Предыдущая публикация
Опанассолаште оласе семын илат 🏡
Опанассола Советский район Вечын села деч ик меҥге ӧрдыжтӧ верланен. Ял калыкын ойлымыж почеш, ты ялыш эн ончыч Опанас лӱман пӧръеҥ илаш толын. Сандене тудлан кӧра ял тыгай лӱмым нумалеш.
Опанассола Калтаксола ял пелен почиҥга семын шочын. 1887 ийыште тушто17 сурт лийын, 45 пӧръеҥ ден 54 ӱдырамаш иленыт. Чыланат марий шӱлышан лийыныт. Ял калык «Рассвет» ялозанлыкыште пашам ыштен. Ты озанлык жапше годым эре ончыл верыште лийын. Кызыт озанлыкын кугу оралтыж гыч икмынярже гына аралалт кодын, да тушто фермер Виталий Губин ушкалым ашна.
Ик уреман ялыште 30 суртышто илат. Опанассолаште тулым пуртымо, газым шупшмо. Кажне гаяк суртышко йӱштӧ вӱдым гына огыл, шокшо вӱдымат кучылтыт.
– Ме Вечын села воктене илена, тушко ик меҥге веле, сандене кевытыш, йочасадыш, школыш кошташ тора огыл. Тыгак ты селаште калыкым эмлыше стационар пашам ышта. Автобус Советский посёлко марте арня мучко шагат еда кудалыштеш, калыклан пашаш кошташ йӧнан. Шукышт Советский посёлкышто, тыгак Йошкар-Олаште пашам ыштат. Вахте йӧн дене Москош, Озаҥыш кудалыштше-влакат улыт, – ойла А.Панаева.
Опанассолаште калык ваш пагален ила, икте-весылан полшаш эреак тырша. Мелнамат кӱэштын, чылан пырля погынен кочкыт.
Тений ял калык самырык старостым сайлен. Мария Садовина У Торъял районышто шочын-кушкын. Марий кугыжаныш университетыште шинчымашым поген. Кызыт Вечын кыдалаш школышто логопедлан ышта.
Следующая публикация
Нет комментариев