ХУШҲОЛӢ..

Ман ба як муждаи бозомаданат хушҳолам,
Зи ҳамон шарфаи ғурбатшиканат хушҳолам.
Эй, ки дар бистари абрешими шаб ёдат монд,
Ба шамими сараи атри танат хушҳолам.
Мисли як ташнаи муҳтоҷ ба як ҷуръа сухан
Оҳ, такрор ба ҳар гапзаданат хушҳолам.
Беҳтарин шеваи наздик будан то ба куҷо?
Чени дурии туву пираҳанат хушҳолам.
Эй, ҳама сабз, дар обони ғуборолудам,
Андалебона зи лутфи чаманат хушҳолам.
Нест ин пайраҳаи сабз қадамҷои ту, лек
Ман ба эҳсоси хуши кофтанат хушҳолам!
Орзу Исоев.