"Марий Эл" газет - поро йолташет

Моштен ыштет – лектыш чапле Звенигово район Олыктӱрыштӧ Щегловмыт еш дене палыме лийынна. Нунын деке мийымына годым Вениамин Юрьевич ден Надежда Васильевна пӧртышт ончылно сурт сомылкам ыштат ыле. – Йӱдшӧ-кечыже пашам ыштена, вет ялыште вес семынже огешат лий. Теве эше ачамын, Юрий Матвеевичын, тошто суртшо воктене у пӧртым чоҥена, – мане пӧръеҥ. Суртоза дене, кудывечым ончен лекмеке, пакчаш ошкылна. Садыште чернослив, нарынче сливе, эҥыжвондо кушкыт. Вениамин Щеглов пакчаштыже маньчжур пӱкшым шынден. Ялыште тудым шкешотан селекционер семын палат, молан манаш гын пӧръеҥ у, тиде кундемыште кушдымо кушкылым шында. Суртоза тыгак ятыр ир олмапуш прививкым ыштен. Ик вондыш вич тӱрлӧ урлыкым прививатлен. Чыла олмапужат иланен. Михаил СКОБЕЛЕВ, Лидия ШАБДАРОВА М.Скобелевын фотожо

СВО гыч серыш «Ме тӱрлӧ улына, но изак-шоляк семын илена» Мемнан патыр землякна-шамыч специальный военный операцийыште шкеныштым чын патриот семынак кучат, кочана-влакын пашаштым шуят. Передовойышто, илышыштым чаманыде, кажныже элнан лӱдыкшыдымылыкшым арала. 2022 ийыште ме частичный мобилизацийыш логалынна. Военный подготовкым Ульяновск олаште эртенна. А кызыт кеч тӱрлӧ верыште кредалына, но южгунам ик кундем гыч улшо-влакым корнышт иктыш ушна. Тыгай вашлиймаш годым шочмо мландым куан дене, мӧҥгӧ гыч толшо уверым порын шарналтена. Мутат уке, эреак военный действий эртыме зонышто лияш куштылгыжак огыл. Чылажат вашкерак чарныже манын шонена. Боевой йолташ-влакым йомдараш моткоч неле, мӧҥгым шарналтен, йокрокланена. Тыгодым ме умылена: шкенан Отечествын ончыкылыкшо верч виян пӧръеҥ-шамыч шогышаш улыт. Тидын шотышто землякна-влаклан тау, нуно мыланна чот полшат. Таче мый мемнан ик боевой йолташна дене палдарынем. Дмитрий Суворов – поро чонан, ойыртемалтше рвезе. Тудым йолташыже-влак пагалат. Дима воктенысе улшо йолташыже-шамыч верч тургыжлана. Мыланна чӱчкыдынак теве мом ойла: «Ме чыланат тӱрлӧ улына. Кажныжын шке койышыжо, шонымашыже, но ме чыланат иза-шоляк семын илена». Дмитрий эше чӱчкыдынак «Шкенан-влакым огына кудалте», – манеш. Рвезе армийыштат служитлен, мобилизацийыш логалын. Тудо 1996 ийыште Морко район Нуръял Корамас ялеш шочын-кушкын. Икшыве-влак кокла гыч кугурак лийынат, шольыж ден шӱжарже-влаклан полшен, кугурак-шамычым пагален. Арын кыдалаш школым тунем лекмекыже, пашам ышташ тӱҥалын. 2014 ийыште армийыш каен, а службо деч вара шочмо кундемышкыже пӧртылын. Пашам йӧратыше рвезым ялыштыже веле огыл, районыштат пагаленыт. Специальный военный операций тӱҥалтыш гычак, манаш лиеш, Луганск кундемыште службым эрта. Россий президентын указше дене лӱддымылыкым ончыктымыжлан Жуков да "За боевые заслуги" медаль-влак дене наградитлалтын. Дмитрийым мӧҥгыштыжӧ ача-аваже, пелашыже, родо-тукымжо вучат. Ме, землякше-влак, тыгай боевой йолташна дене кугешнена. Элнан ӱшанле эргым куштымыштлан ача-аважлан кугу тау. Кунам воктене тыгай йолташ-шамыч улыт, ӱшанена: ме сеҥена! 12.12.2023 ий, Риф Файзрахманов Елена Эшкинина ямдылен

Константин Иосифович Косачев – россий кугыжаныш деятель, сенатор, Федераций Совет Председательын алмаштышыже. Тудо Российын Федераций Советыштыже Марий Элын правительствыжым 2015 ий 21 сентябрь годсек представлятла. Корно раш – Йӱдвелыш Кеҥеж. Икте Европыш корным куча, весе – Мальдивыш але Таиландыш. Сочиште калык тич.. А сенатор Косачёв вес корным ойырен налын. 3 август. Шошо сессий пытен – Российым ончен коштмо жап! Касвелыштат, Эрвелыштат да Кечывалвелнат лийынам. Корно раш – Йӱдвелыш!!! Константин Косачёв РФ-ын 16 субъектше гоч эртен, 9100 километрым шеҥгелан коден, Йӱдвел полярный кругым ныл гана вончен. Текстым «Российская газета-Неделя» изданий гыч налме Фотом Константин Косачёвын соцкыл лаштыкше гыч налме Павел Шакиров ямдылен 🖇 Тичмаш материалым комментарийысе ссылке почеш эртен лудса

