"Aşura səhəri fəzanın ağır ruhu Kərbəla səhrasını öz ağuşuna almışdı. Bir tərəfdə azadlıq məktəbinin qurucuları, İlahi eşqin tərənnümçüləri, sədaqət və layaqət simvolları, digər tərəfdə dünyasını axirətinə dəyişənlər, batili haqqdan üstün tutanlar, mənəviyyatları zəlalət girdabında boğulanlar dayanırdı. Bu səhnəni düşünmək nə qədər ağır və çətindirsə, onu görmək, dərk etmək və yaşamaq bir o qədər də mümkünsüzdür. Hər şəhid döyüş səhnəsinə qədəm qoymazdan öncə dayanır, baxışlarını çox çətinliklə qaldırır, əvvəlcə İmam Hüseynə (ə), daha sonra Xanım Zeynəbin (s.ə.) xeyməsinə baxırdı. Hər şəhidin mübarək simalarda göz yaşının pak incisi parlayırdı. Bu sözsüz danışıq, sükutlu fəryaddır. Elə bil “Bağışla Hüseyn (ə), mən səninlə, Allahın sərhəddini pozan bu zalım tayfa arasında qanımı sədd etməklə sən və Əhli-beytini (ə) qorumağa çalışacağam. Bu mənim zülmü tanıtmaq və haqqı müdafiə etmək üçün edə biləcəyim son addımdır. Bağışla Hüseyn (ə)” sözlərini söyləyirdi.
Sanki bütün aşiqlər, sıralanmış cənnət mələkləri göz yaşlarının həqiqətində Hüseynə (ə) sevgi, qarşı tərəfə, düşmənə, nifrət nümayiş etdirirdilər. Hər bir aşiq eşqin tərənnümündə son dəfə yerə enmiş cənnət günəşinin simasını seyr edərək göz yaşlarını susuz Kərbəla səhrasına şahid qoyub gedirdilər. Bu göz yaşları Hüseynə (ə) sevgi tərənnümü olmaqla yanaşı, düşmən üzərinə hücumun cəsarət nümayişi idi.
Artıq sondur. Hüseyn (ə) özü bu yolun son yolçusudur. O, atına qalxır və baxışlarını çevirib xeymələrə baxır, qəm qəhrəmanı Zeynəbi (s.ə.) axtarır. Hüseyn (ə) də gözü yaşlıdır. Hüseynin (ə) göz yaşları eşqin ayrılıq tablosu olduğu kimi batilin də bağrını yaran mücadiləsinin son nöqtəsi olan göz yaşıdır. Bu göz yaşı o, sağ ikən mübarizə səlnaməsinə qoyulan nöqtə, şəhid olduqdan sonra aşiqlərinin ruhuna axan məhəbbət çeşməsinə çevriləcəkdi. Bu göz yaşları Hüseyn (ə) eşqinin ecazını özündə realizə edərək haqq aşiqlərinin həqiqi göz yaşları mənbəyi idi.
Bu gün axıdılan göz yaşlarında sədaqət, eşq və mübarizə, eyni halda zülmə, haqsızlığa qarşı etiraz birliyinin vəhdəti həqiqi Hüseyn (ə) məktəbinə məzun yetişdirə bilər. Necə ki, öz dövründə Əliəkbər, Əliəsgər, Qasim, Əbülfəzl, Həbib, Müslim, Züheyr və sair Hüseyn (ə) fədailəri bu eşqlə məzun oldular".
https://t.me/Abgulsuleymanov İnstegram: https://instagram.com/abgulsuleymanov?utm_medium=copy_link Youtube: https://www.youtube.com/channel/UCZN3sSi2CciDs_OzBnW5kiA Facebook: https://www.facebook.com/suleymanovabgul
Присоединяйтесь к ОК, чтобы подписаться на группу и комментировать публикации.
Нет комментариев