Қисми 48.
Минбаъд ҳар рӯз ба назди падарам меомадам, аспҳоро ба кӯча бароварда машқ мекардем. Чанд нафарро ба пойга ва чанд нафари дигарро ба бузкашӣ омода мекардем. Ба Остона рафта аз комитетҳои варзиш ва фарҳанг оиди гузаронидани намоиш ва фурӯши аспҳои нодир иҷозатнома гирифтем. Иди Наврӯз наздик меомад, аз рӯзи пардохти маош се рӯз гузашт. Миёни кормандон ҳар гуна овозаҳо паҳн гашт, ки ширкат муфлис шудааст. Ин хабарро падарам расонд.
- Маош албатта бо иловапулиҳояш мешавад, - гуфтам, - рӯҳафтода нашаванд.
Рӯзҳои 19-20-уми март дар Остона аспҳоро ба намоиш гузошта, шонздаҳтояшрр бо маблағи дилхоҳ фурӯхтем. Яке аз аспҳои мо дар пойга ҷои аввалро гирифт ва обрӯи ширкати моро боло бардошт. Харидоре, ки ҳамон аспро харида буд, бо мо боз барои сӣ асп шартнома баст. Дар Наврӯзгоҳ тамоми аспҳои бурдашуда ба фурӯш гузошта шуд. Аз шасту чор асп чилу шаштояш ба савдо рафт. Ҷамъ дар чор рӯз шасту ду асп фурӯхта шуд ва ин нишондиҳандаи беҳтарин дар таърихи ширкат буд. Ба суратҳисоб паиҳам маблағ ворид мешуд. Ба ҳамаи кормандон ба муносибати иди Наврӯз дар ҳаҷми бисту панҷ фоизи маошашон мукофотпулӣ ва ба онҳое, ки дар мусобиқаҳо ва намоиш ширкат доштанд, дар ҳаҷми як маош иловапулӣ пардохта шуд. Кор ба маҷрои худ даромад.
Айсултан аз муваффақияти бадастомада хушҳол буд, сабаб барои нӯшидан дошт. Ману духтараш Гулнарро ба меҳмонӣ даъват кард.
То қарибиҳои нисфи шаб дар хонааш шудем, Гулнар хост дар хонаи волидонаш монад. Сабаб пурсидам.
- Дар се моҳ як маротиба иҷозат нест? - пурсид ӯ.
- Дар забони мо се моҳ-"квартал" ҳисобида мешавад, - гуфтам, - як маротиба дар як квартал ҳеҷ гап не.
Ба ҷойгаҳ танҳо ёзидам, мондагиамро нав эҳсос мекардам. Бори аввал дар се моҳи охир хостам истироҳати пурфароғат дошта бошам. Аммо садои расидани паёмак ба гӯш расид. Дидам, ки паёмак аз Надя ирсол гаштааст.
"Паёмро хондӣ, чаро ҷавоб нанавистӣ?" - навиштааст ӯ.
Паёми аз ин пештарнавиштаашро кушода хондам.
"Роби, чаро маро бад дида мондӣ? Имрӯз маошамро гирифтам, боз баробари ҳамсарат. Чӣ ваъда дода будӣ? Ё гумон мекунӣ, ки ман муҷаррадаму пул лозим нест? Аққалан ба хотири он шабҳое, ки ҳамроҳ будем, камтар илова кун".
Рақамашро гирифта занг задам. Дарҳол алоқа пайваст шуд.
- Чӣ ҷавоб нависам? - гуфтам, - телефони ман тугмадор, интихоби ҳарфҳо мушкил.
- Гуфтӣ, ки як фоиз аз фурӯши аспҳо ба маошам илова мекунӣ, канӣ?
- Агар аспро ту фурӯшӣ як фоиз аз маблағи бадастомадаро мегирӣ, ту нафурӯхтӣ-ку?!
- Чаро ба дигарон панҷ фоиз ваъда додӣ?
- Мо маҷбур шудем, то дигарон низ ҳавасманд шаванд. Лекин, бинобар дар савдо иштирок доштанам, ба дигарон дар ҳаҷми як маош мукофот додем, ки ин тақрибан якуним фоизро ташкил медиҳад. Ман низ баробари онҳо маош гирифтам, метавонӣ аз модарат пурсида.
