Бала кезде бір өзбек, бір орыс көршіміз болды.
Екеуінде де бір қыз, бір ұл, бізден 4-5 жас кіші. Қой қайыруға да, сиыр айдауға да бәріміз бірге шығатынбыз, балық аулау мен көлге шомылуға да бірге "қашып" кететінбіз.
Осы біз солардың орыс не өзбек екен демеппіз. Бәріміз тек қазақша сөйлейтінбіз. Қарнымыз ашса, кімнің үйі жақын, сол үйге емін-еркін кіріп, нанын жеп, өрігін ұрлап, жүзімін жұлып, алмасын алып кете беруші едік. Кәдімгі қазан-ошағы, ыдыс-аяғы аралас, тілеуіңді тілеп, жағдайыңды біліп отыратын, ағайыннан да жақын жандарға айналып кеткен көршілерміз.
... Әлі есімде, бір күні орыс тілі сабағынан үйге берген тапсырманы орындай алмай қойдым. Әйтеуір бір сөздің орысшасын таба алмадым. Алып-ұшып төрт үй ары тұратын Гена ағайдың үйіне бардым. Кристина мен Петяны айқайлап шақырып алдым. Ол кезде бетон қоршау деген жоқ, ауыл үйлері шарбақпен қоршалады. Терезеден көрсе керек, олар да шарбаққа қарай шауып келді. Әлгі сөздің (есімде жоқ) орысшасын сұрадым. Кристина ойланған кейіп танытып аспанға қарады, сосын жер шұқыды. Петя тұр басын олай бір, бұлай бір шайқап, есіне түсіре алмай. Бір кезде:
- Ой, шш, бұл сөздің орысшасы не еді-ей, оны орыстардан сұрамасаң мен қайдан білейін? -деп қойып қалды.
- Біз үйде де қазақша сөйлесеміз ғой, - деді көзі жыпылықтаған Кристина.
... Бүгін сол Петяны кезіктіріп қалдым. Үп-үлкен жігіт болған. Жетегінде 5 жас шамасындағы ұлы, құшағында 2 жастағы қызы. Жанында сұлу келіншегі. Екеуі де жағдайымды, ауылдағы ата-анам мен бауырлардың халдарын сұрап, бәйек болып жатыр.
- Бұл кісі менің жерлесім: бала кезде бірге ойнап, бірге өскен, ата-аналарымызбен аралас болған адамдар. Сәлем сал! - деді ол келіншегіне таза қазақ тілінде.
Келіншегі де өзі сияқты қазақшаға ғана емес, біздің дәстүрімізге де қанық сияқты, иіліп сәлем бергенін қайтерсіз?! Сондай риза болдым.
- Әдейі қазақша білетін, қазақы ауылда өскен қыз таңдадым, - деді Петя. - Қаланың келте шорты киіетін, сәлеміңді білмейтін қыздарымен тіл табыса алмадым. Бала кезден ауылдың әдемі әдебін көріп, бойыма сіңіріп өскен соң ба, ондайлармен сөзім жараспады. Келер жылы ауылға көшіп барсам ба деп отырмын. Сиыр бағып, сүт сауып, май шайқап, алма-жүзім егіп, балаларды да еңбекке баулысам деп едім.
... Кристина қазақ отбасына келін болыпты. Төрт баланың анасы дейді. Петя да қалада үйі бола тұра асты қазан-ошаққа пісіріп, (ауылда газ жоқ қой) шайды самаурынмен ішетін ауылды сағынатынын айтып, сонда көшуге ниет етіп отыр екен. Олармен қоштасқан соң үйінде шүлдір-шүлдір етіп, отағасымен де, балаларымен де тек орысша сөйлесетін, енесінің алдында да шорты киіп жүретін бір таныс еске түскені. Оған қарағанда орыс та болса Петя жаныма жақын сезіле ме, қалай өзі...
Роза БЕКЕТАЕВА
Присоединяйтесь к ОК, чтобы посмотреть больше фото, видео и найти новых друзей.
Комментарии 6
Құлын тайдай бірге өскен..
Шыбықты ат қып мінгескен..
Өз тіліңде тілдескен?!