= 87 =
Шашке ченде Өктөм апа Канышай курбусунун үйүнө келди. Экөө көптөн бери көрүшө элек, келин болуп келгенден чогуу жүргөн курбулар сагынышып калыптыр. Божурашып сөздөрү бүтпөй койду. Качан гана дасторконго ысык тамак келгенде Өктөм апа эмнеге келгенин эстеди.
- Арууке бул жерде деп уктум эле, тамакка келбейби?
- Ооба, төрөп кыркын чыгарып ушул жерде эле. Таң атпай күйөөсү алып кетти бүгүн.
- Эмне төрөдү? Өзү эле төрөдүбү, же багып алдыбы?
- Ал эмне дегениң? Кудайым берип өзү эле балканактай уул төрөдү.
- Жакшы болгон тура. Мага капа болбо досум, тиги күйөөсүнүн айынан төрөбөй калды деп ыйлап жүрбөдүң беле? Ошого бала багып алдыбы деп ойлогом.
- Көрсө дарыгерлериң деле адашат тура. Оштон бир жакшы гинеколог дарылап, төрөп алды кызым бечара. Жаратканга жалбарып, түндү көз жаш менен өткөрүп, балалуу болсом деген ниети ишке ашып отурат. Эми мындан кийинки турмушу жакшы болсо экен.
- Эмнеге? Же дагы эле тиги күйөөсү кылыгын көрсөтүп жатабы?
- Жарылбаган жарадай болуп тымпыят. Ичинде эмне деген бороон менен алышып жүргөнүн өзүнөн башка жан билбейт. Байкуш эне ичинде жүргөн бугун көз жашын төгүп отуруп курбусуна айтып берди. Кызынын тагдыры ушуну менен эле түздөлүп, жакшы болуп кетээрине ишене албайт эле.
- Акмак турбайбы күйөө балаң. Эмнеге жөнөттүң анда? Тиленип тапкан уулуна назар салбайт дегени эмнеси? Сенин ордуңда болсом Арууке менен неберемдин колун карматпай кууп чыкмакмын үйдөн. Ал унчукпай жүрүп бир күн жарылат. Ошондо чыгат ички сыры. Кантсе да Арууке байкушка залакасы тийбесе экен эми.
- Менин деле оюм ошондой болчу. Кызым менен неберемди кетирбейм деп жүргөм. Эрте менен биз ордубуздан тура электе келип Аруукенин үстүнө кирип кеткен. Аларды көндүрүп даярданып алышыптыр. Сөз көбөйүп кетпесин дегендей кылып нан ооз тийип эле жөнөп кетишти. Оозубузду ачып эле калып калдык.
- Кандай болсо да кызың бактылуу болсун. Ии баса, небереңдин атын ким деп койдуңар?
- Марлен. Арууке өзү койду.
- Өмүрлүү болсун. Ата-энесинин ортосундагы шам чырак болуп, үй-бүлөнү жылуулукка бөлөп, ынтымакка чакырган бала болсун.
- Айтканың келсин. Балдарың турмуштан өз ордун тапканда гана биз бактылуу болот экенбиз, болбосо алардын азабы тынч уйку бербейт тура?
- Ооба, биз да Эркинди ойлоп жүрүп түн уйкубуздан кечтик. Жаратканга жалынып боздоп чыккан түндөрүм болду, ишенесиңби? Мен канчалык ыйлап, Кудайдан суранган сайын уулума жаңы азап тартууланат. Эмне күнөөбүз үчүн, билбедик?
- Капа болбо, Эркинге да бирөө маңдайынан сылап кызын багып жаткандыр. Эки курбу көпкө сырдашты. Күүгүм түшүп калганда гана Өктөм апа дасторконго бата кылып үйүнө кетти.
Аруукени жатаканага алып келип коюп Мурат жумушка кетип калды. Бөлмөсүндө алар жегидей тамак-аш барбы? Ал жөнүндө ойлоп да койгон жок. Арууке уулун керебетке жаткырып коюп бөлмөнү жыйнаштырып, чай ичүүгө отурду. Үстөлдүн үстүнөн эки кесим кара нандан башка жегенге ылайык эч нерсе таппады. Айла канча, бир кесим нан менен чай ичип алууга туура келди. Ошол боюнча эч нерсе ичпей Мураттын жумуштан келүүсүн күтүп отурат. Караңгы кире баштаганда тамак жасайын деп караса үч-төрт даана картошка, 2 даана пияз бар экен. Күрүч жок, азыраак макарон турат. Эмне кылаарын билбей отуруп, акыры болгонун бышырып койууну туура көрдү. Бирок ошол продуктадан кандай тамак болмок эле?
Мурат жумуштан келип үн-сөзү жок отурат. Арууке бир кесим нан менен бышырган тамагын алдына койду. Үңүрөйүп отуруп тамагын ичти да керебетке жатып алды. Ал жерде жаткан уулуна назар салып да койбоду. Арууке тамактанып болгон соң идиш-аягын жыйнап, жерге уулу экөөнө төшөк салды. Бул убакта Мурат уктап калган эле. Уулун кучактап жатып түбү терең ой чуңкуруна чумуп кетти Арууке. " Мурат эмнеге минтип жатат? Дагы эмнеден жаңылдым, эмнеден жаздым? Уулумду колуна алып карап да койбоду ээ? Балалуу болсок экен деп жалынып айткан сөздөрү жалган беле?" Канчалык ойлонсо да Мураттын кылыгына түшүнбөдү. Акыры бир күн жарылаар, ага чейин өз эркине коюп, унчукпоону туура көрдү да уйкуга кетти.