- Вақтҳои охир муносибатамон хеле сард шудааст, шояд барои ҳамин маошам кам?
- Гап дар сари муносибат нест, ту умуман кӯшиш ҳам надорӣ, ки нафъе ба ширкат орӣ. Фурӯш ва соҳиби ҳамон як фоиз шав. Мефаҳмӣ, даромади мо, даромади тамоми кормандон аз фурӯши аспҳост. Мо дигар даромад надорем, танҳо пору истеҳсол мекунем, ки ҳатто хароҷоти анбори чорумро намепӯшонад... Пул туро чӣ лозим, маоши туву модарат барои ду нафар басанда нест?
- Имсол ба истироҳатгоҳ меравам, меравӣ ҳамроҳам?
- Барои панҷ моҳи корат рухсатӣ намедиҳанд.
- Модарам гуфт, ки ҳуқуқ дорам ба чордаҳ рӯз.
- Куҷо рафтанӣ ва бо кӣ?
- Ба Туркия, худам меравам.
- Танҳо?
- Хоҳӣ ҳамроҳ меравем.
- Ман наметавонам, нақшаҳои зиёд дорам.
- Бо Гулнар меравӣ?
- Вай ҳам намеравад. Мо дигар нақшаҳо дорем.
- Фаҳмидам, таваллуд карданӣ.
- Ин ҳам дар нақша ҳаст. Надя, ту панҷ моҳ истироҳат доштӣ, ман бошам кор кардам. Монда шудам ва истироҳат кардан мехоҳам.
- Хуб, истироҳати хуш.
- Ташаккур, ба ту низ.
Субҳ барвақт хеста ношто кардам ва ба хонаи Гулнар рафтам, то ҳамроҳ ба кор равем. Зангро пахш кардам, ки дарро Маша-хола кушод.
- Гули мо ҳанӯз хоб? - пурсидам аз ӯ.
- Гули ту каме нотоб барин, дар ҳуҷрааш мехобад.
Ба ҳуҷрааш даромадам, ки дар ҳақиқат рӯи ҷойгаҳ мехобад, вале кайҳо бедор.
- Танҳо хобат набурд? - гуфта дар канораш нишастам.
- Баръакс, - гуфт ӯ, - хеле хуб хобидам. Ту чӣ?
- Ман ҳам. Хеле монда будам ба фикрам.
- Надя монда кард?
- Надя ба мондагии ман чӣ дахл дорад? Аз фикру андешаи дастрас кардани пул монда шудам.
- Шаб ду маротиба занг задам, бо кӣ дар алоқа будӣ?
- Шаб занг задӣ? - хостам телефонамро гирифта рӯйхати зангҳои доирнагардидаро бинам, аммо Гулнар нагузошт.
- Надя занг зада буд, аз кам будани маошаш шиква кард.
- Аз танҳоияш шиква накард?
- Не, мо бо ӯ ин гуна масъалаҳоро муҳокима намекунем.
- Албатта, ту ҳамеша дар бараш, боз паёмак мефиристад, аз шабҳои бо ту буданаш ёдовар мешавад.
- Вай ақл надорад, ҳар чӣ хост-ҳамонро менависад.
- Ва ту аз беақлиаш истифода мебарӣ... Барову дафъ шав, аз ман Павелбай умед накун.
- Ту чиҳо мегӯӣ? Ман танҳо туро дӯст медорам.
- Шунидан ҳам намехоҳам, дидан ҳам... Рав гуфтам, хоҳӣ, ки садоямро баланд накунам...
Аз ҷайб калиди хонаро бароварда рӯи ҷойгаҳ гузоштам.
- Ором шаву бегоҳ ба хона баргард, туро мунтазир мешавам, - гуфтам ва аз ҳуҷра берун баромадам.
Бо волидони Гулнар боз наҳорӣ кардам, гумон кардам Гулнар низ сари миз меояд, аммо ӯ аз ҳуҷрааш набаромад.
