Русской Православной Церкви
28 декабря 2018 года (журнал № 127)
Кондак 1
Избра́ннице Царя́ Небе́снаго, преподо́бней ма́тери на́шей Ма́рфе, в беда́х и ско́рбех ско́рой помо́щнице благода́рственное пе́ние прино́сим. Ты же, иму́щая предста́тельство пред Го́сподем, моли́ся о нас, любо́вию тебе́ зову́щих: Ра́дуйся, преподо́бная ма́ти на́ша Ма́рфо, моли́твами свои́ми оби́тель Диве́евскую не оставля́ющая.
Икос 1
А́нгели на небеси́ ра́довахуся, ви́дяще доброде́тельное житие́ твое́, преподо́бная ма́ти Ма́рфо: явила́ся бо еси́ вои́стину иска́тельница Небе́снаго Би́сера, Иису́са Христа́. Мы же, зря́ще по́двиги и труды́ твоя́, благода́рственно воспису́ем ти такова́я:
Ра́дуйся, плоды́ Ду́ха Свята́го в себе́ стяжа́вшая;
ра́дуйся, к ти́хому приста́нищу нас направля́ющая.
Ра́дуйся, окамене́нная сердца́ на́ша во умиле́ние приводя́щая;
ра́дуйся, посреде́ скорбе́й ди́вный поко́й нам посыла́ющая.
Ра́дуйся, от нечая́нныя сме́рти нас огражда́ющая;
ра́дуйся, от ко́зней диа́вольских нас заступа́ющая.
Ра́дуйся, из пучи́ны грехо́в нас изводя́щая;
ра́дуйся, ко престо́лу Госпо́дню сердца́ на́ша вознося́щая.
Ра́дуйся, преподо́бная ма́ти на́ша Ма́рфо, моли́твами свои́ми оби́тель Диве́евскую не оставля́ющая.
Кондак 2
Ви́де Влады́ка Небе́с души́ твоя́ добро́ту, я́ко уподо́билася еси́ му́дрым де́вам, вся́кую сла́дость и сла́ву земну́ю презре́вши. И мы вси, иму́ще такову́ю предста́тельницу о нас недосто́йных, прославля́ем просла́вльшаго тя Го́спода и пое́м Ему́: Аллилу́иа.
Икос 2
Ра́зум Небе́сный тебе́ дарова́ся, ма́ти Ма́рфо, егда́ послу́шала еси́ гла́са Бо́жия и, ше́дши с сестро́ю твое́ю в пу́стынь Саро́вскую, ста́рца Серафи́ма дости́гла еси́. Те́мже убла́жающе тя взыва́ем си́це:
Ра́дуйся, измла́да в познании Бога ди́вно умудри́вшаяся;
ра́дуйся, а́ки еле́нь ко исто́чнику благода́ти Бо́жия устреми́вшаяся.
Ра́дуйся, а́нгельское житие́ нам явля́ющая;
ра́дуйся, в стра́се Бо́жием нас наставля́ющая.
Ра́дуйся, в терпе́нии и смире́нии свое́м Христу́ Бо́гу подража́вшая;
ра́дуйся, о проще́нии грехо́в сле́зы пролива́вшая.
Ра́дуйся, вся плотски́я по́хоти Бо́га ра́ди умертви́вшая;
ра́дуйся, мно́ги ко́зни лука́ваго победи́вшая.
Ра́дуйся, преподо́бная ма́ти на́ша Ма́рфо, моли́твами свои́ми оби́тель Диве́евскую не оставля́ющая.
Кондак 3
Си́ла Вы́шняго осени́ Серафи́ма преподо́бнаго, егда́ благослови́ на и́ноческое житие́ прише́дшую к нему́ ма́терь на́шу Ма́рфу. Мы же, дивя́щеся таково́й Прему́дрости Бо́жией, вопие́м Христу́ Бо́гу: Аллилу́иа.
Икос 3
Иму́щи оби́тель Диве́евская превели́кое сокро́вище, вседраги́я мо́щи твоя́, преподо́бная ма́ти Ма́рфо, лику́ет, и мы о сем ра́дости исполня́емся и с любо́вию воспева́ем тебе́ такова́я:
Ра́дуйся, из пучи́ны отча́яния нас извлека́ющая;
ра́дуйся, во страда́ниих Бо́га хвали́ти науча́ющая.
Ра́дуйся, мглу сомне́ний на́ших разсеява́ющая;
ра́дуйся, изнемога́ющия си́лы на́ша на бо́дрость прелага́ющая.
Ра́дуйся, от тесноты́ земны́я горе́ ны вознося́щая;
ра́дуйся, ми́лости у Го́спода нам прося́щая.
Ра́дуйся, ду́ши на́ша от вся́кия скве́рны охраня́ющая;
ра́дуйся, в Небе́снем гра́де нас предваря́ющая.
Ра́дуйся, преподо́бная ма́ти на́ша Ма́рфо, моли́твами свои́ми оби́тель Диве́евскую не оставля́ющая.
