Бардык соттун өкүмүнө баш ийип, аргасыз тишин- тишине басып Сайкал жинденип Ашыраалы турган үйгө келди... Баалуу буюмдарын машинага жүктөп жатып, Төлөйкөндү ичинен каргап алды.
--- А кара ит десе! Жаткан экен го мында. Аяш эне, деп алып куу как баш, алдап жүргөн экен. Боорумду ачып, өз уулумдай көрүп, Ашыраалымды ээрчип келсе, эч нерсе аябай берээр элем. Чогуу окуп, чогуу чоңоюп, тузумду татып, ушул жерде эле ойноп жүрчү эле. Бүгүн менден жүзүн буруп каршы чыкты. Тузум урсун! Өлүгүңдү көрөйүн желмогуз! Тиги жүдөгөн Акмарал деген немеге жага бербей калбадыбы! Көздөрү күлмүңдөп, чырагына май тамды. Солдойгон акелери тимеле эч нерсе көрбөгөндөй мени жеп коё жаздады. Жезкемпир!-- деди мени! Бир дагы малды карматпайм. Ук токтусунда тойбогон, назары пас немелер! Ушул жерде тынч жашайм деп ойлоп жатат окшойт! Айыл элинен го эчаак түңүлгөм, ичи күйүп араң жүрүшкөн да булар, табылбай эле калбадыбы!
Сайкал жинденип өзүнчө сүйлөнүп, буюмдарды ташып жатты. Жакын турган коңшусу карап, башын чайкап таңыркап алды.
Мына ушинтип баягы ысык ордуңа бармай болдуң. Сага айтпадым беле, баары жакшы болот деп. Очогуңду кызартып, баягыдай жашай бересиң. Бирок тынчтык менен гана жашап, эми жашоонун даамын татасың. Балдарың чоңойсо, сени өздөрү эле багып алышат Марал.
Бол эми жыйнал, машинам менен үйүңө алып барып жайгаштырып коёюн.
Төлөйкөн Акмаралды үйүнө алып бармай болду. Акмаралдын апасы аябай кубанып турду. Неберелерин кучактап өөп; Мына чүрпөлөрүм, эми баары жакшы болот,- деп көзү жашылданды...
--- Мени ошол үйгө тынч коёт деп ойлойсузбу? Түпкүрүмдө сезип, атүгүл коркуп турам. Күндө келип жаңжал салып турбас бекен?
---- Эч качан Марал, бирөө дагы сага келип сүйлөй албайт экинчи. Соттун берген кагазын жоготпо. Сени коргоп турчу кагаз.
--- Мени коргой турган нерсе, ошол кагазбы? Акмарал биресе жылмайып, башын чайкады.
--- Кайын энем, ажал келсе коркпогон, ошол менин кагазымдан коркмок беле?
--- Ал кагаздан эмес, калган өмүрүнөн коркот, ишене бер.
Баягы көк тартып, жапырайган кепе тамдан көчүп бара жатканына балдары кошо кубанды. Акмаралдын көңүлү жайында эмес. Ал өмүр бою жамандыкты алдына ала сезип жашап келген. Азыр дагы көңүлү карышып, бутун араң сылтып, коркуп турса да аргасыз өз үйүнө көчүп келди...
Баягы көнүп калган кенен тамда ары- бери чуркашып, балдары кубанычта... Бирок үй анча эле аңгырап бош калган, буюмдардан эч нерсе калбаган. Апасы берген көк жабан турат, керек болсо айнекке илчү пардалар жок, баарын жыйып кеткен.
--- Кайгырба Акмарал, башың аман болсо баарын табасың,-- деди Төлөйкөн үйдүн ичин айландыра карап.
--- Кайгырганым жок, жөн гана таңыркап турам.
--- Сизге рахмат, абдан ыраазымын. Сиз болбосоңуз, агамдардын күчү жетмек эмес.
