Предыдущая публикация
💫Илебей ненэциена’’
👍Нерняри’ ӈада’’
газета "Няръяна Нгэрм" и "Мынико" ✍️
Нюртей по’ тохолкованзь хэва сяхаринда тоенарка. Едэйвана школам’ ёльцевэр хусувэй ӈамгэн’ пинанарха ӈэӈгу. Ӈарка хардан’ яланда тэвавахартада наӈэдя иле’’мя. Тарця илм’ манэ’’мэри’’ теда’ таӈга’’.Пэ’’ нямна мюсерта’’ ненэцие’’ мякана вадёвы Дмитрий Лаптандер тохолковамда та’ ёльцедась. Пыда тохолкоди’’ илам’ торомдавы ненэць’. Сямян ӈамгэхэд тенева, иланда сехэрым’ мале харта тасламбида. Ӈэрм яхад ӈэда ӈацекы ханзер’’ нядаби’’, хурка няд’’ми ня’’ма пир’’ӈа’’, мал’ ваде’’ядась:
- Мань Тобольск маркана самляӈг по «история»м’ тикахад «обществознание»м’ минренаӈэ тохолкудамзь. Тамна ӈани’ ӈопойми танясь, тикэхэвами хар’’н салдамбивась. Нямэхэна сидя дипломам’ ня’’мадамзь. Та’ мякани тэв’’махадани халям’ хадабади’’ заводхана, лагерьхана манзарасетыдм’, школам’ лэтамбадаӈэ тарадамзь, тарем’ есядами ма’’ласетыдм’. Тохолко’’ма хардами саць ӈарка ни ӈа’’, хусувэй тарана’’ хахая ӈа’’, лабкидо’ саць ни’’ мирес’’. Таня’ Саляӈгардахад Тюмень’ ӈэсонд’ хэсетыдм’. Пуна таняд Тобольскан’ хуркари’’ машинаха’’на тэва пирцетыв. Илесь ями ӈобтикы савась. Сидя ненэць’ ед’ таславэсь. Мюнянда сямян ӈамгэрида таняць, «квартира» то’’олхась. Тедахав’ студент’’ е’’эмня сюдбяко илесь мядм’ мимби’’. Ня’’марпада есями ӈани’ савась. Нюрте’’э’ тохолкулава’ яхадани ня’’марпидамзь, сяӈок ӈэвада ханзер’’ тохолковахадани пересь. Пуна хар’’н районхадани няд’’мам’ ӈэдарамбиць - тет ёнар’’ самляӈг юр’’ есясь. «Общежитие»‘ мирм’ ӈани’ салдамбасетыдо’. Сехэрэни мирм’ сидя ю’’ няхар’’ пони ӈэсонд’ салдамба пир’’ӈадонзь. Тикы’ хавна округна’’ ӈэвахана мэна ервхад минда няд’’мам’ ня’’марпидамзь, ирыхына ю’’ ёнар’’ ӈэсеты. Тарцям’ ня’’мава’ е’’эмня ӈобкарт’ «няхар’’» оценка яӈгобта серо’’ӈа. Тобольск’ то’’олха хардахана ӈацекы’’ таӈга тохолко пир’’ӈадо’.Дмитрий манзая’ няю’ тохолко пэванда’’, тандая’ ехэрана март’ тэвавы’’ няхата тарем’ табекурӈа:
«Тохолкуда’’! Тюку илаӈгана сямян ӈамгэ пирдалева’ пир’’, ӈопой вырэй ӈэсь, варем’ мэць тара. Ӈамгэхэв серта’’ таминда тид’’ нибта мий’’, пуня’ нёда’’ ӈа’’, ӈани’ яӈорэй’’ хор’’ӈара’’. Хуркари’’ яля’ ня’ ӈэда’’ серк’’ пыхыдада’’ тохоламбида’’. Сейда’’ нёя’’ пин’’. Сяхари’ тенера’’, илма’’ ӈопойри, ӈадьбята нерняри’ ӈада’’».
Анна Яптик’ падвы
Сидяӈг: Д. Лаптандер’ тавы
Следующая публикация
Нет комментариев