ХИКӘЯ, 3 ӨЛЕШ
Әсхия Абдуллина-Костикова
Бала тудыру йортыннан кайтуга бәбигә исем кушу мәҗлесе оештырып, мулла чакырып, азан белән Айдар исеме куйдылар. Бала әллә тудырганда бераз авырлык килгәнгәме баштагы айларында бик нык елап интекте. Көнне-төн белән дә бутагандыр инде, әллә эчендә берәр җире авыртып кулга алганны да салганны да белмичә зәңгәрләнгәнче елады да елады. Аның белән йокысыз төннәр Гөлсемнең дә сәламәтлегенә ару гына тәэсир итте – хатын ябыгып, коры сөяккә калды, ахырда балага ими сөте дә бетте. Кайнанасына бердәнбер улының беренче баласы бик кадерле кебек тоелса да, бала елак булгангамы, ул аннан бик тиз ялыкты. Сүз арасына сүз кыстырып, безнең нәселдә булмаган хәл, шул хәтле елак бала буламени, җен алыштыргандыр аны, дип тә, Гөлсемнең бөтен нәсел-нәсебенең, туган-тумачасының бала-чагаларына тел тидерүдән дә чирканмады. Күрше-тирәләрендә кәҗә тотучылардан сөт алып, баланы шулай туендырырга туры килде Гөлсемгә, чөнки балага ясалма сөт эчергәч, бала кып-кызыл булып тәне бүртенде, аннары кычытынып тагын елый башлады. Алты ае тулып киткәч кенә Айдар елаудан туктады, әмма шушы ярты ел эчендә ул инде әнисенең кулыннан балигъ булганчы төшмәслек хәлгә килеп береккән иде. Зариф эштән кайткач та баланы кулына алып уйнатырга, сөйләштерергә тырышса да, бала аңа нишләптер гел ятсынып карады. Вакыт узган саен баласы итәктән төшәр, әбисе, әтисе белән вакыт уздырыр дип хыялланган Гөлсем тәмам аптырашка калды. Айдарга бер яшь тулгач, Гөлсем эшкә чыкты, ире белән киңәшләшеп, баланы үзенең әти-әниләренә илтеп куйдылар, чөнки кайнанасы карамыйм дип кистереп әйтеп куйды. Хәер, Зариф әнисенең характеры кешечә түгел икәнен болай да бик яхшы белә иде, әмма оныгы туу характерын үзгәртер дигән уе гына барып чыкмады. Айдар әби белән бабасында атна буена торып, җомга кич аны Зариф килеп ала торган булды. Зариф белән Гөлсем басулардан кайтып кермәделәр, берсе – кырларны сөрсә, тырмаласа, утыртса, икенчесе көзге уҗымнарны, язгы сабаннарны тикшереп басу-кырлар буйлап дистәләгән чакрым юллар узды. Ярата иде Гөлсем басу буйлап йөрергә. Нинди генә явымлы я болытлы көн булмасын, ул басу капкасына җитүгә баш очында, әллә кайда күк йөзендә тургай җыр суза башлый, әйтерсең лә, Гөлсем, мин сине көттем дип сайрап җибәрә. Юл читендәге әрсез үләннәр дә аңа сәлам биреп, аягын кытыклыйлар, иртәнге чык тамчылары нәни яфраклар өстендә елмаешып аңа күз кысалар. Яңгыр артыннан басуларның очсыз –кырыйсыз офыкларын тоташтырып салават күпере чыга, Гөлсем шушы сихри матурлыкларга хозурланып , үзе дә сизмәстән җыр суза. Шулай матур гына эшләп яшәп ятканда илдә аңлашылмый торган үзгәреш җилләре пәйда булды. Кибет киштәләрендә моңарчы тулып яткан шырпы, сабын кебек тормыш кирәк-яраклары юкка чыкты, шикәр, тоз да бер мәлне дефицитка әйләнгәнне сизми дә калдылар. Әмма иң аянычы, эшләгән хезмәт хакларын колхоз түли алмый башлады. Кибет киштәләре генә түгел, алдан бераз мал җыеп, запас он мазар алмаган гаиләләрнең ипи салырлык та оннары калмады. Бу хәлләрдән бигрәк тә хатын-кыз аптырашта иде. Шуның өстенә, хезмәт хакы урынына кибетләргә аракы кайтарып тутырдылар һәм телисеңме-теләмисеңме исемлек белән шул аракыны ящиклап гаиләләргә өләштеләр . Икесе дә басу эшендә булган Зариф белән Гөлсемгә 12 ящик аракы бирделәр. Аракы алдык дип, билгеле, берсе дә эшен туктатмады, әмма келәттә шуның кадәр акбаш утырганңа Зариф та тыелып кала алмады, башта ардым, өшеп кайттым дип кичке аш алдыннан гына кабыштырса, соңрак, баш чатный дип, иртән эшкә чыгып киткәнче үк “баш төзәтә” торганга әйләнде. Басуларның да рәте-чираты калмады, ул арада каяндыр өлгер хуҗалар барлыкка килеп, колхоз малын, фермаларны, басуларны ниндидер җаваплылыгы чикләнгән оешмаларга таратып бетерделәр. Авыл башындагы чучка, тавык, каз фермалары, савым сыерлар машиналарга төятелеп, ит комбинатларына озатылды.
