= 86 =
Эркин маанайы жок үйүнө келди. Эшиктен кирип келген уулун көргөн эне дагы бир нерсе болгонун сезди. Баарын сезсе да сурай албады. Эркин болсо өз бөлмөсүнө кирип кетип чыкпады. Качан гана кечки тамак даяр болгондо келип катарга кошулду.
- Апа Арууке уулдуу болуптур. Оор үшкүрдү Эркин.
- Койчу? Аны жанагы зөөкүр күйөөсүнүн айынан төрөбөй калыптыр деп жүрүшпөдү беле? Балким багып алгандыр?
- Жок апа, өзү эле төрөптүр. Бирок кеп башкада. Арууке күйөөсү менен ажырашып кеткен окшойт. Бүгүн айылдык поликлиникага баласын каттатып жүрүптүр.
- Мунун баарын кайдан угуп жүрөсүң?
- Аруукенин иниси айтты. Бүгүн поликлиникага бараарын угуп артынан барып баарын өз көзүм менен көрүп келдим.
- Балким убактынча эле болуп жүрбөсүн? Айланайын балам, өзүңдү дагы азаптабачы?
- Жок апа, Аруукенин күйөөсү келбей коюптур. Ошто төрөгөн экен. Төрөт үйүнөн чыгарган боюнча барбаптыр. Акырында Канышай аяш эне бул жакка алып келүүгө мажбур болуптур. Бул жакка келгенине эки ай болсо, ошол аралыкта бир жолу келип кетиптир го? Эгер турмушу жакшы болсо ушул убакка чейин алып кетмек да уулу менен келинчегин, туурабы?
- Билбейм балам. Эмне дээримди да билбей калдым.
- Эми сизден бир өтүнүчүм бар апа, жок дебеңизчи?
- Колумдан келээр иш болсо, сен үчүн жанымды да берүүгө даярмын го уулум!
- Эртеге Канышай апанын үйүнө барып, окуянын чоо-жайын иликтеп келиңизчи?
- Макул, бар десең барайын. Бирок көп нерседен үмүт кылба?
Эркиндин жашоосунда эң узун түн бүгүн болду окшойт. Таң атпай койду. Күздүн узун түнүн кирпик какпай, Жаратканга жалынып өткөрдү. Эмнеге Жаратканга жалынат? Кудайым да мага боору ооруп жатат окшойт ээ?-деп өзүнө суроо берип койот. Жылдыздын да жүрөгү бир нерсени сезди бекен? Аялдар сезгич келет эмеспи? Жылдыз кетип карайлап турган кезимде Жаратканым, " Болду Эркин, ушунча азап тартканың жетишет. Аруукеңди ал да жашооңду жолго сал!"-деп жатабы? Балким ошондой. Эгер Арууке чын эле ажырашып келген болсо үйлөнөм. Уулу менен чогуу алып келем. Өз уулумдай кабыл алып, тарбия берем. Ата-энем, үйдөгүлөр мени колдойт деп ишенем.
Аруукенин артынан акмалап, аны үйүнө чейин узатып келген Мурат жолукпай артка кайтты. " Кызганыч "-деген оорусу алкымдан бууп, өзүн тоого урууга да даяр эле. Ушул абалда Аруукеге жолукса аны да капа кылып, жүрөгүн дагы да муздатып салмак. Ошондуктан кетип калганы да жакшы болду. Шахтанын жатаканасына келип эле керебетке сулады. Бирок кайдагы уйку. Бөлмөдө ары-бери басып, күчүн тамекиден чыгарып жатат. " Шуркуя, Ошто жалгыз калып Кубаныч менен жыргап жүргөн экен. Эми менин жоктугуман пайдаланып Эркин менен эзилишип жүргөнүн карасаң?". Оюна эмнелер гана келбеди дейсиң? Эки сааттын ичинде бир куту тамекини түгөтүп салды. Бирок дагы эле ачуусу тарабай жатпайбы? Ордунан туруп сыртка жөнөдү. Биринчи кабатка түшүп телевизор көрөйүн деген, көзүнө эч нерсе көрүнбөдү. Кайра бөлмөсүнө барып душка түшүүгө даярдана баштады. Бул да болсо өзүн алаксытууга кылган аракети эле. Душту агызып, суунун алдында туруп жаш баладай өпкөсүнө батпай ыйлады. Ичиндеги бар бугун чыгаргысы келди окшойт. Баарын сууга агызып жууп салгысы келди. Көпкө турган Муратты коммендант аялдын үнү эсине келтирди. Мураттын душка кирип кеткенин көргөн аял андан кабатыр болуп, эшигин такылдаткан эле. Өзүнө келе түшкөн Мурат кийинип чыгып бөлмөсүнө кетти. Ошол боюнча сыртка чыкпады. Чырагы да таң атканча өчпөдү.
