Предыдущая публикация
Тау, АВАЙ, ош тӱням пӧлеклыметлан!
🤱💕
Российыште ноябрьын пытартыш рушарнянже Ава кече палемдалтеш. Тений тудо 24 ноябрьлан тура толын. Эше ик амал лектеш авалан поро мутым каласаш, ончен куштымыжлан таушташ, чон почын кутыралташ, иктаж пӧлекым кучыкташ… Да шерге йоча жапым шарналташ.
💬 Владимир Матвеев, Марий Эл радион тӱҥ редакторжо, мурызо:
– Мыйын авам Галина Александровна Матвеева – Карай ялын шочшыжо. Кугу ешеш шочын-кушкын да шкежат вич йочам ончен куштен. Мый нылымшыже улам. Авам ӱмыржӧ мучко ялозанлык пашаште тыршен, тӱҥ шотышто – ушкал лӱштышылан. Йоча жапна ава пелен фермыште эртен: ушкалым ма, презым эре пукшаш коштынна, авайлан полышкаленна.
Тудо пеш проста, тыгодым пашаче, ласка кумылан. Эре ӧрам: тыгай тыматле, вожылшо (скромная) ӱдырамаш деч мыйже кузе шочын моштенам?
Шукынжо маныт да шкежат шижам: утларакше ачам вел урлыкыш лупшалалтынам, но авамын могырым ончалаш гын: тудын ачаже пеш уста гармоньчо лийын, кугурак-влак Чалай Элександрым кызытат кугешнен шарналтат. Кочам уста гармоньчо ыле гынат, авамын мурымыжым нигунам колын омыл. Тачат ом пале – кузе тудо мура? Кушталтымыжымат ӱмырыштем 3-4 гана гына ужынам чай. Тӱшка пайрем годым.
Кызыт авам – сулен налме канышыште. Тазалыкше начарлан кӧра ондакысе семын утыжым нигуш лектын ок кошт. Мый тудын просталыкше, ласка койышыжо дене кугешнем. Ондакысе илышнам, тудын паша жапшым шарналтен, ӧраш гына кодеш: кузе нуно ачам ден коктын вич йочам ончен-куштеныт, тыгодым совхозышкат коштыныт, сурт-оралтымат кученыт, вольыкымат шуко ашненыт, сад-пакчамат шынденыт... Садлан кызытсе ушем дене авамлан нимучашдымын тауштен илем. Тый улат, да тачат мый эше «эрге» улам.
Следующая публикация
Комментарии 13
Чынжымак,Чалай Васлий пеш тале гармонист ыле Карайыште.Шокталтен колта гын, уло кугу Карай мучко гармонь йу"кшо" шергылтеш ыле.Уныкажат талантан шочын.Таз залыкым,еш пиалым ешланда тыланем,Володя !