Предыдущая публикация
ЭРЯВИ ВЕСЕНЬ ВЕЧКЕМС🍀🍀🍀
Маень 8-це чистэ Маруся бабантень топодсть 93 иеть. Велесэ сонензэ пшкалить Маруся патяй ды Маруся бабай. Мария Алексеевна Ануфриева чачсь ды эри Орданьбуень Кеченьбие велесэ. Эрьва кодат шкат савсь тензэ неемс: эйкакшпингензэ салызь войнась, вачочись ды нужачись. Корты, а содыяк, кода ломантне цидярдсть? Паряк, ансяк Пазось ванстсь сынст. Сонзэ эрямодо ули меленек ёвтнемс ловныцянок туртов.
– Семиясо ульнинек кото эйкакшт. Тетянь саизь войнав 1942 иестэ Роштовань каршо, январень 6-це чистэ. Авам якась ильтямонзо Чувашиянь Шумерляв. Тосто самсто пурнымизь каштомлангс. Кирвазтсь толнэ, лампадкань кондямо, ды лайшезевсь. Минь карминек вете вайгельсэ рангомо (котоце эйдесь пек вишкинель), кодаяк а лоткавтано. Вельть якшамоль. Ней истят якшамот а эрсить. 1943 иестэ сась тенек конёв тетянь кулявтомо ёмамодо. Шкань ютазь шабрасонок эриця вейке цёра ёвтнесь, кода сынь вейсэ фронтс понгонесть, тетянь пек сэредсь желудказо. Сон сыргась паксява ютамо, бажась муемс кодамояк кельмезь якстерькай, паряк, мери, ёжом витеви. Сон тусь, а те шкастонть ялгатне понгсть минсенек ёнов. Теде мейле кияк эзизе нее, паряк, паксяс кулось… Седе тов зярдояк ды мезеяк эзинек марсе тетядонок.
Авань кедь лангс кадовинек котонек. Мезе парось, ульнесь скалонок. Ансяк скал вийсэ эринекак, эзинек куло. Мон 13 иесэ карминь якамо вирев салазкесэ тарад мельга. Сестэ делянкат ульнесть вирьсэ. Авам яксесь лия велев кемень кевердеме. Маштыль машинкасо стамо кофтат-юбкат. Ярмаконь таркас ломантне пандсть ловсосо ды ойсэ. Истя тримизь-кастымизь.
Кудотне якшамот ульнесть, мезеяк арасель, нужачи. Ярсамс а мезде. Ялаксом колхозсо роботась, макснесть тензэ 600 г почт, авань эйсэ эзть лово, миненек, эйкакштнень лангс – эрьвантень 100 граммат почт. Пенчкесэ кайсесынек столь ланга, кельсэ нолсесынек почттнэнь. Тундонь шкане паксяв колозонь вешнеме-пурнамо яксинек. Весть пурнатано, вантано, арды начальства тандавтомонок. Те войнань шкане. Вешизь мешоккем – а максан. Прынь, кирдян, а максан. Вейкесь лишме лангсо ласте, омбоцесь валгсь. Каяк, мери, тензэ локшонедьсэнть кедь ланга. Чувтонь локшонедьсэнть кармасть кедь ланга чавомон – нолдыя мешоккенть… Авардинь, авардинь ды чавосто сынь. Вана истя нарьгасть. Сынь эстесткак эзизь сае, ковгак ёртызь, – ледстни эйкакшчидензэ Маруся баба.
Од тейтерекс улемстэ сон колмо иеть ардтнесь Ивановань ёнксов торфонь таргамо. Туильть март ковсто, мекев велявтыльть августонть прядовомсто. Тосо эрьва чи максыльть 200 г кши, столовойсэ андыльть пинемень вецана кашинеде. Ялатеке пекесь эзь пешкеле. Важодсть стакасто, эрявсть ламо вийть. Вейке ковонь перть роботамодо мейле макссть тенст материят (коцт), весе од тейтертне ставтсть юбкат, эдь якамскак ульнесь а мейсэ. Зярыяксть макснесть коцт.
1949 иестэ Маруся сась торфонь таргамсто кудов. Чись цетьверькель. Недлячистэ састь чиявтомонзо. Цёранть сон а содылизе, ансяк сонзэ ёндо роднятне умок редизь эряза, важодемадо а пелиця, мазый од тейтеренть. Ковонь ютазь, 1949 иень сентябрянь 30-це чистэ, тейсть свадьба. Сеть шкатнестэ свадьбатне ютасть келейстэ, тешкстасть зярыя чинь перть. Одирьвась васняяк урнесь. Валске марто стясть – лиссть ялгацек лисьма лангс урнеме. Мейле сыргасть ниле-вете кудова родня ланга пачалкседе ярсамо. Васня икелест ютыть вишка эйкакшт, мейле уш сынь. Кудыкеле урнят – максыть каршо вал, нолдатадызь. Тонавтыльть эйсэст, кодат валт ёвтамс.
– Ней уш одирьвань урнемань кой-кона валтнэ стувтовсть:
«Бабай, панжтая, панжтая, ламо пиже дуган-ялган, бабай, примамак-примамак, пиже дуган, солдат полк ялган марто. А ялгинем Матаня, тедевене-венестэ пиже поланть неия, стака кулак прялксозо, чокшнень роса алксозо, валскень роса прялксозо-вельксэзэ».
