Ад нас, людзей, не шмат чаго залежыць,
Аднак залежыць, як ты ні круці.
Сябе ад часу проста не адрэжаш,
А ў часе кожны змушаны расці.
Ад нараджэння ўверх па сантыметры,
Па літары, па лічбе, па жыцці,
Па спёцы, пад дажджом і супраць ветру,
Наканавана кожнаму расці.
Інакш — якая-небудзь катастрофа,
Ці катаклізма (чорт яе бяры)...
За што Хрыстос загінуў на Галгофе?
"Распні!" — крычалі людзі як звяры.
Яны яго ўспрымалі толькі ў целе,
Нібы такіх было на свеце шмат.
За што "распні"? Расці больш не хацелі.
І рукі вымыў чысценька Пілат.
Як жыць душой вучыў Хрыстос зямлянаў,
Што значыць ведаць веру і любоў.
Аднак прасцей, хаваючы заганы,
Залюбавацца "залатым" сабой.
І хай сабе. Ды толькі паміж іншым
Прайдзіся па жыцці сваім наўпрост,
Адчуй: тваёй душы не трэба ніша,
А ўвесь прастор і твой духоўны рост.
Расці ўвесь час з падмогай мудрых кніжак,
Нябеснай музыкі і велічных карцін.
Плаці за хараство добром без зніжак,
Бо ты ў сваёй душы адзіны сын.
Тамара МАЗУР
11.07.2024
Присоединяйтесь к ОК, чтобы посмотреть больше фото, видео и найти новых друзей.
Комментарии 1