Кондак 4
Бу́рю помышле́ний претерпе́вши и диа́вольския си́лы победи́вши, преподо́бная ма́ти Ма́рфо, пришла́ еси́ в приста́нище ти́хое и безмяте́жное, иде́же пое́ши со все́ми а́нгельскими си́лами хвалу́ Бо́гови: Аллилу́иа.
Икос 4
Слы́шахом о тебе́, ма́ти Ма́рфо, я́ко ди́вно от мирски́я суеты́ к мона́шескому по́двигу призвана́ бе, и еще́ ю́на су́щи отве́рглася еси́ во́ли своея́, и в зна́мение отсече́ния ея́ постри́гла еси́ власы́ главы́ своея́. Сие́ у́бо произволе́ние похваля́юще, воспева́ем ти такова́я:
Ра́дуйся, благо́е и́го Христово на себе́ возложи́вшая;
ра́дуйся, ду́ши на́ша све́том ве́ры просвети́вшая.
Ра́дуйся, нас во страда́ниих душе́вных подкрепля́ющая;
ра́дуйся, нас красото́ю любве́ украша́ющая.
Ра́дуйся, Бо́гом на Небеси́ и на земли́ просла́вленная;
ра́дуйся, вене́ц сла́вы и бога́тство нетле́нныя прии́мшая.
Ра́дуйся, от суеты́ мирски́я нас огражда́ющая;
ра́дуйся, незло́бие и кро́тость в сердца́ на́ша вселя́ющая.
Ра́дуйся, преподо́бная ма́ти на́ша Ма́рфо, моли́твами свои́ми оби́тель Диве́евскую не оставля́ющая.
Кондак 5
Богото́чныя струи́ произлива́ются тобо́ю, ма́ти на́ша Ма́рфо, всем бо се́рдцем прилепи́лася еси́ ко еди́ному Ве́чному Животу́ и Красоте́ неизрече́нней, Иису́су Христу́, пою́щи Ему́: Аллилу́иа.
Икос 5
Ви́деша сестры́ твоя́, преподо́бная мати Ма́рфо, я́ко чу́до пресла́вное сотвори́ с тобо́ю Госпо́дь: чрез служи́теля бо Своего́ Серафи́ма сподо́би тя ве́дети ве́лия обетова́ния, я́же о сла́ве Диве́евстей. Сего́ ра́ди тебе́, вели́цей уго́днице Бо́жией, взыва́ем си́це:
Ра́дуйся, соверше́нства А́нгельскаго во о́трочестве дости́гшая;
ра́дуйся, за́поведи преподо́бнаго николи́же преступи́вшая.
Ра́дуйся, а́гнице Христо́ва, на земли́ благоче́стно пожи́вшая;
ра́дуйся, ю́ности и красоты́ своея́ не пощади́вшая.
Ра́дуйся, послуша́нию нас науча́ющая;
ра́дуйся, целому́дрие и чистоту́ восхваля́ющая.
Ра́дуйся, к жела́ний Кра́ю прише́дшая;
ра́дуйся, возлю́бленнаго Спа́са и Го́спода узре́вшая.
Ра́дуйся, преподо́бная ма́ти на́ша Ма́рфо, моли́твами свои́ми оби́тель Диве́евскую не оставля́ющая.
Кондак 6
Пропове́дует оби́тель Диве́евская ско́рое заступле́ние и предста́тельство твое́ пред Го́сподем. Ты же, я́ко улучи́вшая дерзнове́ние ко Влады́це, не забу́ди ны, земна́я ча́да твоя́, вопию́щая Бо́гу: Аллилу́иа.
Икос 6
Возсия́, я́ко кра́сная заря́, прехожде́ние твое́, ма́ти Ма́рфо, от земли́ на Не́бо. Сподо́билася еси́ получи́ти ми́лости от Го́спода и Пречи́стыя Ма́тере Его́ в Небе́сных оби́телях. Сему́ Бо́жию о тебе́ благоволе́нию дивя́щеся, воспева́ем си́це:
Ра́дуйся, Честне́йшия Богоро́дицы похвале́ние,
ра́дуйся, о́бразе и́стиннаго смире́ния.
Ра́дуйся, вели́кая наста́внице терпе́ния;
ра́дуйся, лю́бящим и чту́щим тя хода́таице спасе́ния.
Ра́дуйся, честно́е Христо́во избра́ние;
ра́дуйся, непоро́чное Бо́гови благоуха́ние.
Ра́дуйся, боголюби́вых душ увеселе́ние;
ра́дуйся, оби́тели Диве́евския щи́те и огражде́ние.
Ра́дуйся, преподо́бная ма́ти на́ша Ма́рфо, моли́твами свои́ми оби́тель Диве́евскую не оставля́ющая.
Кондак 7
Яви́ человеколю́бец Госпо́дь молитвенницу об обители Дивеевския тя, преподо́бная ма́ти Ма́рфо, да вси сохраня́еми предста́тельством твои́м воззову́т Го́сподеви: Аллилу́иа.