Аруукенин уулу, Марлен аябай жоош. Курсагы ачканда эле кичине ыйлабаса, жата берет. Кечиндечи? Эмизип жаткырып койсо ошол боюнча таңга маал ойгонот. Кургактап, курсагы тойсо шашкеге чейин уктап жата берет. Ойгонсо өз алдынча үн чыгарып, күлүп, кылыктары чыгып, күндөн-күнгө көзгө көрүнүп баратат. Арууке бир бөлмөдө уулу экөө. Сүйлөшүүгө эч ким жок. Биринчи кабатка түшүп, комендант аял менен сүйлөшүп отурайын дейт, бирок ал жерге кирип-чыккан эркек көп. Мурат көрүп, дагы бир балээни баштап жүрбөсүн деп айбыгат.
Аруукенин келгенине он күндөн ашты. Бирок ошончо күн өтсө да Мурат бир ооз сөз сүйлөй элек. Сүйлөбөсө да тамак-ашка жетээрлик продукта алып келип койсо болмок. Үч күн нан, карандай чай менен отуруп калды. Күндөн-күнгө сүтү да азайып бараткандай. Дагы жакшы уулу жоош. Ыйлаак болсо курсагы тойбой ызы-чуу салаары шексиз. Муратчы? Өзүнүн курсагын ашканадан тойгозуп келип жатып алат. Келинчегим эмне жейт, баламдын курсагы эмне болот? Ойлоп да койбоду. Ошондой күндөрү комендант аял кирип калды бөлмөгө. Бир топко сүйлөшүп отуруп кетүүгө камынды. Кыраакы аял Аруукенин продуктасы жок экенин айттырбай түшүндү. Кечинде өзүнө жасаган тамактан куюп Аруукеге берди. Көзү жашылданып турган келинди аяп, Мурат жумуштан келсе сүйлөшүп көрүүнү эп көрүп чыкты бөлмөдөн.
Мурат экинчи сменден чыгып келип бөлмөсүнө баратканда коммендант аял токтотту. Экөө көпкө сүйлөштү. Мурат эч нерсе билбегендей күлүп-жайнап отурат.
- Мурат үйүңдө продукта жок, келинчегиңдин колунда жаш баласы болсо. Жакшы эле иштеп жатасың? Тамак-ашыңды белендеп туруп алып келбейт белең аларды? Алып келгенден кийин деле оокат-ашына карап койсоң болот да? Сени түшүнүктүү деп, күнөөнү Аруукеден издечүмүн. Көрсө сенде турбайбы кылыктын баары? Унчукпай жүрүп алып. Уят, эл укса эмне дейт? Мурат катын-баласын ачка коюптур деп? Эртеңден калбай продукта алып кел, убактың жок болсо акчаңды берсең мен алып келип берем?
- Арууке арыздандыбы? Мен билген эмесмин үйдө эч нерсе жок экенин. Мага айтып койсо болмок да, туурабы?
- Арууке эстүү жубай. Ал үйүндөгүнү сыртка эч убакта чыгарбайт. Бүгүн уулуңду көргөнү кирдим бөлмөңө. Баарын өз көзүм менен көрүп чыкпадымбы. Келинчегиңдин колунда баласы болсо, ойлонбойсуңбу? Уулуң ачка калып жатпайбы?
- Уулумду Арууке эмизип жатат го?
- Арууке тамак жеп, курсагы ток болсо сүт болобу?
- Эмне тамак жебесе сүтү жок калабы?
- Билбеген адам сени өтө акылдуу, билерман деп айтаары шексиз. Мен да ошентип ойлоп жүрчүмүн. Азыр мен сени тааныбай турам. Сен айылда эле чоңойгон баласың го? Анан сүт кайдан, кантип пайда болоорун билбейсиңби?
- Билсем сурамак эмесмин. Мурат уялгансып жер тиктеди.
- Саан уйду кечке ачка коюп сааганда канча сүт берет?
- Аз эле го. Чөп жебесе кайдагы сүт болмок эле?
- А баракелде, билет экенсиң го? Аял да ошондой. Тамак жебесе кайдагы сүт болмок эле?
Мурат эртеси эле дүкөндөн продукта алып келип үстөлдүн үстүнө тарс эттирип койду да эшикке чыгып кетти. Арууке ордунан туруп баштыкты ачып жайгаштыра баштады. Баштыктын ичинде бир килограмм пияз, эки килдей картөшкө, макарон, чай, туз, бир литр май бар эле болгону. Аны да жөн алып келбей милдет кылып таштады.
Уландысы бар.
Присоединяйтесь к ОК, чтобы посмотреть больше фото, видео и найти новых друзей.
Комментарии 185