Предыдущая публикация
Зиндагӣ дарсат диҳад, бисёр доно мешавӣ.
Лобалои нотавониҳо тавоно мешавӣ.
Бо шикастан пир месозад туро устоди дард,
З-имтиҳон бо сабр гар бигзаштӣ, барно мешавӣ.
Гар шавӣ моил ба нафсат, мекунад пажмурда, лек
Моили ақлат шавӣ, зуд сабзу раъно мешавӣ.
Ҷустани айби дигарҳо мекунад кӯрат вале,
Айби худ ҳар лаҳза дарёбӣ, ту бино мешавӣ.
Ҳарфи бад месозадат ҳарҷо маризиву мараз,
Хушсухан бошӣ агар, ҳамтои Сино мешавӣ.
Ҳадду марзи хешро дар зиндаги донӣ бас аст,
Дар ҳама манзилгаҳу маҳфил ту мино мешавӣ.
Ҳотамӣ, дарс аст ҳар як сӯзу сози зиндагӣ,
Зиндагӣ дарсат диҳад бисёр доно мешавӣ!
Ғайратҷон Ҳотамӣ
Следующая публикация
Нет комментариев