Предыдущая публикация
Тадри’ выӈгад ӈацекы школан’ ма’’ламба пя’’.
Хойхана вадёвы’’ ненэця’’ тикы ялэдо’ ёльце сававна тенейдо’. Ханяӈы’’ нюдя ӈэ’’мидо’ пон’ тензибтембидо’. Ӈоб’’ тарця иле’’мям’ Няръяна Нгэрм - старейшая газета Ямала 👍 Лидия Я
р ваде’’ӈадась. 👍
Мат’’ пони ӈэва’ мальӈгана ӈули’’ школан’ хэван’ хардавамзь. Ӈарка нини’’ таняд то’’махандо’ хуркари илека серо вадецеты’’. Сэвни нялорта, ӈоб’’ мунзипой’’ инзелесетыдм’. Ӈоб’’ сава яляхана Вэхэтя некахани мадм’:
💬 Пыдар ӈули’’ савовна толаӈго тевананю’’, мань ӈобтарем’ луца’ лаханако толабаван’ харвадм’.
Нями си’’ми намда. Тэри сюрбермани е’’эмня, букван’, паднабцян’, цифраха’’ тохоламбись. Ти’, тахав’ яда ха, неро’’ вэба’’ мантэяд’’, нумда хусувэй яля’ сарё. Ими етри’ ядэрӈа: «Школахана си’’ни то’’олха нини’’ поӈгана илеӈгудм’. Толаӈго, падна теневаӈгудм’. Школами ёльце’’мяхадани ӈарка ерваӈэ пяӈгув. Нини’’ ӈоб’’ нядабаӈгун».
Пихиня’ сарё. Ненэця’’ сюрберць пэяд’’. Ӈоб’’ няхани мадм’: «Ӈамгэ хадкэй’’?!» Тарць’’ ямбахана хибяхарт няни ни инзеле’’.
Нё’ пан’ тяха’ ӈэвами ӈадимдедм’. Абэй, нямборэй тайкуна ляртяне! Тихававахад иӈуцялмадм’, сейми тэри ледала. Небями си’’ми емб’’ӈа. Тиртя ӈанодо’ ӈамдавонда. Луци’’ не мят’ тю. Падрода нэкалӈа.
Си’’ми хонра:
‒ Нюмл ӈамгэ?
Мань нянда мадм’:
‒ Яр Лидия Павловна.
‒ Некоцёв, пыдар нюдян. Луца’ падаркана юӈгун! Тад ӈани похона сит хосая тосакэдм’!
Ӈани’ хонра:
‒ Ӈамгэ’ то’’олха ибцека’’ харвобтан?»
Сэв’’ хаял’’ помна нен’ мадм’:
‒ Хааамбеееткам’.
Пуна намда тикы не ‒ Варвара Енаковна ӈэвы🤗. Пыда яханана’’ хусувэй по’, сельбя’ няна ӈацекы школан’ ма’’ламбасеты. Ӈани яляхана нисяхаюни-небяхаюни ха’’морма’ мальӈгана хамбеткадми ӈэдаравысь. Тамальӈгы’’ ӈормы’’ ибцекыни тамна ибе’’ян.
Тад товы похона пилю’’ иры’ пудана яляхана тиртя ӈанохона си’’ми школан’ тохолкованзь ханаць. Мале серо теневанадарев’ тидпой’’ таӈга тиртя ӈанон’ ядадамзь.✅
📸 Марина Яр
Следующая публикация
Нет комментариев