———
(Фрагменты из Богослужения "Рождество Честнаго Славного Пророка, Предтечи и Крестителя Господня Иоанна")
***
глас 4: Явися днесь великий Предтеча,/ от неплодных ложесн Елисавети произшед,/ болий всех пророков пророк,/ и ин несть, ниже воста,/ яко Предтечи светильнику, Свет последова Пресветлый,/ и гласу Слово,/ и невестоводцу Жених./ Готовящему Господеви люди изрядныя/ и предъочищающу при Дусе водою:/ Захаринно прозябение,/ и пустыни доброе воспитание,/ покаяния проповедник,/ очищение согрешений,/ сущым во аде благовествуяй из мертвых востание,/ и моля о душах наших.
***
Иоанне прехвальне,/ и вселенский апостоле,/ Гавриилово благовествование,/ и неплодныя прозябение,/ и пустыни доброе воспитание,/ и искренний друже Жениха Христа,/ Того моли помиловатися душам нашым.
***
Богознаменитый глас, света светильник,/ Господень Предтеча,/ Христом свидетельствованный,/ первый во пророцех, о мiре молитву творяй,/ изрядно стадо твое поминай, спасти невредимо.
***
Прииде глас благодати Слова,/ Солнца проповедник,/ родивыйся днесь от неплодове безчадныя,/ от обетования Иоанн Предтеча:/ людие, радуйтеся,/ прииде уготовати путь нам спасения,/ Емуже и взыграв поклонися,/ во чреве сущу матерни,/ Агнцу вземлющему грехи мiра,/ и подающему нам велию милость.
***
Покаяние отверзеся твоим Рождеством, Предтече и проповедниче. Ты бо един проповедал еси, взывая: покайтеся, Царство Небесное приближися.
***
Веселится вся тварь, твоим Рождеством Божественне: ты бо землен Ангел Предтече, и небесный человек показался еси, Небеснаго Бога провозвещая нам воплощенна.
***
Днесь пустынный гражданин Иоанн раждается, покаяния проповедник, и благодати свидетель истинен, Предтеча слова, и свету предсияющая звезда.
***
Предтечи Рождеством острится днесь секира духовная, еюже вся посекаются страстей взыграния, тайно же процветают плоды покаяния.
———
Святый Великий Иоанне, Предтече Господень, Друг Божий, наш Дивный помощник, пребуди с нами, моли Бога о нас!
Присоединяйтесь к ОК, чтобы подписаться на группу и комментировать публикации.
Нет комментариев