Аягында нык басып тора алганнар, туган-тумачасы ярдәме белән себер якларына эшкә юлланды. Җирне, картаеп баручы әнисен, туган йортын ташлап чыгып китәргә Зарифның йөрәге дә батырчылыгы да җитмәде. Гөлсем, район үзәгенә каравылга булса да эшкә керер идең, әйдә күченик дип сүз әйтеп караса да, инде аракыдан күзләре төссезләнгән, кырынмаган битен сакал-мыек баскан Зариф, юк дип башын гына чайкады.
Еллар шулай болганчык көе уза торды.Әмма кулы эш белгән кеше ул чагында да югалып калмады, Яше инде шактый булса да Гөлсемнең әтисе балта остасы Хәкимгә эш табылып кына торды. Кибетләрдә дефицитка әйләнгән шкаф-өстәлләр, урындык-кәнәфиләргә заказлар күбәйде, авылда читтән килеп йорт салдырырга теләүче “калын кесәле” абзыйлар пәйда булды. Аның хикмәте авылның мул сулы, балыклы елга янында , шулай ук илнең себер ягына илтә торган олы юлдан ерак булмавында иде. Хәленнән килгәнчә ата-анасы кызы белән киявенә ярдәм итеп торды. Бер булмаса булмый икән шул, Зариф исерек көе басу читенә тракторы белән әйләнеп капланып, әллә аңын югалтып, әллә йоклап китеп бик озак юл читендәге карлы суда ятып чиргә сабышты. Ул чагында Гөлсем инде дүрт яше тулырга барган Айдар янына Алмазны алып кайткан иде. Чарасыздан ничара, ни эшләсен-бичара, дигәндәй, ничек булса да тормышны алып барырга тырышты Гөлсем, урын өстенә калган Зарифны карауны кайнанасына калдырып, ими баласы Айдарын күтәреп район үзәгенә юл тотты. Авыл башына чыгып юлаучы машиналарга хәйран вакыт кул күтәреп басып торса да кулына бала тоткан хатынны утыртырга теләүче бик табылмады. Ниһаят, янына җиңел машина килеп туктады. Шофер янында утыручы яш кенә хатын тәрәзә пыяласын төшереп, ай, Аллакаем, әллә син инде бу Гөлсееем? дип сузды.- Миша, эта моя одноклассница, Гульсумка. Баа, как ты изменилась, я тебя сразу и не узнала даже. Первенец наверное да, мальчик или девочка, дип сорау арты сорау тезде, ул арада шофер кеше, арткы ишекне ачып Гөлсемгә җайлап утырырга булышты.
-Икенче улым. Беренчесенә дүрт яшь инде. Ике улым бар. Ә синең хәлләр ничек, Айгөл, дип Гөлсем дә үзен кызыксындырган сорауны бирде.
-Ты что, в таком возрасте мне еще рано рожать. Счас буду еще хомут на шею одевать. Нам и так хорошо, правда Миша?
Ир дәшмәде.
-Бу ирең түгелмени?
Бу юлы Айгөл татар телендә кыска гына итеп җавап кайтарды.
-Юк инде, син нәрсә. Акчасы, машинасы бар, миңа бәхет өчен шул җитә пока.
Тагын русчага күчеп, Гульсумка, ты же вроде Салиха любила, помнишь или уже забыла его. А что ты так резко замуж то выскочила. Вроде любила по настоящему, а? А он почему- то после армии вообще домой не приехал. Сразу говорят на Дальний Восток уехал. Говорят, большим военным начальником стал.