Икос 7
Но́вое чу́до пове́да о тебе́, ма́ти Ма́рфо, преподо́бный Серафи́м всем приходя́щим к нему́ во дни кончи́ны твоея́; рече́ бо, я́ко мно́гих грехо́в изба́вятся припа́дающии ко гро́бу твоему́ и зову́щии тебе́ такова́я:
Ра́дуйся, от ю́ности Бо́гу послужи́вшая;
ра́дуйся, на земли́ благоче́стно пожи́вшая.
Ра́дуйся, ко врато́м жи́зни ве́чныя нас приводя́щая;
ра́дуйся, во Ца́рствии Небе́снем пребыва́ющая.
Ра́дуйся, я́ко тобо́ю сла́дости духо́вныя насыща́емся;
ра́дуйся, я́ко моли́твою твое́ю укрепля́емся.
Ра́дуйся, оби́льно исцеле́ния источа́ющая;
ра́дуйся, моли́тися приле́жно нас призыва́ющая.
Ра́дуйся, преподо́бная ма́ти на́ша Ма́рфо, моли́твами свои́ми оби́тель Диве́евскую не оставля́ющая.
Кондак 8
Стра́нствие земно́е сконча́вши, вознесла́ся еси́, а́ки чи́стая голуби́ца, в неве́стник Христо́в, иде́же пое́ши со все́ми послужи́вшими Бо́гу хвале́бную песнь: Аллилу́иа.
Икос 8
Вся и́нокини возра́довашася, егда́ А́нгели прия́ша честну́ю ду́шу твою́, преподо́бная ма́ти Ма́рфо, и вознесо́ша ю́ во оби́тели го́рния, иде́же ны́не предстои́ши Пресвяте́й Тро́ице. Мы же, дивя́щеся человеколю́бию Бо́жию, вопие́м ти такова́я:
Ра́дуйся, гла́су Боже́ственныя благода́ти приле́жно внима́вшая;
ра́дуйся, сла́дкий мед и́стины и спасе́ния взыска́вшая.
Ра́дуйся, всю сла́ву земну́ю попра́вшая;
ра́дуйся, дух твой горе́ возноси́вшая.
Ра́дуйся, в пресве́тлый черто́г Жениха́ твоего́ вше́дшая;
ра́дуйся, вене́ц воздая́ния прие́мшая.
Ра́дуйся, Христо́вою любо́вию уязвле́нная;
ра́дуйся, в бра́чную оде́жду облече́нная.
Ра́дуйся, преподо́бная ма́ти на́ша Ма́рфо, моли́твами свои́ми оби́тель Диве́евскую не оставля́ющая.
Кондак 9
А́нгели на Небеси́ и челове́цы на земли́ вку́пе возра́довахуся о обрете́нии честны́х моще́й твои́х, преподо́бная ма́ти Ма́рфо. Мы же, ны́не благодаря́ще Го́спода, я́ко дарова́ нам засту́пницу и моли́твенницу благу́ю, вопие́м Ему́: Аллилу́иа.
Икос 9
Вети́и многовеща́ннии не возмо́гут досто́йно изобрази́ти вели́чие благодея́ний Бо́жиих, угото́ванных во Ца́рствии Небе́снем всем лю́бящим Го́спода. Мы же, ма́ти Ма́рфо, я́ко соприча́стнице ра́дости неоскудева́емыя, во умиле́нии се́рдца взыва́ем ти си́це:
Ра́дуйся, на житие́ вре́менное, я́ко на стра́нствие, взира́вшая;
ра́дуйся, и́ноческаго чи́на измла́да иска́вшая.
Ра́дуйся, а́нгельски в рай вознесе́нная;
ра́дуйся, Го́сподом благослове́нная.
Ра́дуйся, всесве́тлаго Ца́рства Христо́ва насле́днице;
ра́дуйся, безпло́тных чино́в собесе́днице.
Ра́дуйся, сла́дость Небе́сную во ве́ки вкуша́ющая;
ра́дуйся, те́плою моли́твою сердца́ на́ша согрева́ющая.
Ра́дуйся, преподо́бная ма́ти на́ша Ма́рфо, моли́твами свои́ми оби́тель Диве́евскую не оставля́ющая.
Кондак 10
Спасти́ся хотя́щи душа́м на́шим, ма́ти Ма́рфо, мо́лиши непреста́нно ми́лостиваго Го́спода, да не лиши́т нас насле́дия Небе́снаго Ца́рствия Своего́, пою́щих Ему́: Аллилу́иа.
Икос 10
Кре́пость необори́мая к тебе́ прибега́ющих была́ еси́, ма́ти Ма́рфо. Бу́ди и ны́не нам защи́тница от вся́ких наве́тов вра́жиих, ско́рая же помо́щница в ну́ждах и ско́рбех, да любо́вию зове́м ти такова́я:
Ра́дуйся, Христа ́да́же до сме́рти возлюби́вшая:
ра́дуйся, тве́рдую ве́ру в про́мысл Бо́жий яви́вшая.
Ра́дуйся, несумне́нную наде́жду на милосе́рдие Госпо́дне показа́вшая;
ра́дуйся, нелицеме́рною любо́вию нас объя́вшая.
Ра́дуйся, помраче́нное о́ко душ на́ших просвеща́ющая;
ра́дуйся, в до́брых де́лех нас му́дро наставля́ющая.
