= 90 =
Күн өткөн сайын Мурат менен Аруукенин үнсүз тиреши күч алып, экөөнүн ортосундагы жарака чоңоюп барат. Арууке үчүн эми баары бир эле. Ал бул жашоодо Мурат үчүн эмес уулу үчүн жашоону максат кылган. Мурат канчалык кордоп, басынтпасын, уулунун чукуранып уйкудан ойгонгону, балдырап үн салганы, апасын карап бир жылмайганы бардык азап, кайгылырын жууп кетет. Бирок кантсе да жаш эмеспи, кээде Муратты эңсеп, ага эркелеп, жылуу сөзүнө муктаж болуп турганын сезет. Андай учурда жүрөгү бир аз жумшай түшкөнү менен аялдык намысы биринчи болуп Муратка жакындоого жол бербейт. Экөөнүн тиреши дагы канчага уланат болду экен ... ? Ошондой күндөрдүн биринде Мурат түнү менен ооруп чыкты. Дене табы көтөрүлүп жумушка да чыкпады. Арууке канчалык таарынып, ага ачууланып турса да жардам бербей коё албады. Дене табын түшүрүүчү дары ичирип, денесине арактан сүртүп түнү менен убара болуп чыкты. Дене табы бир аз төмөндөгөн Мурат таңга маал гана уктап кетти. Арууке бир аз уктап алайын деп башын жаздыкка жаңы эле койгон кезде уулу ойгонду. Ошентип жаңы күндүн түйшүгү башталып, Арууке түнү менен ичип чыккан адамдай болуп тирикчилигин улантып кетти.
Чилденин суугу сөөктөн өтүп, жол үстү көк жылгаяк. Оорукандан уулуна бөлүнгөн сүттү алып аярлап басып келаткан Аруукени артынан кыйкырган эркектин үнү токтотту.
- Аяш кандайсың? Мурат кандай, уулуңар чоңоюп жатабы?
- Жакшы баары. Мурат ооруп калыптыр. Түнү менен дене табы көтөрүлүп кыйналып чыкты.
- Аа, түшүнүктүү. Аяш Муратка беш күн укол салдырыш керек. Дарыканадан " бициллин " алып барып салдырып койсоң эле жакшы болуп кетет, түшүндүңбү? " Пенициллин" эмес " бициллин". Беш эле даана алсаң жетет. Аяшынын калган сөздөрү кулагына кирбеди Аруукенин. Кулагы чуулдап, көзү караңгылаган келин кулап кетпейин деп араң басып жолун улады. Бирок, канчалык күчтүү болбосун, аяшынын сөздөрү аны көтөрүп чапты. Көзү караңгылап эч нерсени көрбөй теңселип ордунан жыла албай турган Аруукени Рахат көрүп, чуркап келип колдон алды. Рахат Мураттын Турсунбай деген досунун келинчеги эле. Алар ошол тегеректе батирде турушчу. Аруукенин колунан баштыгын алып, өзүн үйүнө жетелеп кирди Рахат. Турсунбай да үйдө экен. Аяшынын бозоргон жүзүн көрүп чоочуп кетти.
- Тынччылыкпы аяш, эмне болду?
- Билбейм өзүм да. Жакшы эле келе жаткам, көзүм караңгылашып кетти го.
- Үйдөн ачка чыктыңыз беле? Рахат сөзгө аралашты.
- Тамактанып эле чыккам. Түшүнбөй калдым.
- Балким дагы боюңузда бар чыгаар?
- Жок ай, кайдан? Уулум эми 3 айдан өтүп баратпайбы? Рахат бар тапканын дасторконго коюп Аруукеге чай сунду. Бир аз жылынган соң үйүнө жөнөдү Арууке. Аны жолдо дагы көзү караңгылап жыгылып калбасын деген аяшы сүтүн көтөрүп жанында баратат.
Турсунбай досу менен ээрчишип кирип келген Аруукени чекчейе караган Мурат ооз учунан досу менен учурашты. Туталанып, ичинен жалынсыз отто күйүп, куйкаланып, бирок анысын билдирбеске тырышып калп күлүп отурат. Мураттын ою боюнча Турсунбай менен Арууке тымызын жолугуп, ооруп жатат дегенди угуп уялбай мени сураганы келиптир деп куйкасы курушуп жатат. Экөөнүн бир төшөктө жатканын элестеткенде чок баскандай ордунан ыргып туруп, тамекисин шылтоолоп сыртка чыгып кетти Мурат. Өзүн канчалык кармайын десе да болбой "кызганыч" - деген оору жүгөндөп алды. Кудай эле сактаса экен эми тиги күнөөсүз күнөөлүүлөрдү. Мурат сырттан келгенде Турсунбай кетүүгө камынып калган.
- Эмне келип келбей жатып эле кетүүгө камынып? Же ... ?-деп барып сөзүнүн аягына чыкпады.
- Эмне " же " ? Айта бер досум?
- Шашылыш ишиң бар беле?
