Предыдущая публикация
Шекланыза: корно иян 🥶
Левырак, ночкырак, мардежан игече шогымо годым корно ияҥеш, камвозын эмганаш лиеш, садлан пеш шекланыман. Марий Эл Республикысе азалык аралтыш министерстве теве мом шотыш налаш темла.
Иян корнышто камвозын эмганенда, йыжыҥ коржеш, вуй пӧрдеш, сусыргышо вер чот коршта гын, травпунктыш але эмлымверыш кайыман. Больничныйым але сусыргымо шотышто справкым налман. Ты кагаз дене эмганымылан судыш исковой йодмашым возаш лиеш.
Тӱкалтында гын, сусыргышо вер ынже пуал манын, йӱштӧ компрессым 10-15 минутлан пыштыза. Кылмаш огыл манын, жапын-жапын кораҥдыза. Кокымшо кечылан пуалме ок эрте гын, тӱкымӧ верыш йодан сеткым ыштыза. Какарге кодын гын, сусыр верыш грелкым пышташ але ырыктыше мазьым йыгаш лиеш.
ЭМГАНАШ ОГЫЛ МАНЫН…
🧊йолчиемым чын ойырыза: пундашыже ынже мунчалте,
🧊ида вашке, ида курж, уло йолгопа дене тошкалза, йолым пулвуй тураште лушкыдынрак кучыза, тӱрыс ида вийныктаре,
🧊йол йымаке ончыза, иян вер деч кораҥ эрташ тыршыза але ий ӱмбач йолым шӱдыренрак ошкылза,
🧊кид ярарак лийшаш, неле сумкам ида нумал, кидым кӱсеныште ида кучо,
🧊камвочмеке, вигак ида кынел: сусыргенда але укем умылаш тыршыза, эртен кайыше-влакым полшаш йодса.
Следующая публикация
Нет комментариев