Предыдущая публикация
Юмо туныктен
Кужэҥер район Пекейсола калык кумалтыш йӱлам жапла да шуктен шога. Чыла пашам пытарымек, кажне ийын сентябрьыште тауштымаш сомылым шукташ кӱсотыш лектыт. Тений 15 сентябрьыште Пекейсола ялын онаеҥже Ефим Степанович Халтурин кумалтышым эртарен.
– Ончыч Пекейсола ден Коҥганур калык кумалтышым посна эртарен гын, кызыт пошкудо ялыште ты сомылым шуктымым чарненыт, тушеч кумылан-влак мемнан деке толыт, чеспелакыштым кондат.
Кумалтыш деч ончыч мыняр кайыквусо, тага лийшаш нерген мутланаш погынена. Кӧ вольыкым огеш ончо, кумалтышлан лӱмын налеш. Пӧръеҥ-влак ик кече ончыч пум ямдылат, верым эрыктат. Тыгак ӱстембал ден олымбалым шке гыч ыштенна, кумалтыш окса дене коркам, подым, ведрам налынна.
Кажне ийын черет дене пӧрт гыч кумалтышыш лектыт. Кӧн пӧрт гыч лектыт, тушко сакырым, коштымо олма ден йошкарушменым пура шолташ намиен пуэна. Тыгак ӱдырамаш-влак салмавуч ден киндым ямдылат, - каласкала тудо.
Ефим Степановичын ачаж ден аваже кумалтыш годым пелешташ моткоч тале лийыныт, сандене Пекейсолан онаеҥже нунын гаяк мастар. Ты сомылым шукташ лӱмын тунемын огыл, лач книгам шергал лектын. «Юмо туныктен», – пӧръеҥ ойла.
Дарья Быкова.
Умбакыже... https://xn--24-6kcl8auuv6i.xn--p1ai/jumo-tunykten/
Следующая публикация
Нет комментариев