- Жумушум деле жок. Сен жактырбагандай болуп кабагың ачылбай жатпайбы. Аяш жолдо көзү караңгылап жыгылып калайын дептир. Рахат көрүп үйгө жетелеп кирип, өзүнө келген соң мен узатып келдим. Жолдо дагы жыгылып калбасын деп. Болгону ошол. Сен башкача ойлоп жатат окшойсуң, ички сырыңды канчалык билдирбейин дегениң менен жүзүңдөн байкап калдым. Анчалык акмак эмесмин досум. Андайга аяш да жол бербейт. Аяшымдын кадырын билбейт экенсиң.
- Жок досум, жаман оюм жок. Ооруп жаттым эле, ошого сага ошондой сезилип жатса керек. Баары жакшы.
- Ай ким билет? Ооруганыңдын себебин да уктум. Баарын билем. Арууке чай сунуп катарлаш отурган үчүн Турсунбай сөзүнүн аягына чыкпады.
- Кимден, эмне деп укканыңды билбедим. Эки күн башта шахтада уктап калыпмын. Ойгонсом аябай үшүп калган экенмин. Суук өтүп калган окшойт. Бир аз жумшай түшкөн Мурат досун сырдуу карады. Арууке болсо баарын билип, түшүнүп болду. Турсунбайдын жанында Мураттын шагын сындырбайын деп сөзгө аралашпай отурат. Арууке унчукпаган сайын Мурат өзүнүн жарды дүйнөсүндө аны басынтып, ар бир сөзү менен тебелеп жатты. Өзүн араң кармаган Арууке уулун көтөрүп сыртка чыгып кетти.
- Досум, өзүңдү бир карачы? Азыр кандай абалың? Өзүңдү билбей эле аяшка асыла бересиңби?
- Ээ досум, аяшың эч нерсе билбейт. Андан ушул жол менен өч алып, ушул жол менен кордогум келди. Бул ага көрсөткөн кордуктун бир үзүмү эле. Көргөндөн көрө элеги көп анын.
- Мурат сен ушундай адам белең? Сенден мындай мыкаачылыкты күтпөгөм чынында.
- Эмне, аяшыңдын даамын татып калган окшойсуң ээ? Анын сөзүн сүйлөп, жагынайын дегениңби? Же менден ажыратып " токол" кылып алайын деген оюң барбы? Мурат ачуусуна чыдабай Турсунбайды жакадан алды.
- Мен сени жакшы адам деп жүрсөм, сен жеткен шүмшүк турбайсыңбы, акмак!? Мураттын колун катуу силкип жакасынан бошоткон Турсунбай коштошпой чыгып кетти.
Уулун бооруна кысып көчөгө чыгып бара жаткан Аруукени көргөн вахтадагы аял дагы бир нерсе болгон го деп ойлоп койду. Кыраакы аял жаш келиндин көзүнөн баарын билип турат. Анын Муратка кор болгонун көрүп өз кызындай ичи ачышат. Кээде Мурат менен ажырашып эле кетсе экен деп тилек кылып алып, ал оюнан өзү коркуп кетет кээде. Айтоор байкуш келин кор болду-деп ичи эзилип жүрөт. Арууке көпкө келбегенинен артынан чыгып карап келейин деп сыртка чыкты эже. Ары жактан жатакананы көздөй келе жаткан Аруукени көрүп туруп калды. Кыштын ызгаары бир топ эле го? Көк муштум болуп үшүгөн Арууке уулун кучактап унчукпай бөлмөсүнө кирип кетти. Анын абалын көрүп канчалык жүрөгү оорубасын, артынан барууга даабады. Үй-бүлөөнүн чатагына аралашып акылсыз болбоюн деп ойлоду.
Уулун көтөрүп кирип келген Аруукени чакчая тиктеген Мурат,
- Ии, жаңы көңүлдөшүңдү үйүнө чейин узатып келдиңби?-деп жийиркеничтүү тиктеди.
-Элдин баары, анын ичинде мен, Турсунбай, сен ойлогон, сага окшогон жан дүйнөсү жарды адамдар эмеспиз. Сен өзүң бузукулук кылып, көрүнгөн бузулган аялдарга барып, тигинтип жаман оору жугузуп келгениңди эч ким билбейт деп ойлойсуңбу? Сен ойлогондой мен келесоо эмесмин.
- Тиги шүмшүк баарын жеткирген экен да ээ сага? Бирок Аруукеден мындай чечкиндүү жооп күтпөгөн Мурат тайсалдай түшүп, көзүн ала качты.
- Мен баарын билем, уктум. Бирок сен ойлогондой Турсунбайдан эмес, Сайпидин досуңдан. Менин ичим күйгөн жок. Сен ушундай жашоону тандаптырсың, мен макулмун. Уктап кеткен уулун төшөгүнө жаткырган Арууке дасторконун жыйнаганга киришти. Мурат жалтаңдап Аруукеге сөз айта албай астыртан тиктеп коюп отура берди. Дубалда илинип турган саатты бир тиктеп алып Арууке уулунун жанына жата кетти. Ошондо гана Мураттын көңүлү жайланып, өзүнүн ар дайымкы ордуна, керебетке жата кетти. Кызык. Мурат эмнеден коркту экен ээ?
Уландысы бар.
Присоединяйтесь к ОК, чтобы посмотреть больше фото, видео и найти новых друзей.
Комментарии 252