Предыдущая публикация
Няхаԓ дяԓяӈ мянаԓяш”
Пуровский’ районхана ӈаԓтана ӈашки” дет тонԓюта фестиваль «Ягель» мэӈаш”. Поӈкнатуӈ мянаԓмантуӈ мэты шанат тэмс неша” Таԓкан ӈомаш”. Хампԓяӈк дюкат ва’та кашем’дю” команда”, мат’дюԓ” участник”. Ӈопшеԓ фестивальхана хыниԓмантуӈ мэт няхаԓ дёнаԓ” ӈок неша” тоӈаш”. Маня” Ямалхатна мэна” мянаԓчи” камна ӈыди каԓват няӈат томы” тадямэӈаш”. «Ягель» нешаӈ ватахана «Нята». Чики фестиваль Таԓкахана няхамты мэмаӈ шеԓтаматуӈ. Чуки похона тадёмшей ӈаԓма, Ямална тамна мэтаӈэ, окружнойӈэ кадя. Фестиваль наймянта мэт Ямална ӈаԓка веԓв тоӈаш. Ӈашкехена” мунуӈаш, ӈашки” дилтуӈ нямна конԓымпиш. Чуки похона «Ягель» дёԓьше вильӈаш. Няхаԓ дяԓяӈ дямпан пя” поӈкна мэӈатоньш. Неԓьчеэй дяԓяхантоӈ фестивалян томы команда” таԓьша конкурсхана «Визитная карточка», «Квартирник в лесу» мянаԓяш”. Мянаԓта” мятутуӈ меӈаш”, куԓкаԓи” ӈамаԓ” пиԓиӈаш”. Маня” неша нена” Каԓясамэхэт, Каԓпюԓкат, Таԓкахат мэна” ӈупчики фестивальхана куԓкаԓи” конкурсхана” мянаԓяш”. Ӈука мэмаӈ ӈайван каамдяташ”. Ӈашки’ неша” поӈкнатуӈ мянаԓмаӈ мэты” шанат конкурс”, площадки” шеԓтаӈаш”. Куԓкаԓи” тадяӈаш”. Няхаԓ дяԓяӈ дямпан мянаԓта” нэхэмтуӈ, нюӈк ӈаймямтуӈ конуԓпёш шанат конкурсхана мянаԓяш”. Чуки похона фестивалян томы” хомана ныптакомаӈ мэты куԓкаԓи” мероприятихина шеԓтаӈаш”. Шанат мастер-класс, тохоԓко мэта”, ӈашкиуди” шана’кош мэта площадка - куԓкаԓи вильта ӈамы” тадяӈаш. Фестиваль няӈ каймян ха’та автобусхана кяштуш, няхаԓ дяԓяӈ дямпан тальша кан’ дятыԓяш. Чуки похона фестивальхана «Таежный герой» шеԓтаӈаш”. Чикехена няхаԓдю” няхаԓ команда” мянаԓяш”. Матапётатуӈ ӈутоӈ 1, 5 километраӈ кун. Ӈопшеԓ няхаԓдяӈкня этап’ мянаԓьта” конуԓяш”. Маня неша нена” ӈупчики чикидю поӈкна хомана мянаԓяш”. Фестивальхана мэмы” маньшту”, чуки похона «Ягель» дёԓьше вильӈа. Мянаԓмы” ӈашки неша”, хыниԓмантуӈ мэт таньняӈ томы” – чупей хомана ныптаку”. Таԓьша мероприятии’ ӈаԓтана ӈашкехена, ӈаԓка нешаӈкна таԓа. Наӈича каԓтыхит томы” нетуӈ кошту”, шанат тэмс нешади” манэшту”, поӈкнатуӈ мянаԓьш шана’кошту”. Чуки похона «Росмолодёжь.Гранты» шеԓтамы конкурсхана мат’дю” ӈуп проект’ ӈычимчеӈаш”. Нэхэԓмы поӈкат шичатоӈ Таԓкахат мэнахаӈ ԓусахаӈ – Дарья Шостак, Сергей Михайловских. Няхаԓ дяԓяӈ мянаԓмы” поӈкна маня” неша нена” «Северяне» (2) нимимты местам’ канаӈа. Чики команда «Ямал -нюна дя!» нимита общественная организация шеԓтамы. Таӈок нешади” поӈкна мянаԓма неньшаԓ ниш’ӈа, чикехена ӈотнаӈ маня нена” дёԓьше хомана мянаԓяш”. Шаӈкмян ӈамыдётоӈ ӈуп вин камоԓьш шеԓташтутоньш, таԓям ӈуп нэхэм мэш фестивальхана нэхэԓя”. Фестиваль «Ягель» хитай. Шана’комы команда”, хомана мянаԓмы” тотуӈ мячисы” няамӈаш”.
Следующая публикация
Комментарии 1