- Имрӯз истироҳат кунад, - гуфтам ба модараш ва бо Айсултан ба мошинаш нишаста ба коргоҳ рафтем.
Сабзаҳои нахустин дар ду канори роҳ сабзида, аз омадани баҳор дарак медоданд. Айсултан аз қаҳри духтараш хабар надошт, чун ҳарвақта хушҳол буд.
- Мову Гулнар сирри муҳим дорем, - гуфтам, - метавонам шуморо низ хабардор кунам.
- Ман аллакай хабар дорам, метавонам ҳатто табрик карда. Аз забони худаш нашунидаму модараш гуфт.
- Маша-хола ҳам бохабар?
- Албатта, охир вай момо мешавад.
Дарк кардам, ки сухан аз боби кӣ меравад. Аммо ман то ҳол аз кӯдаки батнаш хабар надоштам.
- Медонед, Гулнар боз мехоҳад тиҷорати худашро дошта бошад, гуфтам бо шумо маслиҳат кунам..
- Ҳар чӣ духтарам мехоҳад, қабул ва дастгирӣ мекунам.
- Мехоҳад бо тиҷорати маҳсулоти хӯрока аз орд машғул шавад.
- Хеле хуб, машғул шавад. Мо барин танҳо аз думи асп надорад.
- Оё метавонем то таваллуди кӯдак барояш бинои истеҳсолӣ сохта?
- Ман маошхӯр, ту маошдеҳ. Аз пули ширкат гирифта истифода бар, лекин ба шарте, ки хароҷотҳоро рӯзе пӯшонида, маблағи истифодакардаатро баргардонӣ.
- Албатта бармегардонем, Худо ривоҷи кори Гулнарро диҳад, дар дил орзуҳои зиёд дорад.
Худи ҳамон рӯз ба яке аз ширкатҳои сохтмонӣ занг зада масъаларо фаҳмонидам.
- Мавзеи сохтмон дар куҷост? - пурсид намояндаи ширкат.
- Дар Аксарай, - гуфтам.
- Масоҳати сохтмон?
Тақрибан сад метри мураббаъ.
- Аз хишт ё блок?
- Хишти пухтаи сурх.
- Баландии пойдевор?
- Тақрибан як метр.
- Баландии бино?
- Се ё зиёда метр.
- Бомро бо чӣ мепӯшонед?
- Бо хасу хошок! Шумо сохтмончӣ ё наттоқ? Метавонед омада? Дар ҷои сохтмон бояд маслиҳат кунем, на тариқи телефон.
- Агар нархи моро гарон гӯед, барои рафтанам ва вақти сарф кардаам пул медиҳед.
- Ташаккур, шумо барин сохтмончӣ лозим нест, - гуфта талефонамро хомӯш кардам ва ба Багир занг задам.
- Дорӣ сохтмончиҳои шинос?
- Дорам, лекин суроғаашро намегӯям.
- Барои чӣ?
- Шарманда шудан намехоҳам.
- Чаро шарманда мешавӣ?
- Ту баъзе бандҳои шартҳои шартномаро иҷро намекунӣ.
- Возеҳтар гап зан.
- Се маротибаи охир дусаддонагӣ тухм овардам, пулаш канӣ?
- Вазъи иқтисодии ширкатро медонистӣ, пул надоштем.
- Ту вазъи иқтисодии ширкатро бо вазъи иқтисодии киссаат омехта накун.
- Маош нагирам аз куҷо бо ту ҳисобӣ кунам?
- Хабар дорӣ, ки мурғҳо аллакай тухм мекунанд? Рӯзи гузашта сиву се дона тухм гирифтем.
- Аз ин пеш чӣ?
- Рӯзи якум ҳафт дона, рӯзи дуввум бист дона, хулоса ту аз ман панҷсаду панҷоҳ дона тухм қарз дорӣ. Барои ёздаҳ рӯз.
- Тухмро аз мурғҳо талаб кун.
- Мурғҳо дар шартнома имзо нагузоштаанд.
- Ҳамагӣ чанд баст дар инкубатор тухм гузоштӣ?
- Ҳафт баст.
- Пас ҳазору чорсад мурғу хурӯс дорем?