Весе валтнэнь ёвтасыть – каршот натой авардить. Кудов сатано – сыть горнойть мирденть кудов саеме. Мейле истят валт ёвтат: «Верев кузниде, алов валгиде – мондень паро эзиде муе». Каршон мирдень ёндо Матрёна патям мерсь: «Пижине дугинем, тонь эйсэ учинек болотасто, эзинек валгоне алов, эзинек кузне верев».
Седе тов ялакскем, кона 1942 иестэ чачозь, кедте ветимим ды кортась: «Пиже дугай, адя, тиринь тетянь таркасо, Марусь, а, Марусь, тетянок сась, Паз икеле озадо. Аволь тетянь тюскесэ, аволь тетянь сэрнесэ. Ногай башкир озадо тетянь таркасо».
Свадьбадо икеле венчинек церьковасо Мишукова велесэ. Мирдень кедьсэ эрямсто кодамояк сюпавчинек арасель, кудосо ведраяк эзь ульне. Вейксэ ломанть вейсэ эринек. Мейле кудось каладсь, мирдень ялаксось тусь лияв эрямо. Минь зярс-бути каладосонть эринек, седе тов карминек стявтомо эстенек кудо, – ледстни Маруся баба.
Мирдезэ, Дмитрий Евдокимович Ануфриев, чачсь 1924 иестэ. Школасо прядсь 5 класст. 1942 иестэ саизь фронтов, ниле иеть воёвась, войнадо мейле колмо иеть служась пограничникекс. Колмоксть ранязель. Аштесь госпитальсэ. Ранась ульнесь лавтовсто саезь пильгепукшос. Мейле уш макссть тензэ инвалидэнь омбоце группа. Сон пингензэ перть роботась трактористэкс. Войнадо мейле свал сэредсь. Понгонесь больницяв, колмо ковт аштесь, врачтне стявтызь пильге лангс, теде мейле эштё комсь иеть эрясь. Кулось 1998 иестэ.
Ней Маруся бабась велесэст ськамонзо Ине Отечественной войнань ветеранонь дова. Сон важодсь колхозсо, ков кучсызь – тов моли. Ламо роботась паксясо: тикше ледсть, пултт сюлмсесть, тикшень штеметь вачкасть. А лововияк, зяро нарсесь реветь велесэ, сонсь однэ, ялатеке кенерсь роботамо седе покштнень ютксо. Ялгацек ардтнесть ревень нарамо мик Ульяновскоень ёнксов. Ардтнесь Ивановав коцт мельга, мейле велетнева микшнесь эйсэст. Валонзо коряс, эрьва косо ульнесь нужачи. Комсь иеть телень шкане мирдензэ марто кевердсть кемть, авась якиль веле-веле ланга кемень микшнеме. Кува ялго, кува ардозь.
– Паз илязо мере неемс войнань стакачитнень. Зяро ломанть кулость вачодо! Ледстнян, каршонок эриця эйкакшось чийсь тенек, вешсь ярсамс. Максомскак а мезе, венстинек вейке модамарь. Сон ютась мекев килангонь трокс ды... кулось. Нама, сюпавткак ульнесть. Неть эзть кулсе вачочиде. Мон вечкинь таргсеме апак сока паксятнестэ кирмалавонь ундокст, ярсынек сындест, пидесынек, валсынек ловсосо-алсо. Пекшень лопат пурнынек, костилинек каштомосо, томбилинек, пиже пуль эйстэст, ансяк ков молят, ярсатано. Вачо шкатнестэ тумонь сэрянь кшияк пансинек. Стакаль шкась, мезть кортамс. Ялатеке ломантне седе чевтеть ульнесть, паронь арсицят. Мукшность шка пеедькшнемс, пурнавомс вейс ды тешкстамс кенярксчитнень. Минек Кеченьбиесэ пек уш вечкилизь Петровонь чинть (июлень 12-це чи). Весе киштить ды морыть, гайни гармониясь, – ледстни икелень эрямонть Маруся баба.
Ануфриевтне чачтсть-кастсть сисем эйкакшт: Нина, Николай (сон уш кулось), Валентина, Раиса, Евгения, Татьяна ды Вера. Весе эрить ве ёнга. Ялатеке бажить самс варштамо аваст, лездамс эрьва мейсэ. Зярдо пурнавить вейс покш кудозост – те алкуксонь кенярксчи. Эрьвась анок нейке саемс аваст эрямо эстест, умок тердить. Ансяк Маруся бабанть арась мелезэ ковгак туемс. Сон пильге лангсо, лисни ушов кшинь рамамо, пирева якамо. Теевель бу ламо мезе, сыречись а нолды. 90 иес яксесь озномо церьковав. Ней о. Сергий сонсь сакшны тензэ кудос. Тень кис Мария Алексеевна ёвты покш сюкпря батюшкантень.
Маруся сырькаенть вейксэ нуцьканзо ды кевейкее нуцькань эйкакшонзо. Сон уш умок прапрабабушка.
– Минек род-племасо ськамон истя кувать эрян. Авам кулось 68 иесэ. Сазорон-ялаксон уш тоначисэть. Нать, эряви эрямс, зярс Пазось мерсь. Мезе ёвтавлинь лиятненень? Иляст сявадо сельменк лиянь лангс, эряви весень вечкемс ды нолдамс чумочист. Самай теде корты тенек Пазось озномань валтнэсэ. Эряви вечкемс, нолдамс лиянь чумонть ды Пазоськак нолдасы чумочить, – максы миненек превть Маруся бабась.
Татьяна Маторкина
#эрзя #эрзяньправда #саранск #мордовия
#жабино #ардатовскийрайон
Следующая публикация
Комментарии 3