Предыдущая публикация
Чеверын, 2024 ий!
Салам, 2025 ий!
Августа РОМАНОВА, Марий Элын калык артисткыже:
– 2024 ий мучко эре ӱшан дене иленам, чыла пуламыр вашкерак эртыже манын шоненам. Мый мӧҥгыштӧ, диваныште телевизорым ончен, жапым йомдарен киен ом керт. Сандене иктаж-кушко миен толаш кумыл эре лийын. Тений Чечняште, Осетийыште да Ингушетийыште лийым. Мыланем у верым, тусо калыкым ончаш моткоч оҥай. А могай тушто пӱртӱсшӧ сылне! Ала-молан курыкым пеш йӧратем. Шуко мотор фото-влакым ыштенам да соцсетьласе шке лаштыкышкем луктынам.
Эше Александр Акилбаевын «Пешком по республике» компанийже дене Морко, Курыкмарий, Марий Турек, Волжский, Звенигово районлаште лийынам. Кеч тиде верлам чыла палем (театрыште ыштыме годым спектакль да концерт дене коштмо), но ынде йӧршеш вес семын ончет. А пӱртӱсшӧ могай мотор! Мый пӱртӱсым пеш йӧратем. Адакше Кугу Какшан эҥер дене сплавыш миенам, Йошкар серыш кӱзенам, Чумбылат курык гыч мотор вершӧрым онченам. Марий Йӱштӧ Кугызан илемжымат ужынам!
Шушаш ий деч тыныслык илышым вучем. Шучко жапыште илена. Кастене малаш возат да эрдене кынелме шуэшак! Таза лияш. Кызытсе жапыште поснак черланаш огеш лий. Шушаш У ийыште чыланат кертмыда семын пиалан, лектышан паша веран лийза, шке шонымашкыда шуашак тыршыза, чондам тек йӧратымаш тул волгалтара. Эн тӱҥжӧ – яндар уш-акылым тыланем. Вет вуй пуалтын шонаш.
У ий нимом вашталтен огеш керт, ме шке гына тидым ыштен кертына!
Следующая публикация
Нет комментариев