Усть-Орда тосхоной яларма, гоёор шэмэглэгдэhэн «Туяна» хүүгэдэй сэсэрлиг түрүүшын айлшадта үргэнѳѳр үүдэнүүдээ нээбэ.
Энэ hургуулиин урдахи болбосоролой эмхи зургаанай капитальна заhабарилгын hүүлдэ үни хүлеэгдэhэн нээлтэ июниин 3-да үнгэрѳѳ.
Һайндэртэ Эрхүү можын Хуули гаргалгын Суглаанай түрүүлэгшын орлогшо Кузьма Алдаров, УОБО-гой захиргаанай хүтэлбэрилэгшын орлогшо Андрей Дмитриев, аймагай мэр Геннадий Осодоев, аймагай Дүүмын түрүүлэгшэ Борис Мантагуев, аймагай болбосоролой Управлениин дарга Борис Шоронов, тосхоной хүүгэдэй сэсэрлигүүдэй эрхилэгшэд, хүмүүжүүлэгдэгшэдэй түрэлхид ерээ.
Һайн заншалаараа айлшадые хилээмэн-дабhаар, сагаан эдеэгээр ба амаршалгын буряад хатараар угтаа. Улаан лентэ хайшалалгын ёhолол үнгэрѳѳ.
Һайндэрэй баяр найр hургуулиин урдахи болбосоролой эмхи зургаанай хүгжэмэй зал соо үргэлжэлѳѳ, амаршалгануудые хүүгэдэй сэсэрлигэй эрхилэгшэ Светлана Ербаткова суг хүдэлдэг хүмүүжүүлэгшэдтэеэ сугтаа абаа.
Ямаршье ондоо hайндэртэ мэтэ, түрэhэн үдэртѳѳ, баяр найр үүдхэгшэд шагналнуудта, бэлэгүүдтэ, сэсэгүүдтэ ба олон һайн hайханай, жаргалай хүсэлнүүдтэ хүртѳѳ.
– Энэ жэлдэ Усть-Ордын Буряадай тойрогой газар дэбисхэртэ дүрбэн хүүгэдэй сэсэрлигүүд заhабарилагдана – Баяндайн аймагай Люры нютагта, Оhын аймагай Буряад-Енгүүдтэ, Нүхэдэй аймагай Новоленино нютагта, мүнѳѳ ехэ hайнаар «Туяна» хүүгэдэй сэсэрлиг заhабарилагдаба, – гэжэ аргагүй ехэ командна хүдэлмэриин түгэсхэлѳѳр Эрхүү можын Губернаторай орлогшын – округой захиргаанай хүтэлбэрилэгшэ А.А. Прокопьевой зүгhѳѳ Андрей Дмитриев амаршалба. – Энэ хүдэлмэри манай үхибүүдэй бага наhанhаа hургалгын, эдеэ хоолой, ажаhуулгын hайн оршом байдалда дадахыень шэглэл абанхай. Бидэ таанадаар омогорхонобди! Таанадта зохёон байгуулгын амжалтануудые, жаргалые хүсэнэбди!
Һайндэртэ ѳѳрынгѳѳ хубитые үхибүүдшье, тэдэнэй хүмүүжүүлэгшэдшье оруулаа, тэдэ айлшадта хэдэн гоё hайхан концертнэ номернуудые бэлэглэн харуулаа.
Хэмжээ ябуулга шэнэлэгдэhэн хүүгэдэй сэсэрлиг соогуур экскурси хэлгээр дүүрээ.
Үни болонгүй «Туяна» сэсэрлигтэ ерэхэ харгынууд асфальтаар хушагдаха. Энэнь аймагай захиргаанай үүсхэлэй проектые бэелүүлгын hайгаар бүтэхэ аргатай болоо. Энээнэй ёhоор Ленинэй гудамжын талаhаа хүүгэдэй сэсэрлиг руу ерэhэн гол харгы асфальтаар хушагдаха. Мүнѳѳ дээрээ бэлдэлгын хүдэлмэринүүд хэгдэнхэй, гарахаа байhан долоон хоногто тэгшэ, асфальтаар хушагдаhан харгы бии болохо.
Түрүүшынхиеэ хүүгэдэй сэсэрлиг үүдэнүүдээ 1987 оной ноябриин 27-до нээгээ. Мүнѳѳ сагта эндэ 43 хүдэлмэрилэгшэд ажаллана. Энэ эбтэй, нэгэдэн нягтаранги коллектив. Хүүгэдэй сэсэрлигтэ 127 хүмүүжүүлэгдэгшэд ябана.
Һургуулиин урдахи болбосоролой эмхи зургаанай капитальна заhабарилга «Болбосорол» гэhэн национальна проектоор үнгэргэгдѳѳ. Эрхүү можын барилгын Министерствын ба Эхирэд-Булагадай аймагай МО-гой захиргаанай хоорондо болбосоролой эмхи зургаануудай капитальна заhабарилгын хэмжээ ябуулгануудые бэелүүлхэ Хэлсээн № 05-59-72/23-59 2023 оной февралиин 7-до баталагдаhан байна. 2023 оной мартын 10-да нээмэл конкурсын дүнгүүдээр Ковалев А.Н. ИП-тэй муниципальна контракт баталагдаа. Контрактын дүн хамта 38 522 899,00 түхэриг болоо. Муниципальна контрактын хүдэлмэринүүдые түгэсхэхэ болзор – 2024 оной февралиин 28. Барилгын хиналтые ООО «Интегра» гүйсэдхѳѳ.
Баталагдаhан контрактын ёhоор, капитальна заhабарилгын түрүүшын жэл иимэ хүдэлмэринүүд бүтээгдэhэн байна: хушалтын, водостогой hэлгэлгэ, вентиляци эмхидхэлгэ, харгынуудые ба площадкануудые hайжаруулга, хаалтануудые, МАФуудые, бог шорой суглуулбариин газарые байгуулга, газаахи гэрэлтүүлгые тодхоолго, газаа талыень шэрдэлгэ. Хүүгэдэй сэсэрлигэй байшан соо ханануудайнь штукатурка, шпаклевко хэгдээ, полнуудынь хараарнь монтаж хэгдээ, полой хушалта плиткэ хэгдээ.
2024 ондо подрядна эмхи зургаан санфаянсын, уhа ябуулгын ба канализациин, орохо аргые шалгаха системын монтаж бүтээгээ, hүүдэрэй хушалтануудые холбоон байгуулаа, видеоадаглалгые тодхоогоо.
Татьяна Васильева
Авторай фото-зурагууд
Присоединяйтесь к ОК, чтобы подписаться на группу и комментировать публикации.
Нет комментариев