12 июньын В.И.Ленин лӹмӓн площадьышты Российӹн кечӹм пӓлемдӹмӹ торжественный мероприяти ылын.
Республикӹн Глава халыкым тӹнг кугижӓншӹ празньык доно кымылангден. Ти кечӹ Российӹштӹ ӹлӹшӹвлӓн цымыр ылмыштым анжыкта.
«Халыкнан патриотизмжӹ, Шачмы мӱлӓндӹ верц икышын шагалмыжы цилӓ жепӹнок нелӹ гӹц лӓктӓш палшен, ӧрдӹж гӹц толшы тышманым сӹнгӓш тӓрвӓтен. Мӓмнӓн сӓндӓлӹкнӓ цилӓ тергӹмӓшӹм эртӓрен кердеш, ӹшке вижӹм цаткыдемден дӓ мир вӹлнӹ шотеш пиштӹмӓшӹм сылен нӓлӹн мышта», – Юрий Зайцев манын.
Мары Элӹн Глава Россий Федераци Президентӹн шамаквлӓжӹм ӓшӹндӓрен пуэн:
«Федеральный Собранилӓн Послаништӹжӹ Владимир Владимирович Путин пӓлемден: «Мӓ цилӓн, Российӹн гражданвлӓжӹ, ӹшке ирӹкнӓм иквӓреш перегӓш тӹнгӓлӹнӓ, мӓмнӓн тырын дӓ ӹшкӹлӓннӓ яралын ӹлӓш правана улы, мӓ ӹшкӹлӓннӓ ӹшке корнынам айыренӓ, ик йых дон весӹ лоштышы кӹлӹм кыченӓ, тенге историнӓ ак кӹрӹлт, тӹ задачывлӓм решенӓ, кыдывлӓ сӓндӓлӹклӓннӓ керӓл ылыт, традицивлӓ, ӹнянӹмӓш, кыдывлӓм тетявлӓлӓн пуэн коденӓ».
Нет комментариев