Ман обрӯямро
ба пеши ту намерезам
Агарчи ҳузнангезам,
Агарчи дар саропоям
ҳама он донаи ғамро ба сад андӯҳ мебезам!
Бидон...
З-ин пас саломи ту,
каломи ту, паёми ту
Барои ман саломе нест,
Калому ҳам паёме нест!
Ту баҳри ман аз ин пас аз ҳама бегонаҳо бегонатар ҳастӣ,
Бароям як дуруғи содаӣ, афсонаӣ
В-аз он ҳама афсонаҳо афсонатар ҳастӣ!
Чаро ки ту...
Фаромуш кардаӣ моро,
Фаромуш кардаӣ мову ҳама ишқу таманноро,
Тамоми лаҳзаҳои бас гувороро....
Ва ман ҳам орзуямро ба ҳар рӯё нахоҳам дод,
Диламро бар фиребу лофи ҳар савдо нахоҳам дод!
Бе ин ҳам...
Зи ман чандин сару соле
Ба уммеди назар бар хандаҳои бардуруғат рафт...
Нигар, ки солҳои умри ман сарфи нигоҳат шуд.
Бе ин ҳам...
Умеди шодиҳои навҷавониро ба ғамҳоят бадал кардам...
Ҷавониям ба номат шуд.
Бе ин ҳам...
Танаффур кардам аз дунё
Ки ҳар як зарраи меҳрам нисорат созам охир бин, ки
ишқам ҳам ба комат шуд!
Магар ту қадри ин эҳсос донистӣ?
Не ҷонам, надонистӣ!
Ва ё шояд ту дониству
ман он чеҳраи аслат надонистам!
Ту медонӣ саропои вуҷудамро
Валекин ман саропои вуҷудатро надонистам!
Чаро охир ба қалбам бозиҳо кардӣ,
Сипас дастам раҳо кардӣ?
Чаро охир
набудӣ ту зи аввал ончунон, к-охир шудӣ, ҷоно?
Барои чӣ набуданд ибтидою интиҳои ту ба ҳам моно?
Бубахш...
Ман боғурурам!
Ишқу ёрии дигарро хоҳ,
Раҳи худро ба роҳи ёри нав пайванд.
Ман акнун меравам з-ин роҳ!!!
✏Омина Ҳамроева
Присоединяйтесь к ОК, чтобы подписаться на группу и комментировать публикации.
Нет комментариев