Առողջ սիրտն առողջ կյանքի գրավականն է: Մարդը չի կարող լիարժեք առողջ համարվել, նա չի կարող վազել, սպորտով զբաղվել, օգտագործել ցանկացած սնունդ, երբ սրտի խնդիրներ ունի:
Եթե առողջ սիրտ ունենալն առողջ կյանքի գրավականն է, ապա մաքուր սիրտ ունենալն էլ հոգևորապես առողջ կյանքի գրավականն է: Կարծում եմ՝ կհամաձայնես այն մտքի հետ, որ հոգևոր մարդու համար կարևորագույն օրգանը սիրտն է: Ինչո՞ւ: Որովհետև մենք ունենք աչքեր, սակայն Աստծուն տեսնում ենք մեր սրտո՛վ, ունենք ականջներ, բայց Աստծո ձայնը լսում ենք դարձյալ սրտո՛վ, ունենք բերան, բայց Աստված լսում է մեր սրտի՛ աղաղակը:
«Երանի սրտով մաքուրներին, որովհետև նրանք կտեսնեն Աստծուն» (Մատթևոս 5:8 ):
Սիրելի՛ քրիստոնյա, Աստծուն տեսնելու, հոգևորապես առողջ կյանք ապրելու միակ նախապայմանը սա է. ունենալ մաքուր սիրտ:
Աստծո համար առաջնայինը սիրտն է, նրա հայացքը հենց այնտեղ է ուղղված, ուստի ծառայություններից, գործերից ու մնացած զբաղմունքներից մի պահ հեռացրու հայացքդ և ուղղիր այն դեպի սրտիդ խորքը… Արդյոք այնտեղ ամեն ինչ կարգի՞ն է, արդյոք չկա՞ն ավելորդ իրեր՝ բամբասանք, ծաղրանք, հպարտություն… արդյոք չկա՞ն հնից մնացած նախանձի ու չարության փոշիներ …
Մի՛ մոռացիր, որ քո սիրտը Թագավորի բնակավայրն է, և այնտեղ ամեն ինչ պիտի լինի Թագավորին վայել մաքրությամբ և սրբությամբ:
Ու եթե կզգաս, որ ինչ-որ բան իր տեղում չէ, ինչ-որ բան Թագավորի ուզածով չէ, խոնարհվի՛ր Աստծո առաջ ու ասա՛ այն խոսքերը, որոնք մի օր դուրս եկան Դավթի շուրթերից.
«Սուրբ սիրտ ստեղծիր ինձանում, ով Աստված, և ուղիղ հոգի նորոգիր իմ ներսում: Դեն մի գցիր ինձ քո երեսից, և քո Սուրբ Հոգին ինձանից մի առ» (Սաղմոս 51:10-11):
Արմեն Նիազյան
Присоединяйтесь к ОК, чтобы подписаться на группу и комментировать публикации.
Комментарии 5