Ҳаётий ҳикоя.
90- йилларни бошида ,,Ўзбекистон овози” газетасида корректор бўлиб ишлаб юрган пайтларим эди. Иқтисодий қийинчиликлар бошланган,дўконларда пештахталар бўшлигидан сотувчилар лимонадларни қатор териб қўйишадиган,кўп озиқ-овқат махсулотлари талон орқали олинадиган,нарх-наволар кунига ошиб,маошлар арзимас бўлиб қолган даврлар эди.
Ойлигимиздан йўлкира ва тушликдан орттириб эгнимизга битта кўйлак ёки туфли олиш машаққатга айланган пайтлар келганди. Мен-ку бўйдоқ бир йигит эдим,рўзғорни ота-онам қилишар,гохо пулим қолмаса отамдан ,,қарз” хам олиб турардим.Лекин ишхонадаги оилали,бола-чақали, кап-катта инсонлар хам шу арзимас маошга қаноат қилишга мажбур эдилар.
Пулимизни тушликдан тежаш учун корректурадаги тўрт киши навбат билан тушликка уйдан овқат қилиб келишга келишгандик.
,,Мустақиллик майдони” бекатида метродан чиқиб редакция томон кетяпман-у бугун тушликка овқат олиб келиш навбатим эканлиги ёдимга тушди.
Вах,энди нима қиламан? Кечқурун онамга айтганимда хам эрталабга макарон жаркобми,картошка паловми пишириб берган бўлардилар. Энди нима қилдим?
Чўнтакларимни қарадим.Бир порция овқатга етар-етмас пул чиқди.
Демак кимдандир ойликкача қарз сўраб , вазиятдан чиқишим керак.Аммо қарзни кимдан сўрашни хам билмасдим.
Хаёл суриб ,,Зарафшон” ресторани ёнидан кетаётганимда зинага орқаси тақаб қўйилган багажи очиқ сариқ ,,Волга” таксига кўзим тушди. Хайдовчи ресторандан қўлида жуда катта торт кўтариб келаётган одамга қараб турарди.
Қоп-қора импортний кастюм-шим,ялтироқ туфли кийган,оппоқ кўйлаги ва ,,бордовий” галстугидан ,,бойвачча” эканлиги билиниб турган баланд бўйли,сочлари ,,итальянча” турмакдаги ўттиз ёшлардаги олифта зинадан туша бошлади.
Ўзиям бунақа катта тортни озмунча пулга буюртма қилмагандир! Узунлиги бир қулоч,баландлиги ярим қулоч чиқади-я,торт жониворни!Ё туғулган кун,ё қандайдир банкетга олиб кетяпти...
Бирдан ,,бойвачча “ зинадан тойиб кетди-ю,мувозанатни йўқотди. Ўзи йиқилмади-ю,лекин тахтача устидаги торт сиғалиб ерга қулади.Бурфф!
-Вохх!
-Эххх!
-Ваайй!
Таксичи,мен ва ,,бойвачча” деярли баровар хитоб чиқардик.
Уччаламиз ерда тоғдек бўлиб чилпарчин ётган ярим арава чиқадиган тортга ачиниш билан қараб турардик.
-Дабдала бўлди...Энди нима қиламан?-тилга кирди ,,бойвачча”.-Жуда нозик жойга оборишим керак эди?
-Хааа,яхши бўлмади-ачинди таксичи.
-Ачинманг,ака! Келган бало шунга урсин!-далда бердим -Пулингиз борми яна?
Ўзини йўқотиб қўйган ,,бойвачча” кастюми чўнтагидан бир даста пул чиқариб кўрсатди.
-Бор,мана.
-Сиз тезда ичкарига кириб вазиятни тушунтиринг. Цехда тайёр бисквитлари бўлади.Бир пасда крем билан безатиб,яна бундан зўрини тайёрлаб беришади.Пул бор-нима муаммо бор?
-Тўғри айтасиз! Вот идея!-жонланди ,,бойвачча”.-Лекин манави ,,куча” ни нима қиламиз?
-Э,брат,сиз бу ёғини ўйламанг! Биз ўзимиз хозир хаммасини тозалаб, ,,чики-чики” қилиб қўямиз! Сиз ичкарига югуринг,ишни битиринг!
-Рахмат сизга,дўстим! Сизлар шу ерни тозалаб туринглар,я побежал! Потом отблагадарю!
,,Бойвачча” ресторанга кириб кетгач,хайрон бўлиб турган таксичига буюрдим:
-Ока,сиз хув анави коммерческий дўкондан 3-4 та пакет олиб келинг! Қаранг,тортни тепаси топ-тоза!Уйга олиб кетамиз,болалар биз мазза қилишсин!
Таксичи мени дархол тушунди ва дўконга югуриб кетди.
Таксичи олиб келган чиройли пакетларга тортни сола бошладик.Тўртта пакет тўлди.
-Ярми сизга,ярми менга! Ерга ёпишиб ифлос бўлганларини эса мана бу газетага солинг!Ха,яшанг! Мошинада сув борми? Шундоқ қуйиб юборсак ер топ-тоза бўлади ака!
Таксичи иккаламиз бир пасда ерни ювиб тозалаб хам қўйдик. Шу пайт ,,бойвачча” хам мамнун қиёфада ресторандан чиқиб келди.
-Ў, молодцы! ,,Чёткий” қилиб қўйибсизлар! Рахмат,сизларга! Гаплашдим,ярим соатда бошқа торт қилиб берадиган бўлишди! Сизларни ,,отблагодарит” қилмасам бўлмайди!
,,Бойвачча” ,,йўқ’’ дейишимизга қарамай таксичи ва мени чўнтагимга чаққонлик билан пул солиб қўйди.
-Мени яхши ,,выручать’’ қилдинглар,рахмат сизларга! Пакетдаги тортларни нима қилмоқчисизлар?
-Ха,буними?-ўзимни йўқотмадим мен.-Хар холда нон,ейдиган нарса экан.Ахлатга ташлашга увол деб қўрқдик. Ўшанга пакетга солиб хув анави ошхонани помойкасига обориб бермоқчимиз.
-Да,да,тўғри,шунақа қилиш керак!-маъқуллади ,,бойвачча”.
-Мен уйдаги товуқларимга бераман-деди таксичи икки пакетни мошинасига жойларкан.
-Правильно,ака! Курицы тоже любят торт!
,,Бойвачча” яна қайтиб ресторанга кириб кетгач,таксичи билан хайрлашиб,икки пакет тортни кўтариб ишхонага йўл олдим.
Шу куни нонуштага хам,тушликка хам хамкасблар билан росса тортхўрлик қилдик! ,,Бойвачча” берган пулга буфетдан олиб чиқан ноним билан лимонад тушлигимизни зиёфатга айлантириб юборди!,,Торт қаердан келди?” деб сўраганларга ,,Онам пиширдилар” деб қўя қолдим.Гап-сўзни чувалаштиргим келмади,тўғриси.Мухими,хамма хурсанд,хаммани қорни тўйгани эди.
Шу вақтгача бу воқеани хеч кимга айтмагандим,торт ағанаган видеони кўриб,эсимга тушиб кетди ва сиз дўстларимга хикоя қилгим келди.
Ш. Қурбонов.
Присоединяйтесь к ОК, чтобы подписаться на группу и комментировать публикации.
Комментарии 2