Жумушка жөнөгүчө апасы жаткан бөлмөгө беш жолу кирип чыкты Эркин. Эшик караңгы болсо да апасын шаштырып жатат чунак бала.
- Апа коркуп жатасызбы? Корксоңуз мен жеткирип келейин, анан деле жумушка бара берем го?
- Айланайын балам, шаштырбачы? Жарык түшсүн кичине. Таң атпай жетип барсам көргөн эл эмне дейт? Сен кыжаалат болбой жумушуңа бара бер, мен барып, жообун иниңен айтып жиберем.
- Макул апа, бирок сөзсүз барыңыз ээ? Сураныч!?
- Барам деп жатам го уулум. Эркиндин дүрөгү элеп-желеп болуп араң жумушуна кетти.
Мураттын оюна таң атканча эмне деген гана ойлор келбеди. Бир туруп Аруукени алып келип, уулун эркелетип, бакыттын кучагында балкыса, экинчи ою келинчеги менен биротоло ажырашып жаңы жашоо башта дейт. Эки анжы ойдо калып бушайман болуп жатса кыялына дагы кайдандыр бир ой келет. Чыдабай кетип ордунан ыргып туруп тамекиге күчүн чыгарат. Эмнеге Аруукени үйүнө чейин күзөтүп барып жолукпай келе бердим? Эч нерсе билбеген киши болуп артынан кирип, уулум экөөнү алып келе берсем болбойт беле? Же, поликлиникага чейин ээрчип акмалабай, эмнеге чогуу барбадым? Күнөө өзүмдө, төрөт үйүнөн чыгарып коюп баса бердим да кайрылып барбадым. Айылга келгенин билсем да алып келүүгө аракет кылбадым. Кубанычтан ушунчалык кызгандымбы? Балким өз каныман жаралган баламды жээрип, Аруукени жөн жерден күнөөлөп жаткандырмын. Өз бакытым үчүн күрөшүп, канчалаган тоскоолдорду жеңип өтүп, оңой эле колдон учкан таранчыдай коё берип койомунбу? Мен Аруукеден баш тарттым дегенче Эркин илип кетет. Ой деген ушунчалык күлүк ээ, аны менен көз ирмемде ай-ааламды кезип келсең болот? Мураттын оюна жакшы нерселер келсе го мейли эле, ушул учурда баягы эски оорусу дагы кармады. Анын көз алдына азыр Арууке Эркин менен бир төшөктө кумарга батып жатканы элестеп кетти. Дароо эшикке жөнөдү. Бирок караңгы экенин көргөндөн кийин аргасыздан артка кайтууга туура келди. Таң сүрө баштаганда ордунан турду да шашып кийинип чыгып жолго түштү. Автобекетте такси турган эле, автобус да бар. Туура эле таксиге келип, шоопуру менен сүйлөшүп жөнөп кетти. Таң атпай кирип келген Муратты көрүп үйдөгүлөр чочуп кетишти.
- Мурат, жай элеби? Таң атпай кайдан?
- Баары жакшы апа. Жумуштан кол бошобой Аруукелерди алып кеткенге убакыт жок болуп. Бүгүн экинчи сменге жумушка бармакмын, ага чейин аларды алып кетейин деп келдим.
- Эшик суук, кичине күн көтөрүлсүн, кир үйгө? Ары жактан кайнатасы үн салды.
Арууке жаткан бөлмөгө кирип келгенде гана Мураттын жүрөгү ордуна келди. Ал уулун кучактап, жүзүнөн бактылуу нур чачырап уктап жаткан эле.
- Арууке, ойгончу? Акырын колунан тартты. Муздак колу келинчегин чочутуп жиберди.
- Мурат?
- Тургула жаным, сыртта такси күтүп жатат, кетебиз?
- Кайда? Уйкусураган Арууке олдоксон суроо берди.
- Үйүбүзгө жаным. Келинчегин шаштырып, кийим-кечесин салыштырууга өзү жардам берип, нан ооз тийди да чыгып кетишти. Эч нерсеге түшүнбөгөн Аруукенин ата-энеси аларды узатып кала беришти.
Уландысы бар.
Присоединяйтесь к ОК, чтобы посмотреть больше фото, видео и найти новых друзей.
Комментарии 206
ИЙГИЛИК