Сител халăхӗ мĕн авалтан ӗҫре те уявсенче те пӗрле пулма тӑрӑшать. Вӗсен маттур та пултаруллă, ялшăн тăрăшакан хастарсене яланах асра тытса хисеплесси ырă йăла пур. Акă Çимĕк кунĕнче ял çыннисем клуб умĕнчи лапама йышлăн пухăнчĕç. Кунта Сителшĕн хăй вăхăтĕнче ырми-канми вăй хунă сумлă Юрий Павлович Прискина хисеплесе волейбол турнирĕ иртрĕ. Йăлана кĕнĕ тăрăх ку ăмăрту çулсерен енетешĕмĕрĕн çывăх çыннисем, юлташĕсем, пĕлĕшĕсем тăрăшнипе йĕркеленсе пырать.
Сителсем нумай çул хушши депутат пулса тăрăшнă Юрий Павлович Прискина унăн ырă ĕçĕсемшĕн сума сăваççĕ. Вăл ялшăн пуçарса тутарнă ĕçĕсене каласа та пĕтерейместĕн. Вĕсен шучĕ те çук темелле. Кашнинех вăл яланах мĕнпе те пулсан пулăшма васканă. Пурин шăпи те ăна пăшăрхантарнă.
Кăçалхи турнирта куракансем те, вылякансем те чылайăн пулчĕç. Спортсменсем 4 ушкăна пайланса тупăшрĕç. Кашни команда питĕ вăйлă выляма пултарнипе тĕлĕнтерчĕ. Çапла вара çирĕп тупăшура "Фаворит" ушкӑн пĕрремĕш вырăна тухса савăнтарчĕ. Пьедесталăн иккĕмĕш картлашки çине «Сидели 2» хăпарма пултарчĕ. Виççĕмĕшсем – «Сидели 1». Хавхалантару призне кӳршӗсем "Пашьел" ушкӑн тивӗҫрӗҫ. Пур ҫĕнтерÿçĕсене те сумлă парнесемпе хавхалантарчĕç.
Ăмăртăва хутшăнакансене сумлă хăнасем саламларĕç. Первомайски ял территори уйрăмĕн ертÿçи Леонид Пыркин Патӑрьел муниципаллӑ округӗн депутачӗ Александр Иванов, ял старости Юрий Степанов тата Юрий Павлович ачисем спортсменсене ăнăçу сунчĕҫ, ял халăхне маттур ентешсене манманнишĕн мухтарӗҫ. Ялшӑн хастар ӗҫлекен юлташсене Тав хучӗсем парса чысларӗҫ.
Турнира хутшăннисем ятарласа пĕçернĕ шÿрпепе сăйланчĕç, савăнăçлă кăмăлпа тепĕр çул та кунта хаваспах килессине пĕлтерчĕç.
Уява ятарласа килнӗ чӑваш эстрада ҫӑлтӑрӗсем пуянлатрӗҫ. Вӗсем ял-халӑхне, хӑнасене хаваслӑ концертпа савӑнтарчӗҫ. Артистсем шӑрантарнӑ илемлӗ юрӑсене хыттӑн алӑ ҫупса ташӑ ташласа киленчӗҫ.
Присоединяйтесь к ОК, чтобы подписаться на группу и комментировать публикации.
Комментарии 10