеринде халқымыздың узағын жақын етиў мақметинде орайлық дийқан базары ҳәм "Корзинка" саўда орайының автомобильлер тоқтаў орнынан бийпул хызмет етиўди баслаған болса, "Әжинияз Қарақалпақ" дәриханасы тәрепинен 13-17-январь күнлери халыққа бийпул хызмет көрсететуғын 15 дана автобус жолға қойылды. Бундай ийгиликли басламалар Жаслар ислери агентлиги Қарақалпақстан Республикасы басқармасы ҳәм оның районлардағы бөлимлери жуўапкерлери тәрепинен де әмелге асырылып, "Саўаплы ис" акциясы шөлкемлестирилди. Онда пайтахтымызда 25 дана, қала ҳәм районларда улыўма 120 дана автомобильде халқымызға бийпул хызмет көрсетилди. Автомобильлер тоқтаў орынларына кирип-шығыў бийпул болды.
Сондай-ақ, булардан басқа да көплеген саўап иске бас болып, өзлериниң адамгершилиги, мийрим-шәпәәти менен халқымыздың алғысын алып атырған жерлеслеримиздиң ийгиликли ислери бүгингидей суўық күнлерде кеўиллерге жыллылық бағышламақта.
Усындай күнлерде аўызбиршилик пенен бир-бирине сүйеў болып, қолынан келгенше жәрдем берип атырған жақсы инсанлар ҳәмийше аман болсын!
Каналға ағза болыў 👉 @karinformuz
Присоединяйтесь к ОК, чтобы подписаться на группу и комментировать публикации.
Нет комментариев