Пашам писемдыман
Йошкар-Ола мэрын пашажым жаплан шуктышо Антон Трудинов Марий паркым тӱзатымаш кузе кайымым ончал савырнымекше, пашам писемдаш кӱштен, возат Йошкар-Ола администрацийын соцлаштыкыштыже.
Ушештарена, Марий Эл вуйлатыше Ю.Зайцевын темлымыж почеш, чоҥымо да олмыктымо объектлаште шукталтше пашам тергаш лӱмын мер контроль тӱшкам чумырымо. Ты тӱшкан еҥже Евгения Глушкова Марий паркын проектировщикше да чоҥышо организацийын пашаеҥже-влак дене вашлийын мутланен, тыгодым палемден: парк Йошкар-Олаште илыше да рӱдолашке толшо уна-влакын каныме верышт лийшаш, сандене пашам йодмо семын ыштыман, кӱлеш гын, ешартыш пашаче вийым ушыман.
Йошкар-Ола эҥерӱмбалсе у паркыште кызыт марте тротуарым да йолешке-влаклан йолгорным шарыме, олымбал-влакым, лӱҥгалтышым да моло изи архитектур формылам вераҥдыме. Шуко вере марий тӱрым кучылтмо. Паркым волгалтарыше светильник-влак ойыртемалтше тӱсым пуртат.
Парк мучко Марий Элысе кажне ола да район нерген каласкалыше стенд-влак лийыт. Тачысе кечылан 17 стенд ямде.
Марий паркын рӱдыжӧ – кугу сцене да тудын ончылно куштымо вер. Шуко калыкым чумырыман пайрем-влак тӱҥ шотышто тыште эртаралташ тӱҥалыт. Каналташ, усталык да калыкле йӱла, тӱвыра мероприятий-влаклан лӱмын изи сцене лиеш, тыште марий сылнысем да мутсескем йоҥгалтыт. Йоча-влаклан посна модмо площадкым ыштат.
Мэрын пашажым жаплан шуктышо Антон Трудинов палемден: июль мучашлан объект ямде лийшаш, а Йошкар-Олан 440 ий темме кечыжлан тичмашнек тӱзатен пытарыман.
Л.СЕМЕНОВА
Фотом Йошкар-Ола администрацийын соцкылже гыч налме
Присоединяйтесь к ОК, чтобы посмотреть больше фото, видео и найти новых друзей.
Нет комментариев