--- Мейли эч нерсе эмес. Могу балдарга убал болбосун дедим. Досум дагы балдарын, сени мага ишенип таштады. Арбагы тынч жатпас, силер кыйналып турсаңар.
-- Акмарал, кем- карчың болсо менден тартынбай сура, ар дайым кол сунам. Бирөө эле келип сенин тынчыңды алып көрсүн, өзүм сүйлөшөм. Болуптур, мен барайын. Сага телефон чалып турам.
Төлөйкөн Акмаралды үйүнө жайгаштырып жөнөп кетти.
Алыстан келген агалары, апасы баары тынчып жайына түшмөйүн, Акмаралдын үйүндө болууну чечишти.
Төлөйкөн Ашыраалы менен бирге өсүп, бирге окуду. Көксөгөн максатына тырышып өз күчү менен жетип, эмгекчил жакшы адам. Өтө боорукер, акылдуу киши. Мектепти аяктап, андан соң зоотехникумду бүтүрүп, кесиби менен эмгектенип келет. Дыйканчылыкты да абдан жакшы өздөштүрүп, ыгын таап, кыйла айыл элинин көзүнө урунган киши.
Окуу жайда жүргөндө Фарида аттуу өзбек улутундагы кызга жолугуп, аны менен мамилеси жакшырып калат. Фарида Төлөйкөндөн беш жашка кичүү. Атасы улуту өзбек, апасы кыргыз болгон.
Апасы кош бойлуу болуп, Фариданын атасын ээрчип Өзбекстанга барганда, ата- энеси уят көрүп кабыл алган эмес. Ошентип экөө үйлөнбөй, апасы Кыргызстанга кайтып келет. Жаш кыз намыстанып олтуруп, Фариданы төрөгөн соң ага ушундай ысым ыйгарып, Бишкектеги балдар үйүнүн бирине таштап кетет.
Төлөйкөн окууга барганда Фариданы көрөөр замат сулуулугуна арбалып, жана анын жетим экенин өз оозунан укканда абдан боору ооруп, кам көрүүнү ойлойт. Ошентип окууну бүтүрүп, Фариданы өзү менен кошо алып келип, ынтымакта бактылуу өмүр сүрүп келишет.
Фарида Төлөйкөнгө беш бала төрөп берди. Акыркы төрөтүндө жамбаш сөөгү чыгып кетип, калыбына жакшы келбей сылтып басып калган. Кургак учуктун жабык түрү менен үч жылдан бери ооруп, өтө арык жана алсыз боло баштады. Оорусу менен күрөшүп келген Фарида, азыр төшөктө жатып калган. Жумуш кылууга жарабайт. Таза абага сейилдеп бир аз басып келип, кайра жатууга туура келет. Төлөйкөндүн барбаган жери, ачпаган эшиги калган жок. Акыры күчтүү дарыларды көтөрө албай калган аялын көрүп, өз эркине койду.
Төлөйкөн машинада кетип бара жатып, Акмаралды аяп кетти. Эгер макул болсо, өмүр бою кам көрөт элем. Буга макул болбос. Абдан акылдуу келин, деп ойлонуп койду.
Фаридам, мына быйыл төрт жыл болот, төшөктө. Мурдагыдай жарашыктуу көйнөк кийип, жаркылдап алдымдан тосо албай калды. Алтыным, аябай аяп кетем. Сизге кам көрүп, кийимиңизди үтүктөп, мурдагыдай жумуш кыла албай калдым. Үйлөнүп алыңыз, каршы эмесмин,-- деп ыйлап алат. Бирок кантип башка аял алып, анын шагын сындырмакмын. Баарыбир кызганат алтыным. Көзүн жалдыратып ооруп жатса, мындай кылганым туура эмес....
31- бөлүмдүн аягы
уландысы бар.
Автор; Эльвира Мейманова
Присоединяйтесь к ОК, чтобы посмотреть больше фото, видео и найти новых друзей.
Комментарии 333
Убактым болуп турганда жарыялап коюуну туура көрдүм...