Предыдущая публикация
Сызланулар бик күбәйде,
Көйсезләнде һава торышы.
Җил-давыллы болытлы көн –
Җирдә хәзер кеше тормышы.
Яңгырлардай бертуктамый
Күз яшьләре көн дә коела.
Үтерештән тулган дөнья
Һич үзгәрмәс кебек тоела.
Өметләрнең очкыны юк,
Киләчәкне болыт каплаган.
Әйтерсең лә, фани дөнья
Чиксез нәфрәт безгә туплаган.
Үтерешләр тетрәндерми,
Күрмәмешкә күзләр өйрәнде.
Туганнарың хәзер күрсәтәләр
Дошманнардан элек күргәнне.
Сызланулар бик күбәйде,
Ансыз үтми кебек бер көнем.
Сызланулар – йөрәк ярам,
Һич төзәлмәс ярам ул минем.
Сызланулы бу дөньяда
Кешеләрдә күрәм кырыслык.
Үткәннәрне кат-кат уйлап
Йөрәгемә эзлим тынычлык.
Следующая публикация
Комментарии 5