Предыдущая публикация
#леснойдиалект Пуровский’ районхана нешаӈ ватам тохоԯампюта экспедиция мансԯа.
Москвахат мэна’’, НИУ «Высшая школа экономики» нимита университетхана мансдяӈ дет тохоԯкота’’ ӈашки’’ тоӈаш’’. Шича группатуӈ. Пытоӈ шичитуӈ тохоԯампюта’’ ԯуши’’ няӈ хомана ватамтуӈ чедимяна нешади’’ поӈкна дюничаԯяш’’. Пюԯ дян неԯьчеэй томатоӈ ниӈа, непоӈ ӈупчики туԯяш’’. Няръяна Нгэрм - старейшая газета Ямала
Четаӈ Таԯкахана мансԯамантуӈ камна Каԯпюԯкана канӈаш’’, ԯакхана ӈайта нешади’’ ӈисыӈ няна дятыԯяш’’. Ватам тохоԯампюма дёԯьше хома, таԯана шеԯ. Таԯям ӈука ненэй неша’’ лингвист’хана’’ мунуӈаш’’. Пуровский᾿ районхан а куптат диԯина пуша Октябрина Агичева маӈаш: «Мань тотахантоӈ дёԯьше майдямаш. Нянатуӈ мансԯаштума, нешаӈ ватам ԯусаӈ ватан каамԯампёшь. Каԯьна ватама дюԯпана’’ навынана ԯуши’’ понт дёхотаӈама’’, тахаԯандяна’’. Четаӈ маня’’ нешана вата, ӈыди ватаха’’ манэш, хомана тохоԯамы ниӈа».
Неныша таԯ ьша. Ненэй неша’’ шича ватантуӈ каԯа. Петаԯахана диԯина’’ неша’’ вататоӈ выӈкна диԯина’’ ӈинчеԯ’’ ватахат ӈинԯи. Таԯям куки’’ неша’’ ӈокна мунупатоӈ, нятуӈ вачи’’ ниш’тутуӈ камата’’. Ӈинчеԯ’’ ватама ӈайта неԯьчеэй патаԯ’’ 30-й похона’’ шеԯтаӈаш’’. Четаӈ пытоӈ куԯкаԯи’’ патԯотуӈ, каԯьтуӈ ватаманантуӈ патмы’’, тадя’’. Вачи’’ тохоԯампёшь мансԯанна’’ таӈок пу’’ дямпан ӈинчеԯ ватам хомана тохоԯаӈатуӈ.
Петаԯахана диԯина’’ неша’’ вататоӈ хомана тохоԯамы ниӈа. Таԯям шанԯи патаԯтуӈ. Нешаӈ ватамана патмы неԯьчеэй букварь 90-й похона’’ ӈычимяш. Чики патаԯ Инна Вэллан патмы, Санкт – Петербургхана им. А.И. Герцена нитаа университетхана мансдяӈ дет тохоԯкомахайта. Чикиӈ камна ненэй нешаӈ ватамана ӈуп словарь тадя, ӈупчики Инна Вэллан, шита тохоԯампюмы нямта Мария Бармич няш, шеԯтамы. Чикиӈ камна ненэй нешаӈ вата’’ Мария Приходько, Ольга Приходько шеԯтамы патаԯкана «Хомаку», «Хомани» тадя’’.
Тарко-Салехана ӈайта школа-интернатхана нешаӈ ватан ӈашки’’ тохоԯпёшь мансԯанна’’ ӈупчики патԯу патпёшь нятакошту’’. Пытоӈ петаԯахана диԯина’’ ненэй нешаӈ ватамана электронный’ патԯу’’ шеԯтаӈаш. Чикиманатуӈ четаӈ ӈашкайтоӈ тохоԯампёштутуӈ. Ӈыди патаԯ, ненэй нешаӈ ватамана пачута дику. Таԯям нешаӈ вата чам чедят хомана тохоԯамы ниӈа. Лингвист’ӈэ мэна кандидат филологических наук, доцент’ Алексей Козлов маньшту: «Нешаӈ вата тохоԯымпёшь дёԯьше вильӈа. Куки’’ ватахамитуӈ тохоԯанана ниӈа’’. Маньшмяна кунаӈу ханьшаняԯнимяав. Шичина нятапёта’’ няханана’’ вивина хомана хома».
Пуровский’ районхана нешаӈ ватам тохоԯампюта экспедиция ӈуп диԯихит ӈука дяԯяӈ мэӈа’’. Нешаӈ вачи чупей патмахататоӈ Москвахана тохоԯкота’’ ӈашкеэ аудиословарь, онлайн разговорник’ шеԯтаны’’. Пытоӈ маньшту, ӈамыԯи нешаӈ тэмс каԯьта ватамта ӈопкат нипта мэс, ватамананта патаԯта дякоп, меԯ ватамта дюԯнаӈата. Чуки ноптухуты таԯям нешади’’ ваче’’ ԯэтԯымпитуӈ. Ӈяхcдя навэт петаԯаӈ няна диԯина ненэй неша’’ патԯотуӈ ӈычимты’’.
Лариса Айваседо патмы
Следующая публикация
Нет комментариев