Ра́дуйся, ми́лости прося́щим подаю́щая;
ра́дуйся, путь к Небеси́ нам указу́ющая.
Ра́дуйся, преподо́бная ма́ти на́ша Ма́рфо, моли́твами свои́ми оби́тель Диве́евскую не оставля́ющая.
Кондак 11
Пе́ние всеумиле́нное прино́сим ти, преподо́бная ма́ти Ма́рфо, пред [ракою мощей и] святы́м о́бразом твои́м предстоя́ще и моля́щеся приле́жно. Да укрепи́т Госпо́дь ве́ру правосла́вную во Оте́честве на́шем и искорени́т в нем вся е́реси и раско́лы; да вси лю́дие еди́ными усты́ и еди́ным се́рдцем сла́вят Бо́га, пою́ще Ему́: Аллилу́иа.
Икос 11
Светоза́рно свети́ло бу́ди нам, ма́ти на́ша Ма́рфо, путеводя́щи от земли́ на Не́бо, да возмо́жем и мы в житии́ на́шем прославля́ти Вели́кое и Сла́вное И́мя Пресвяты́я Тро́ицы и воспева́ти тебе́ си́це:
Ра́дуйся, спаси́тельнаго безмо́лвия люби́тельнице;
ра́дуйся, соверше́ннаго терпе́ния храни́тельнице.
Ра́дуйся, во́льныя нищеты́ крест прии́мшая;
ра́дуйся, посто́м и бде́нием Бо́гу угоди́вшая.
Ра́дуйся, путь пра́вый в Ца́рствие Небе́сное нам указу́ющая;
ра́дуйся, духо́вную му́дрость нам да́рующая.
Ра́дуйся, к Бо́гу все́ю душе́ю прилепля́тися науча́ющая;
Ра́дуйся, друг дру́га люби́ти нас призыва́ющая.
Ра́дуйся, преподо́бная ма́ти на́ша Ма́рфо, моли́твами свои́ми оби́тель Диве́евскую не оставля́ющая.
Кондак 12
Благода́ть и ми́лость испроси́ нам у Бо́га, ма́ти преподо́бная, вразумля́ющую и укрепля́ющую нас в де́ле спасе́ния, да не безпло́дны яви́мся в час суда́ Бо́жия, пою́ще: Аллилу́иа.
Икос 12
Пою́ще и сла́вяще преди́вное прославле́ние твое́, ублажа́ем тя, преподо́бная ма́ти Ма́рфо, я́ко те́плую моли́твенницу о нас пред Го́сподем, и с любо́вию возглаша́ем ти такова́я:
Ра́дуйся, благода́тию Пресвята́го Ду́ха приосене́нная;
ра́дуйся, во оде́жду нетле́ния облече́нная.
Ра́дуйся, неме́ркнущим све́том ду́ши на́ша озаря́ющая;
ра́дуйся, на доброде́лание нас наставля́ющая.
Ра́дуйся, Еди́наго Го́спода во вся дни живота́ своего́ иска́вшая;
ра́дуйся, в Нем наме́рения полага́вшая.
Ра́дуйся, оби́тель Богома́тернюю возлюби́вшая;
ра́дуйся, да́же до конца́ в ней пожи́вшая.
Ра́дуйся, преподо́бная ма́ти на́ша Ма́рфо, моли́твами свои́ми оби́тель Диве́евскую не оставля́ющая.
Кондак 13
О, прехва́льная и пресла́вная преподо́бная ма́ти на́ша Ма́рфо! Приими́ ми́лостивно от нас сие́ ма́лое моле́ние, в похвалу́ тебе́ приноси́мое, и, предстоя́щи ны́не Престо́лу Царя́ ца́рствующих, моли́ всеблага́го Бо́га проба́вити ми́лость свою́ на ны и на ро́ды родо́в на́ших, утверди́ти ны в правове́рии и благоче́стии, да воспева́ем Ему́ чи́стым се́рдцем: Аллилу́иа.
[Се́й конда́к глаго́лется три́жды.]
[Далее повторяем 1‑е икос и кондак:]
Икос 1
А́нгели на небеси́ ра́довахуся, ви́дяще доброде́тельное житие́ твое́, преподо́бная ма́ти Ма́рфо: явила́ся бо еси́ вои́стину иска́тельница Небе́снаго Би́сера, Иису́са Христа́. Мы же, зря́ще по́двиги и труды́ твоя́, благода́рственно воспису́ем ти такова́я:
Ра́дуйся, плоды́ Ду́ха Свята́го в себе́ стяжа́вшая;
ра́дуйся, к ти́хому приста́нищу нас направля́ющая.
Ра́дуйся, окамене́нная сердца́ на́ша во умиле́ние приводя́щая;
ра́дуйся, посреде́ скорбе́й ди́вный поко́й нам посыла́ющая.
Ра́дуйся, от нечая́нныя сме́рти нас огражда́ющая;
ра́дуйся, от ко́зней диа́вольских нас заступа́ющая.
Ра́дуйся, из пучи́ны грехо́в нас изводя́щая;
ра́дуйся, ко престо́лу Госпо́дню сердца́ на́ша вознося́щая.