27 сентябрьыште В.И.Ленин лӱмеш тӱвыра полатыште самодеятельный композитор, мурызо Виктор КОМАРОВЫН «Мыланем 720 тылзе» лӱман концертше лиеш. Тудо 60 ияш лӱмгечыжлан пӧлеклалтын. Концертыште пелашыжлан лӱмынак возымо мурым мураш сӧрыш. Йӧратыме мурызына да тудын пелашыже нерген, ссылке почеш пурен, лудаш лиеш. https://газетамарийэл.рф/35-iyash-ulmemla-chuchesh/ А.Байкова Авторын да В.Поликарповын фотошт

Кажне кечын пукшат… Кодшо шуматкечын Йошкар-Олаште суртдымо-печыдыме-влаклан кочкышым пуэдыме эше ик точко почылтын. Ынде Самырык-влакын «Мяак» толкынышт нужна еҥ-шамычым кажне кечын шокшо кочкыш дене сийлат. Тидын нерген тудын еҥже-влак соцкыл лаштыкышт гоч увертареныт. У точкыжо 4-ше №-ан поликлинике воктене шочмо, кушкыжмо, вӱргече, изарня, кугарня да шуматкечын ышта, 18 шагатат 30 минутлан кочкышым пуэдаш тӱҥалыт... https://газетамарийэл.рф/kazhne-kechyn-pukshat/

Марий Элын Избирательный комиссийже105-ше заседанийыштыже Марий Эл Республикын кандашымше созыв Кугыжаныш Погынжын республиканский сайлымаш округышто сайлыме депутатше-влакым регистрироватлен Марий Эл Кугыжаныш погыныш партийный списке почеш чылаже 13 депутат эртен. 🖇Спискым комментарийысе ссылке почеш эртен лудса 📸Фотом Марий Эл Избиркомын соцкыл лаштыкше гыч налме

Марий Элыш – святыньым кычалын Тиде кечылаште Марий Элыште Российысе Спас» телеканалын войзышо тӱшкаже пашам ышта. Тудо «Святыни России» передачылан Марий Элысе святыне-влак нерген материалым чумыра. Съёмочный группо Йошкар-Олаште, Ежовышто, Волжский районысо Пӧтъялыште, Волжск ден Козьмодемьянск олалаште, Юриныште, ты районысо Сумки селаште да икмыняр моло вере лиеш. Ты проектын кажне серийже элнан тӱрлӧ регионысо православный святыньыже-влак дене, кушко паломник-влак лӱмын коштыт, палдара. https://газетамарийэл.рф/marij-elysh-svyatynym-kychalyn/

Чоным ырыктыше ончер Йошкар-Оласе Калыкле-прикладной сымыктыш тоштерыште «Виче мастар» ончер почылтын. Тудым Киров областьысе П.Алабин лӱмеш краеведений тоштерын фондшо гыч кондымо. Выставкыш ХIХ-ХХ курымласе экспонат-влакым чумырымо.  Михаил СКОБЕЛЕВ, Лидия ШАБДАРОВА

Палашда! Чытышда ситыже 26 сентябрь гыч Йошкар-Ола–Уржум кугорнын ик ужашыже (Токтайбеляк деч ончыч 71-ше километрыште) Немда эҥер гоч кӱварым уэмдымылан кӧра петырналтеш. Контракт дене келшышын, олмыктымо паша 2025 ий ноябрь марте шуйна. Тудым ыштен пытарымеш корно петырыме лиеш. Тиде жапыште Одывлак – Кужэҥер – Параньга йыр корно дене да Кужэҥер посёлко, Кужэҥер – Токтайбеляк автомобиль кугорно дене кудалышташ перна. Тидын нерген уверым да корно маршрут картым Марий Элын транспорт да корно озанлык министерствыжын сайтыштыже вераҥдыме. Лидия СЕМЕНОВА

Марий Эл гыч - кумытын «Российын миссше – 2024» моторлык конкурсын финалже 5 октябрьыште Москошто лиеш. Марий Эл гыч тушко кум ӱдырым ойырен налыныт. Тиде – Йошкар-Ола гыч 18 ияш Екатерина Кожевникова ден 21 ияш Анастасия Меркурьева да Козьмодемьянск гыч 18 ияш Валерия Лебедева. Екатерина модельный бизнесыште икмыняр ий шкенжым терга, а Анастасия тений гына модельный агентствыш кастингым эртен. Нуно кумытынат Татьяна Козутон модельный школжын тунемшыже улыт. Ушештарен кодыман, ты конкурсышто сеҥымаш «Тӱнян миссше» ден «Тӱнямбалын миссше» конкурслаште шкем ончыкташ йӧным почеш. Кодшо ийын эртыше ты конкурсышто Марий Эл гыч Анастасия Антонова национальный костюмым ончыктымо этапыште сеҥен. Снимкылаште: Е.Кожевникова, А.Меркурьева, В.Лебедева Фотом ӱдыр-влакын соцлаштыклашт гыч налме https://газетамарийэл.рф/marij-el-gych-kumytyn/