Предыдущая публикация
Тау, АВАЙ, ош тӱням пӧлеклыметлан!
🤱💕
Российыште ноябрьын пытартыш рушарнянже Ава кече палемдалтеш. Тений тудо 24 ноябрьлан тура толын. Эше ик амал лектеш авалан поро мутым каласаш, ончен куштымыжлан таушташ, чон почын кутыралташ, иктаж пӧлекым кучыкташ… Да шерге йоча жапым шарналташ.
💬 Марина ПОЧТЕНЕВА, М.Шкетан лӱмеш Марий драмтеатрын актрисыже, мурызо:
– Авам Людмила Романовна кум ий ончыч кенета илыш дене чеверласыш.
Ме Курыкмарий районышто авамын шочмо ялыштыже, Яндусолаште, иленна. Тушто ачам дене коктын пӧртым чоҥеныт, кок ӱдырым ончен куштеныт. Авам ден ачам эреак пашаште лийыныт. Ава ветеринарланат, плодоовощеводланат тунемын, поварланат тыршен. Пакча шеҥгелне фермым чоҥымеке, тушко пашаш пурен. Тудын моштыдымо сомылжат лийын огыл. Ялыште авамым чылан пагаленыт.
Мураш йӧрата ыле, ойыртемынак «Ошкыл шыманракын, ит нӧлтӧ пуракым, корнына эше кужу, колат...» манын муралтен колтен. «Нигӧ денат нигунамат ит туманле, иктыланат нигунамат ит сыре», – манеш ыле. Ынде тиде мыйынат илыш девизыш савырнаш тӧча. Тыге илаш куштылгырак.
Авамын аважым кочам Кугу Ачамланде сар гыч тышке конден. Нуно пырля сар гоч эртеныт. Ковам мордва калыкын шочшыжо лийын, эрзя. Ондак рушла веле кутырен, а вара тунем шуын курыкмарлат.
Авам моткоч поро да пашаче лийын. Тачат тудо чонемлан ок сите, мӧҥгӧ мийымеке, поснак уке улмыжым шижам.
Следующая публикация
Комментарии 2