Предыдущая публикация
ЗОДРӮЗИ УСТОД ҶӮРАБЕК МУРОДОВ МУБОРАК БОШАД!
❤️❤️❤️❤️
Ба устодони гиромиқадр Ҷӯрабек Муродов, Ҷӯра Юсуфӣ ва Тоҳирҷон Ҷӯраев
----------------
Ҷӯрабеку Ҷӯрабойу Ҷӯразод,
Тоҳиру Юсуфиву пури Мурод.
Авваливу дуюмӣ воломақом,
Сеюмиро ҳурматаш аз ҳад зиёд.
Ҳофизу устоди санъат аввалӣ,
Шоир асту дуюмӣ аҳли савод.
Сеюмиву чорумӣ шогирдашон,
Шеъри ин, оҳанги он бигрифта ёд.
Ҷӯрабекаш шодиҳо орад ба дил,
Ҷӯрабойро хомааш омад ба дод.
Ҷӯразода хонда ин, бишнида он,
Ҷӯразоди чорумин гардида шод.
Булбули боғу чаман, ар ҳофизаш,
Ранги килки шоираш, оби ҳаёт.
Тоири хушчаҳчаҳест, ин сеюмӣ,
Болад аз се он ки бар дурӣ фитод.
Ҷӯру бардам монда умре чорашон,
Ҷӯрагиҳошон ҳаме поянда бод.
Доимо дар зери ин чархи кабуд,
Бо дуо бошад ба се, ин Ҷӯразод.
ЭҲДО БА УСТОД ҶӮРАБЕК МУРОДОВ
Маро бишнидани ширинзабону меҳрубон, орзӯ,
Маро савту навои Борбади охирзамон, орзӯ.
Сазад, ки як даме дидори ӯ моро насиб бошад,
Ки гуфтори хуши ширинкаломи хушзабон, орзӯ.
Чу лаб бикшояду ҳарфе ба мо гӯяд, аҷаб бошад,
Саломамро ҷавобе з-он шакаролуд даҳон, орзӯ.
Садои форами мусиқиашро гашта пазмонам,
Чунони кабки кӯҳӣ хонишу табъи равон, орзӯ.
Ба савти ӯ калон гардидаам аз кӯдакӣ умре,
Маро з-ин рӯ садою хониши он хушбаён, орзӯ.
Ҳаме хӯ карда бо оинаи нилгун ситезам ман,
Ки чун ӯро набинмоӣ ба моён, чун ҳамон, орзӯ.
Баҳор омад аз ин рӯ боядам он андалебовоз,
Бари гулҳои тар он нуктасанҷу нуктадон, орзӯ.
Чаро Хизри накӯрафтор нагирад дасти мо боре,
Чу мо озурдаву болидасози рӯҳу ҷон, орзӯ.
Ҳамин Мақсудалиро сояи мурғи Ҳумо бояд,
Ки ӯро Ҷӯрабеки хушқади соҳибқирон, орзӯ.
⚘⚘⚘⚘⚘⚘
Ба зодрӯзи устод
Ҷӯрабек Муродов
************
Эй басо тору навои соз дорад, Ҷӯрабек,
Ҳамчу булбул шеваю овоз дорад, Ҷӯрабек.
Кабки кӯҳӣ ҳамнавоӣ мекунад гоҳо ба ӯ,
Чун уқобон то само парвоз дорад, Ҷӯрабек.
Бо суруди ӯ дили хурду калон рақсидааст,
Бо забони шаш мақоме роз дорад, Ҷӯрабек.
Савти Борбад мерасад аз дуриҳо бо савти ӯ,
Пардаҳои нав нави Шаҳноз дорад, Ҷӯрабек.
Чеҳраи бикшодаву фарҳанги воло бемисол,
Қомати болову дасти боз дорад, Ҷӯрабек.
Мактаби ӯро бубину ҷумла шогирдони ӯ,
Рӯдакиву Ҳофизи Шероз дорад, Ҷӯрабек.
Пар кушод овозаи овози дилангези ӯ,
Хониши бемисли бас мумтоз дорад, Ҷӯрабек.
Синаи Мақсудалӣ аз сози ӯ болад ҳаме,
Мухлисе аз деҳаи Понғоз дорад, Ҷӯрабек.
Следующая публикация
Нет комментариев