Миңа гына шулай тоеламы?
Чыннан дамы күкләр чалт аяз?
Бу кичне мин өзелеп көтеп алдым.
Бу кичне мин − гүя кайтаваз...
Ымсындырып кара күзләремә.
Кайтаваздай кайтыр карашың.
Сүзсез караш тоташтыра бүген
Йөрәк белән йөрәк арасын...
Мөмкин булса, кочагыңа кереп
Шашып үбәр идем үзеңне!
Ярсу ташкын хисне авызлыклау −
Ай-һай, җитди сынау түземне!
Юк шул, булмый... Куркам − кеше сизәр.
Әкияттәгедәй серле бу кичтә
Мин ерактан гына күзлим сине.
Хыялларым бары исертә...
Син минеке түгел.
Минем белән түгел!
Бер күрүем сине − бер гомер...
Шуңа да бит кичләр аяз бүген.
Тик хисләрем җилгә түгелер...
Ике яктан ике гүзәл белән
Яннарымнан гына үтәрсең.
Башың борып, җилкә аша миңа
"Исәнмесез, ханым!" − диярсең...
Мин дә артык исем китми генә,
"Саумысез!" − дип, сиңа дәшәрмен.
Бу тамаша шулай тәмамланыр.
Тик керфекләр бераз яшьләнер...
Берни сизмәс банкет кунаклары.
Ярый әле, берни сизмәсләр!
Әче телле урам карчыклары
Гайбәт сөйләп, бәгырь кисмәсләр...
Без − ирекле, тик ирекле түгел
Ил күзенә язган язмышлар.
Син − биектә, ә мин − түбәндәрәк,
Арабызда − уртак танышлар...
Тик хисләргә дөнья күзе − нәрсә?
Халык сүзе нәрсә хисләргә?
Җитәкли дә алар минем кулдан,
Илтеп куя шушы кичләргә...
...Бу кичне мин өзелеп көтеп алдым.
Бу кичне мин − гүя кайтаваз...
Күкрәгемдә – дөрләп янган сөю.
Күкләр әле һаман чалт аяз...
Халисә Ширмән
#укы
Присоединяйтесь к ОК, чтобы подписаться на группу и комментировать публикации.
Комментарии 2