Ра́дуйся, преподо́бная ма́ти на́ша Ма́рфо, моли́твами свои́ми оби́тель Диве́евскую не оставля́ющая.
Кондак 1
Избра́ннице Царя́ Небе́снаго, преподо́бней ма́тери на́шей Ма́рфе, в беда́х и ско́рбех ско́рой помо́щнице благода́рственное пе́ние прино́сим. Ты же, иму́щая предста́тельство пред Го́сподем, моли́ся о нас, любо́вию тебе́ зову́щих: Ра́дуйся, преподо́бная ма́ти на́ша Ма́рфо, моли́твами свои́ми оби́тель Диве́евскую не оставля́ющая.
Молитва
О, богому́драя и ди́вная отрокови́це, сосу́де Благода́ти Бо́жия, в простоте́ голуби́ней пожи́вшая, кро́тостию небе́сною, чистото́ю и послуша́нием просия́вшая, сотаи́ннице преподо́бнаго Серафи́ма, нача́льнице Диве́евских сесте́р в оби́телех Небе́сных, госпоже́ и ма́ти на́ша Ма́рфо! Бу́ди лю́бящим и чту́щим тя хода́таица спасе́ния, в стра́се Бо́жием нас утверди́, да го́рняя му́дрствуем, а не земна́я, изнемога́ющия си́лы на́ша на бо́дрость премени́, в любви́ и единомы́слии укрепи́ и помяни́ нас, гре́шных, у Престо́ла Бо́жия во Ца́рствии Небе́снем. Ами́нь.
............
Канон святаго, глас 2.
Песнь 1.
Ирмос: Во глубине́ постла́ иногда́ / фараони́тское всево́инство преоруже́нная си́ла, / вопло́щшееся же Сло́во всезло́бный грех потреби́ло есть: / препросла́вленный Госпо́дь сла́вно бо просла́вися.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Крести́телю и Предте́че Христо́в, / погружа́емый всегда́ сластьми́ теле́сными ум мой упра́ви / и во́лны страсте́й укроти́, / я́ко да в тишине́ Боже́ственней быв, песносло́влю тя.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Недоуме́нным просвети́вся просвеще́нием, / я́ко многосве́тлая звезда́, мы́сленному Восто́ку предте́кл еси́, / И́мже озари́тися се́рдцу моему́, Крести́телю, моли́, / омраче́нному все́ми бесо́вскими приложе́нии.
Сла́ва Отцу, и Сы́ну, и Свято́му Ду́ху. В реце́ бе́здну иногда́, Всему́дре, погрузи́л еси́, / пото́п содева́ющую благода́тию всего́ преступле́ния. / Но молю́ся, пото́ки, блаже́нне, мои́х прегреше́ний изсуши́, / Боже́ственным хода́тайством твои́м.
И ны́не, и при́сно, и во ве́ки веко́в, ами́нь. Чи́стыя Де́вы, Бо́га воплоти́вшия, / сро́дник был еси́, блаже́нне Предте́че, / с Не́ю же тя чтим и мо́лим, / и́же в Боже́ственнем хра́ме твое́м ны́не живу́ще, / хра́мы и нас сотвори́ Ду́ха Свята́го.
Песнь 3.
Ирмос: На ка́мени мя ве́ры утверди́в, / разшири́л еси́ уста́ моя́ на враги́ моя́, / возвесели́ бо ся дух мой, внегда́ пе́ти: / несть свят, я́коже Бог наш, / и несть пра́веден, па́че Тебе́, Го́споди.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Исцели́ стру́пы души́ моея́ / и ум мой, омраче́нный небреже́нием, / озари́ Боже́ственным твои́м хода́тайством, Госпо́день Предте́че, / и вся́каго изба́ви мя сопроти́внаго обстоя́ния, молю́ся.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Непло́дствие разреши́л еси́ ро́ждшия, / роди́вся Бо́жиим промышле́нием, прему́дре проро́че; / непло́дное у́бо се́рдце мое́ / плодоно́сно ны́не соде́лай, Госпо́день Предте́че, хода́тайством твои́м, / доброде́телей приноси́ти прозябе́ния.
Сла́ва Отцу, и Сы́ну, и Свято́му Ду́ху. Любо́вию твое́ю созида́ющаго Боже́ственный дом, / вы́шняго жития́ улучи́ти моли́, / и́же ве́рою храму твоему́ служа́щия, / хра́мы Ду́ха Боже́ственнаго сотвори́, / Крести́телю и Предте́че, хода́тайствы твои́ми.
И ны́не, и при́сно, и во ве́ки веко́в, ами́нь. Веселя́шеся Предте́ча, в ложесна́х носи́м ма́терних, / и покланя́шеся Го́споду, носи́му в ложесна́х Благода́тныя, / Его́же моли́ от вся́кия ско́рби изба́вити мя.
Го́споди, поми́луй, трижды.
Седален, глас 8.