- Басти охиринро ба ҳисоб нагир, дусад дона тухм ҳоло дар инкубатор.
- Хайр, ҳазору дусад мурғ?
- Ҳазору шонздаҳ.
- Барои чӣ? Яксаду ҳаштоду чор дона чӯҷа канӣ?
- Тухм пуч баромад.
- Ман барои тухми пуч пул диҳам?
- Рӯз аз рӯз мумсик мешавӣ...
- Дар шартнома чӣ омада буд? Панҷоҳ дона тухм барои он мегирӣ, ки чӯҷаҳоро бонӣ кунӣ, ҳамин тавр? Чӯҷаҳоро зан бонӣ дорад, ман ба воситаи ту ба ӯ маош медиҳам. Боз тухм барои чӣ диҳам?
- Даҳ донагӣ ҳам дода наметавонӣ?
- Нӯҳ донагӣ метавонам, ба туву занат ва кӯдакат дода, седонагӣ ба ҳар кас.
- Ҳамсарам ҳомила.
- Таваллуд кунад баъд муроҷиат кун.
- Хуб, хеле ҳазл кардем, - гуфт Багир хандида.
- Ҳазл не, нӯҳ донагӣ ҳар рӯз. Шинос дорӣ сохтмончӣ?
- Надорам, лекин чанд нафар дар бӯстонсаройи ҳамсоя кор мекард, агар рақамашро дошта бошад, гирифтанам мумкин.
- Занг зада пурс.
Пас аз лаҳзае Багир занг зад ва рақами сохтмончиёнро гуфт. Хушбахтона айни ҳол сохтмончиҳо машғулияте надоштаанд. Суроғаашонро пурсидам ва ронандаро фиристодам, то рафта як намоянда ё бригадирашонро гирифта орад. Сипас ҳамроҳ ба ҷое, ки бинои истеҳсолӣ сохта мешуд, рафтем. Сарвари сохтмончиҳо мақсадамро то ба охир шунид ва гуфт:
- Сад мураббаъметр кам, ҳисоб кунед: сӣ мураббаъ анборчаи масолеҳи хом барои орду равған ва ғайра, боз аққалан ҳамин қадар барои маҳсулоти пухташуда, цех барои пухтупаз, як утоқ барои сарвар ё бригадир, ҳуҷра барои иваз кардани сару либос, даромадгоҳ, корманд аз кӯча рост ба ҷои кор ворид намешавад, сониян печу тафтон метасфад, цехи барҳаво лозим, як ҳуҷрача барои истироҳат ё хӯрокхӯрияшон лозим, ҳоҷатхона, ташноб боз якчанд чизи дигар.
- Тарҳашро кашида пешниҳод кунед, боз маслиҳат мекунем, - гуфтам, - лекин андозаҳоро аз ҳисобатон ду баробар зиёд гиред.
Ба ронанда гуфтам, ки метавонад равад, ман аввал чӯҷаҳоро хабар мегирам, сипас бо Багир меравам.
Аввал ба хонаи тахтагине, ки зан бо ду кӯдакаш мезист, рафтам. Дарро ба ангушт задам, ки зане баромад.
- Ба шумо кӣ даркор? - пурсид вай.
- Шунидам, ки касе дар ҳамин ҷо тухм мефурӯшад. Калид дар шумост?
- Шуморо нашинохтам.
- Гуфтан мумкин, ман раиси ҳамин чӯҷаҳо.
- Як лаҳза, - гуфта ба хонааш даромад ва аз дохил садояш баромад:
- Назди мурғхона як мард омад, худашро раиси чӯҷаҳо мегӯяд... Биё, ман мунтазир.
Ва зан дигар ба берун набаромад. Ман бошам, наздиктари дари мурғхона рафта, омадани Багирро мунтазир шудам. Медонистам, ки зан ба Багир занг задааст. Ӯ маро то ҳол боре надидааст ва намешиносад. Барои вай Багир раис буд, зеро ӯ ин занро аз хонаи иҷора овардааст ва пули ман додаро ба зан ҳамчун маош месупорад.
(давом дорад...)
Присоединяйтесь к ОК, чтобы подписаться на группу и комментировать публикации.
Комментарии 2