Предыдущая публикация
Ҳодиса ашк мешавад, манзара гиря мекунад,
Фосила оҳ мекашад, хотира гиря мекунад
Вой, ба ин замон чӣ шуд, мулк чӣ шуд, макон чӣ шуд?
Кӯҳнаҷаҳон ба ҳоли худ шашдара гиря мекунад.
Кишваракон ба сӯи ҳам тиру гулӯла мезананд,
Қалби замин даридааст, бефара гиря мекунад
Чӯли Ироқ хастаҷон аз хатари самуми ҷанг,
Шаҳри фаранг мотамӣ, пайкара гиря мекунад
Обу ҳавои Суриё ғаркаи хуну нафт шуд,
Мӯъмину кофари бараш яксара гиря мекунад
Ғуссаи Шарқу Ғарб гашт оташи хоки Украин,
Рӯд аланга мезанад, шаршара гиря мекунад
Модари русро чӣ ғам, Маскави синааш бисӯхт,
Кӯдаки курдро кӣ кушт? Анқара гиря мекунад!
Хонаи офият куҷост, дар ҳама даҳр, Озарахш,
Панҷа ба дар, ки мезанӣ, панҷара гиря мекунад.
Озарахш
Следующая публикация
Комментарии 2