Քրիստինա Մկրտչյան
«Եթե աչքերս բացեմ ու լույսը տեսնեմ, ուրեմն Աստված ինձ նոր կյանք է տվել»,- սրանք իմ հին կյանքի վերջին խոսքերն էին:
Արթնացա… վիրահատությունը ավարտված էր… կորցրել էի բալիկիս:
Համարձակվեցի արտաբերել միայն սրտիս մեջ ծանրացած անհուն զղջումը: Չգիտեմ որտեղից հույս ունեի ներվելու:
- Ների’ր ինձ, Աստված, եթե կարող ես, խնդրում եմ, ներիր ինձ, եթե կարող ես,- անվերջ կրկնում էի ես:
Ու հասկացա հանկարծ, թե ինչ հպարտ եմ եղել, հասկացա, որ իմ փոքրիկի կորուստը բացառապես իմ հպարտության արդյունքն է:
Օ~, որքան հպարտ էի ես` իմ սպորտային կազմվածքով, աերոբիկայի առաջատար մարզչի իմ հիանալի կարիերայով. հղիությունը ոչ մի կերպ չէր կանգնեցնում ինձ` նույնիսկ արդեն 6 ամսական:
Ես վազում, վազում էի առաջ կյանքի թվացյալ բարձունքներով` խլացնելով իմ մեջ մայրական խղճի ձայնը:
Այժմ կորուստս ահռելի մեծ էր, բայց ցավի ու հուսալքության, մենակության ու միայնակության խավարի մեջ հանկարծ ներսումս լույս ծագեց: Հետո հասկացա, որ դա Արարչի կողմից սիրված ու ներված լինելու լույսն էր:
Չէի կարողանում հավատալ, որ Նա` Կյանքի աղբյուրը, նույն ինքը` Կյանքը, կարող էր ինձ սիրել, առավել ևս` ներել:
Ահա թե ինչ կատարվեց ինձ հետ, երբ հանդիպեցի Հիսուսին. ես ձեռք բերեցի խոնարհության թանկագին պարգևը: Դա առաջինն էր, որ գիտակցեցի:
Ամիսներ անց ես ձեռքս վերցրեցի Աստվածաշունչը ու գտա պարզ ու զորավոր մի խոսք, որը հենց այդ օրվանից ամրագրեցի իմ սրտում. «Աստված խոնարհներին շնորհք է տալիս»:
Նրա մեծագույն շնորհքի բազմահազար դրսևորումներից մեկն էլ իմ փոքրիկ, քնքուշ Աննային տեսնելն էր. Աստված ցույց տվեց ինձ նրան տեսիլքով` Հիսուսի ձեռքը բռնած, ու իմ երեսից անհետացած անկեղծ ժպիտը նորից գտավ ինձ:
Այն օրը վիրահատարանում, երբ ես արթնացա, իսկապես տեսա լույսը` կյանքի լույսը, որ այլևս երբեք չի մարի ինձ համար:
Այսօր ես երեք երեխաների մայր եմ, նորից աերոբիկայի մարզիչ, բայց հիմա իմ պարապմունքների ժամանակ հնչում է փառաբանություն, իմ տանը հնչում է փառաբանություն, իմ ներսում հնչում է փառաբանություն: Հիմա ես ապրում եմ Աստծո համար, իմ ընտանիքը նույնպես ապրում է Աստծո համար:
Իսկ նրանք, ովքեր վիրահատությունից հետո հույս չունեին, որ ես անգամ նորմալ կքայլեմ, քանի որ ձեռք էի բերել խորանիստ երակի տրոմբ, այսօր իմ կյանքը տեսնելով` նույնպես փառք են տալիս Աստծուն:
Պատրաստեց Գոհար Ավագյանը
Присоединяйтесь к ОК, чтобы подписаться на группу и комментировать публикации.
Комментарии 12