Заха́риин глас све́тло разреши́ / Словесе́ глас ро́ждься, Предте́ча, / и зако́на непло́дие всем показа́, зовы́й: / пока́йтеся, су́щии на земли́, / се бо прии́де и яви́ся Иису́с, / вся хотя́ изба́вити от пе́рвыя кля́твы, просвеща́я Креще́нием. / Вои́стинну чу́до пресла́вно!
Сла́ва Отцу, и Сы́ну, и Свято́му Ду́ху. Глас 4.
Я́коже со́лнце све́тло, из чре́ва Елисаве́ти возсия́ нам Заха́риин сын, / и о́тчее разреши́ безгла́сие́, / и всем лю́дем в дерзнове́нии мно́зе, испра́вите, вопия́, путь Госпо́день, / и́бо Той свободи́т и спасе́т к Нему́ притека́ющия. / Его́же пропове́дал еси́, Иоа́нне, моли́ спасти́ся душа́м на́шим.
И ны́не, и при́сно, и во ве́ки веко́в, ами́нь.
Богородичен:
Обнови́ла еси́, Чи́стая, Бо́же́ственным Рождество́м Твои́м / истле́вшее во страсте́х земноро́дных ме́ртвенное существо́ / и воздви́гла еси́ вся от сме́рти к животу́ нетле́ния. / Те́мже Тя по до́лгу блажи́м вси, Де́во Препросла́вленная, я́коже прорекла́ еси́.
Песнь 4.
Ирмос: Прише́л еси́ от Де́вы не хода́тай, ни А́нгел, / но Сам, Го́споди, вопло́щся, / и спасл еси́ всего́ мя, челове́ка. / Тем зову́ Ти: сла́ва си́ле Твое́й, Го́споди.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Прекло́ншему небеса́ и челове́ком бесе́довавшу, / главу́ приклони́л еси́ десни́цею твое́ю, пребога́те; / е́юже мя соблюди́, / во смире́нии соблюда́я се́рдце мое́.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Пусты́ня тебе́ граждани́на непрохо́дная имя́ше, блаже́нне Предте́че, / те́мже вопию́ ти: / пу́сту вся́каго Боже́ственнаго дея́ния бы́вшу, / ду́шу мою́ снабди́.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Зако́н Боже́ственный управля́я, / беззако́нно закла́н был еси́. / Те́мже молю́ся тебе́: / беззако́ннующа мя всегда́ / и прельща́ема бесо́вскими прельще́ньми испра́ви.
Сла́ва Отцу, и Сы́ну, и Свято́му Ду́ху. Созда́в себе́ храм Влады́це Царю, / к Боже́ственным селе́нием ны́не преше́л еси́, Предте́че, / и́хже получи́ти моли́, тебе́ пресвяты́й дом Воздви́гшаго.
И ны́не, и при́сно, и во ве́ки веко́в, ами́нь. При́зри на мя неду́гующаго, Всенепоро́чная, / и разреши́ стра́сти моя́ лю́тыя и неудобоисце́льныя, / я́ко да велича́ю Тя, / возвели́чившую все челове́чество.
Песнь 5.
Ирмос: Просвеще́ние во тьме лежа́щих, / спасе́ние отча́янных, Христе́, Спа́се мой, / к Тебе́ у́тренюю, Царю́ ми́ра, / просвети́ мя сия́нием Твои́м, / ино́го бо, ра́зве Тебе́, бо́га не зна́ю.
Припев: Святы́й вели́кий Иоа́нне Предте́че Госпо́день, моли́ Бо́га о нас.
В тече́ниих Иорда́нских струю́ нетле́ния, / Предте́че, крести́в Христа́, моли́, / истека́ния страсте́й мои́х изсуши́ти, / и пото́ки сла́достныя насле́довати, / и пра́ведных кра́снаго ра́дования.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Уже́ рыда́ю, и содрага́юся стра́хом, / и недоуме́нием всегда́ содержи́мь есмь, / помышля́я моя́ соде́ланная / и бу́дущий суд ужа́сный, Благоутро́бне Го́споди, / пощади́ мя Твоего́ Крести́теля мольба́ми.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Законополага́яй лю́дем спасе́ние, / в раска́янии Предте́че, прегреше́ний бы́вшее, / посреде́ зако́на и благода́ти стал еси́. / Сего́ ра́ди мо́лим тя: / образми́ покая́ния нас просвети́.
Сла́ва Отцу, и Сы́ну, и Свято́му Ду́ху. Даждь ми вре́мя покая́ния, / уны́нно преше́дшее все ижди́вшему, Благоде́телю, / име́я на сие́ моля́щаго Тя, Сло́ве, / Иоа́нна вели́каго, Предте́чу и покая́ния всеми́рнаго пропове́дника.
И ны́не, и при́сно, и во ве́ки веко́в, ами́нь. Наве́ты и ловле́нии льсти́ваго умертви́хся, Влады́чице Всенепоро́чная, / оживи́ мя, я́же ро́ждшая Живо́т всех, Богоро́дице, ипоста́сный, / да Тя пою́ благоче́стно Всенепоро́чную.