Гөлсем авыр сулап куйды, кулындагы баласы көйсезләнмәсен дип селкетеп, тәрәзәгә карап бара башлады. Район үзәгенә килеп җиткәнче Айгөл дә башка сораулар биреп тинтерәтмәде. Машинадан рәхмәт әйтеп төшеп калгач кына Гөлсем, күз яшьләренә ирек бирде. Районның социаль ярдәм үзәгенә кереп үзләренең тормышын сөйләде, берәр кая эш табып бирүләрен үтенде. Алдагы еларда район күләмендә алдынгылар рәтендә барган хуҗалыкны барысы да белә иде, шул исәптән Зарифның да үз эшенең чын остасы булуын әле районда онытмаганнар булып чыкты. Ирен хастаханәгә салып дәвалау турында табиблар белән киңәшләшкәннән соң шушы идарә җитәкчесе Гөлсемгә авылдагы карт әби-бабайларны карау эшен тәкъдим итте. Үз кайнанасы, Зариф, ике бала өстенә тагын авылда караучысыз калган өч әби Гөлсем карамагына күчте. Алай да эш арасында балаларын да, хәйран гына дәваланып чыккан ирен, үзләренең мал-туарларын карарга да вакыт тапты. Әмма Зарифның чире үпкәсен нык ашаган булып чыкты, уллары Айдар беренче классны бетергәндә ул күзләрен мәңгелеккә йомды. Улыннан соң кайнанасы да урын өстендә бер еллап авырып ятканнан соң ахирәткә китеп барды. Кайнанасының кырыгын уздырганчы Гөлсем авылда торды, әти-әнисе белән киңәшләшеп, районга күченергә карар кылды. Бу вакытта авылда инде башлангыч мәктәп тә эшләүдән туктаган иде.
Район үзәгендә ике бала белән ялгызына тормыш алып бару авыр булса да Гөлсем бирешмәде, шул ук социаль ярдәмгә мохтаҗ әбиләр саны монда тагын да күбрәк, бер өйрәнгән эш дип, шәһәрнең бер башыннан икенче башына йөреп аларны карады, торак-хуҗалык идарәсенә ишек алды себерүче булып өстәмә эшкә урнашып аерым бүлмә алуга да иреште. Пенсия яшенә якынлашканда ул инде үзенең бер бүлмәле фатирында яши иде.
Улларының үсеп җиткәнен сизми дә калды Гөлсем. Айдары кечкенә чагында әллә бик күп елаганга бик моңлы бала булды, шәһәр мәктәбендә укый башлагач, укытучылары аның матур моңлы тавышын сизеп алып, музыка мәктәбенә йөртергә киңәш итте, бик кыйммәт булса да Гөлсем улына хәтта баян алып бирде. Мәктәпне һәм музыка мәктәбен бетерүгә улы район мәдәният идарәсенә агитбригадага эшкә урнашты, вакыты җиткәч хәрби хезмәт бурычын да үтәп кайтты һәм гаилә корып җибәрде. Озакламый Айдарның да гаиләсен түгәрәкләндереп уллары Илгиз туды. Бәлкем тагын кыз да алып кайтырлар дигән хыялы гына тормышка ашмады Гөлсемнең – килен икенчесен алып кайтуга каршы килде. Кечкенәдән әби-бабасы белән үскәнгәме, Айдар беркайчан да әнисенең тормышы, аның бүгенгесе, киләчәге белән кызыксынмады, үз көенә яшәде, музыкаль коллектив оештырып җибәреп туйларда, концертларда катнашып акча эшләде, тормышын алып барды. әнисенә дә ара-тирә бик сирәк кенә кергәләп йөрде.
Ә кече улы Алмаз кызлар кебек гел әнисе янында бөтерелде. Армиягә барыр алдыннан да әнисе янына караватка килеп ятарга кыенсынмый иде. Алмазны зур шәһәр-башкала үзенә тартты. Армиядән кайтканнан соң озак та тормыйча Казанга китеп урнашты, шунда гаилә корып яши башлады...
...Гөлсем кабартырга куйган коймак камырына күз салды. Ий, Аллакаем, өстәлемне көйлим дә, кереп чыгыйм әле күршекәйләремә. Бер яры чыгып китә күрмәсеннәр. Рәхәтләнеп сөйләшә-сөйләшә утырырбыз, Алла боерса дип, өстәл көйли башлады.
ДӘВАМЫ БАР.
Присоединяйтесь к ОК, чтобы посмотреть больше фото, видео и найти новых друзей.
Комментарии 33