Миндә генә шундый уйлар микән?
Уйлый микән шулай бүтәннәр:
Киләчәгем бик өметсез кебек,
Күңелемә якын үткәннәр.
Уйланам да, үткәннәргә кайтам,
Тарихларда калган илемә.
Вакытны да җиңәм, ашкынганда
Тәпи басып киткән җиремә.
Сынауларын язмыш кинәт бирә,
Бәхет диңгезендә йөзгәндә.
Яшәп була , нәсел тамырларын
Туган якта итеп сизгәндә.
Минем башта моңсу уйлар кайный,
Өзгәләнә җаным, сагынып.
Башымдагы моңсу уйларымнан
Өмет сүнә, китми кабынып.
Сагыш биргән уйлар арасында
Өметем бар җанга үрелгән.
Ул өметтә җырдан калган сүзләр
Киткән чакта туган җиремнән:
“Язмыш илтте яшьли еракларга,
Йөрәк ничек ярсып типмәсен!
Читтә яшәп,читтә картаерга
Бер кемгә дә насыйп итмәсен”...
Хәтеремдә, милли моңлы җырны
Әнкәй миңа, елап, җырлады.
Шуңадырмы читтә күңелемне
Сагыш ялкыннары чорнады.
Өмет өзми яшим, язмыш мине
Илтер, диеп, туган ягыма.
Уйларымда кайтам авылыма,
Яшь әнкәйле бала чагыма.
Уйнап үскән минем туган нигез
Хәзер инде җиргә тигез лә...
Язмышымнан түгел, ялгышымнан
Юлым ябык туган нигезгә.
Өнемдә дә туган якларыма
Яңа чикләр юлны бикләгән.
Мин генәме чит-ят җирләр таптап,
Үз бәхетен үзе чикләгән?!
Җир шарының төрле почмагында
Өзгәләнгән татар азмы соң?!
Күп гасырлар аша кабатлыйм мин
Илсез калган татар язмышын...
Присоединяйтесь к ОК, чтобы посмотреть больше фото, видео и найти новых друзей.
Нет комментариев