Песнь 6
Ирмос: В бе́здне грехо́вней валя́яся, / неизсле́дную милосе́рдия Твоего́ призыва́ю бе́здну: / от тли, Бо́же, мя возведи́.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Глас Сло́ва пропове́давый, / всех гла́сы восприе́м, / проси́ грехо́в проще́ние дарова́ти / ве́рою пою́щим тя.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Сокруше́ние души́ моея́ исцели́, / и грехо́в бре́мя разреши́, / и па́че наде́жды спаси́ мя моли́твами твои́ми, / блаже́нне Предте́че.
Сла́ва Отцу, и Сы́ну, и Свято́му Ду́ху. Иису́са, Его́же руко́ю твое́ю крести́л еси́, Предте́че, моли́, / руки́ мя изба́вити греха́, / взима́юща к Нему́ ру́це при́сно, всесла́вне.
И ны́не, и при́сно, и во ве́ки веко́в, ами́нь. Дрема́нием ле́ностным одержи́мь есмь, / сон грехо́вный тяготи́т се́рдце мое́: / Твои́м, Пречи́стая, бде́нным хода́тайством, / воздви́гни и спаси́ мя.
Го́споди, поми́луй, трижды. Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Кондак, глас 3.
Пре́жде непло́ды днесь Христо́ва Предте́чу ражда́ет, / и той есть исполне́ние вся́каго проро́чества: / Его́же бо проро́цы пропове́даша, / на Сего́ во Иорда́не ру́ку положи́в, / яви́ся Бо́жия Сло́ва проро́к, пропове́дник, вку́пе и Предте́ча.
Икос:
Восхва́лим ны́не Госпо́дня Предте́чу, / его́же свяще́ннику Елисаве́ть роди́ из ложе́сн непло́дных, но не без се́мене: / Христо́с бо еди́н вмести́лище про́йде непроходи́мо без се́мене. / Иоа́нна непло́ды роди́, без му́жа же сего́ не роди́, / Иису́са же, осене́нием Отца́ и Ду́ха Бо́жия, Де́ва роди́ Чи́стая. / Но Безсе́менному яви́ся от непло́дныя проро́к и пропове́дник, вку́пе и Предте́ча.
Песнь 7.
Ирмос: Богопроти́вное веле́ние беззако́ннующаго мучи́теля / высо́к пла́мень вознесло́ есть. / Христо́с же простре́ Богочести́вым отроко́м ро́су духо́вную, / Сый благослове́н и препросла́влен.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Из ко́рене секи́рою твоего́ покая́ния / исто́рг я́звы стра́стнаго се́рдца моего́, / всади́, Предте́че, Боже́ственное безстра́стие / и страх чисте́йший Бо́жий, / вся́кия зло́бы отчужда́ющий мя.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Во струя́х Иорда́нских, я́ко крести́л еси́ / покрыва́ющаго вода́ми превы́спренняя Го́спода, / Того́ моли́ во́ду дарова́ти Боже́ственнаго умиле́ния / при́сно очи́ма мои́ма, сла́вный Предте́че.
Сла́ва Отцу, и Сы́ну, и Свято́му Ду́ху. И́же ми́ру взе́млющаго грех, / А́гнца Бо́жия, Предте́че, пропове́дав, / Того́ моли́ от ко́злищ ча́сти яви́ти мя чу́жда, / и десны́м Его́ овца́м и мене́ сочета́ти, сла́вне.
И ны́не, и при́сно, и во ве́ки веко́в, ами́нь. Непло́дная утро́ба нося́ше Тя, Де́во, / во чре́ве носи́вшую Сло́во воплоще́нно, / Его́же Боже́ственными взыгра́нии вели́кий Предте́ча, / непло́дныя всесвяты́й плод, / позна́ ра́дуяся и поклони́ся.
Песнь 8.
Ирмос: Пещь иногда́ о́гненная в Вавило́не де́йства разделя́ше, / Бо́жиим веле́нием халде́и опаля́ющая, / ве́рныя же ороша́ющая, пою́щия: / благослови́те, вся дела́ Госпо́дня, Го́спода.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Даждь десни́цу мне, на земли́ лежа́щему, Предте́че, / и́же десни́цу просте́р и омы́л еси́ вода́ми Нескве́рнаго: / и изба́ви мя скве́рны теле́сныя, / всего́ мя очища́я покая́нием, и спаси́ мя.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Иму́щи, душе́, вре́мя пока́ятися, / ле́ности тяжча́йший сон оттряси́ / и спе́шно побди́, вопию́щи Влады́це твоему́: / Милосе́рде, уще́дри мя, / Крести́теля Твоего́ мольба́ми.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Пото́цы страсте́й и во́ды зло́бы / до души́ моея́ внидо́ша, блаже́нне Предте́че, / потщи́ся ско́ро изъя́ти мя, / и́же ре́чными струя́ми измы́в / безстра́стия тиша́йшую пучи́ну.
Сла́ва Отцу, и Сы́ну, и Свято́му Ду́ху. Увы́ мне, мно́га зла сотво́ршему! / Увы́ мне, еди́ному прогне́вавшему Бо́га Преблага́го! / Крести́телю Христо́в, помози́ ми, / и пода́ждь прегреше́ний мои́х разреше́ние, / и долго́в мои́х отсече́ние твои́ми хода́тайствы.
И ны́не, и при́сно, и во ве́ки веко́в, ами́нь. Вы́шняго Бо́га пло́тию ро́ждшая, / от гно́я мя возста́ви страсте́й, оскорбля́ющих мя: / и лю́те всего́ обнища́вша, / Боже́ственными обогати́, Пречи́стая, доброде́тельми, / я́ко да воспою́ Тя спаса́емь.
Песнь 9.
Ирмос: Безнача́льна Роди́теля Сын, Бог и Госпо́дь, / вопло́щся от Де́вы, нам яви́ся, / омраче́нная просвети́ти, собра́ти расточе́нная. / Тем Всепе́тую Богоро́дицу велича́ем.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Ка́ла мя изба́ви грехо́внаго, Го́споди, / Безгре́шне Еди́не и Многоми́лостиве, / Крести́теля мольба́ми, / и́же Тебе́ пропове́давый всему́ ми́ру А́гнца Бо́жия, / взе́млющаго челове́ков грехи́.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Я́ко ши́пок благово́нен, я́ко благоуха́нный кипари́с, / я́ко неувяда́емый крин, я́ко ми́ро че́стно / име́яй тя, Госпо́день Предте́че, / мои́х дел злосмра́дия избавля́юся моли́твами твои́ми, / притека́я к покро́ву твоему́.
Припев: Святы́й вели́кий Иоа́нне Предте́че Госпо́день, моли́ Бо́га о нас.
Непло́дствовати мя непло́дными де́лы, всеблаже́нне, сотвори́, / доброде́телей благопло́дие при́сно принося́ща, / ча́до мя Госпо́дне творя́, / и прича́стника Боже́ственному Ца́рствию, / и святы́х собо́ру купножи́теля.
Сла́ва Отцу, и Сы́ну, и Свято́му Ду́ху. Нам лю́бящим тя, любо́вию почита́ющим, / и в Боже́ственнем хра́ме твое́м лику́ющим, / даждь с небесе́ разреше́ние лю́тых, Предте́че Госпо́день, / и жития́ исправле́ние, и прегреше́ний избавле́ние.
И ны́не, и при́сно, и во ве́ки веко́в, ами́нь. Носи́му во утро́бе Богома́терни, вся нося́щему ма́нием, / поклони́лся еси́, проро́че: / с Не́юже моли́ смире́нней спасти́ся души́ мое́й, / во мно́гая впа́дающей по вся дни согреше́ния.
Светилен, глас 4:
Предте́чу Иоа́нна, и крести́теля Спа́сова, / во проро́цех проро́ка и пусты́ни воспита́ние, / Елисаве́тино рожде́ние восхва́лим вси.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Богородичен:
Сла́дость А́нгелов, скорбя́щих ра́дость, / христиа́н предста́тельница, Де́во Ма́ти Госпо́дня, / заступи́ нас, и изба́ви ве́чных мук.
Молитва:
Крести́телю Христо́в, пропове́дниче покая́ния, ка́ющагося не пре́зри мене́, но совокупля́яся с во́и Небе́сными, моли́ся ко Влады́це за мене́ недосто́йнаго, уны́лаго, немощна́го и печа́льнаго, во мно́гия беды́ впа́дшаго, утружде́ннаго бу́рными по́мыслы ума́ моего́; аз бо есмь верте́п злых дел, отню́дь не име́яй конца́ грехо́вному обы́чаю; пригвожде́н бо есть ум мой земны́м ве́щем, что сотворю́, не вем, и к кому́ прибе́гну, да спасе́на бу́дет душа́ моя́? То́кмо к тебе́, святы́й Иоа́нне, благода́ти тезоимени́те, я́ко тя пред Го́сподем по Богоро́дице вем бо́льша бы́ти рожде́нных всех, и́бо ты сподо́бился еси́ косну́тися верху́ Царя́ Христа́, взе́млющаго грехи́ ми́ра, А́гнца Бо́жия. Его́же моли́ за гре́шную мою́ ду́шу, да поне́ от ны́не, в пе́рвыйна́десять час, понесу́ тяготу́ благу́ю и прииму́ мзду с после́дними. Ей, Крести́телю Христо́в, честны́й Предте́че, кра́йний проро́че, пе́рвый во благода́ти му́чениче, по́стников и пусты́нников наста́вниче, чи́стоты учи́телю и бли́жний дру́же Христо́в, тя молю́, к тебе́ прибега́ю: не отри́ни мене́ от твоего́ заступле́ния, но возста́ви мя па́дшагося мно́гими грехи́, обнови́ ду́шу мою́ покая́нием, я́ко вторы́м креще́нием, поне́же обоего́ нача́льник еси́, креще́нием омыва́яй прароди́тельный грех, покая́нием же очища́яй коего́ждо де́ло скве́рно. Очи́сти мя, греха́ми оскверне́ннаго и пону́ди вни́ти, а́може ничто́же скве́рно вхо́дит, во Ца́рствие Небе́сное, ами́нь.
Присоединяйтесь к ОК, чтобы подписаться на группу и комментировать публикации.
Нет комментариев