Предыдущая публикация
Минея, 20 Июня, Кано́н святи́теля
Глас 3
Песнь 1
Ирмос: Пе́снь но́вую пои́м, лю́дие,/ от Де́вы Ро́ждшемуся во спасе́ние на́ше/ и еди́но Сотво́ршему с Небе́сными земна́я,/ я́ко просла́вися.
Припев: Святи́телю о́тче Гу́рие, моли́ Бо́га о на́с.
Бо́же и Го́споди, Иису́се Христе́, А́гнче,/ да́ждь ми сло́во све́тло,/ да воспою́ а́гнца Твоего́ кро́ткаго и незло́биваго, пе́рваго Каза́нскаго архиере́я Гу́рия чудотво́рца,/ и ублажу́ нетле́ние честны́х моще́й его́.
Припев: Святи́телю о́тче Гу́рие, моли́ Бо́га о на́с.
Ловле́ния льсти́ваго руки́ избе́гл еси́,/ непоро́чно де́вство твое́ сохрани́в;/ того́ ра́ди чи́стое твое́ те́ло нетле́нием от Бо́га почте́ся,/ ему́ же мы удивля́ющеся,/ пое́м Го́спода, в тебе́ просла́вльшагося.
Припев: Святи́телю о́тче Гу́рие, моли́ Бо́га о на́с.
А́нгел был еси́ во пло́ти земны́й и Небе́сный челове́к/ доброде́тельным житие́м на земли́ просия́л еси́,/ по преставле́нии же чудесы́, от моще́й твои́х быва́ющими, Росси́ю удиви́л еси́;/ мы же непреста́нно Го́споду пое́м,/ я́ко в тебе́ просла́вися.
Сла́ва Отцу́ и Сы́ну и Свято́му Ду́ху.
Го́рдаго Голиа́фа духо́внаго, вла́ствующаго ага́ряны,/ дре́вле си́лою кре́стною посрами́л еси́./ Того́жде и ны́не прогоня́еши от челове́ков, притека́ющих к святы́м моще́м твои́м/ и пою́щих Го́сподеви, я́ко просла́вися.
И ны́не и при́сно и во ве́ки веко́в. Ами́нь.
Богородичен: Основа́ние тве́рдое Ты еси́, Пречи́стая Де́во, всем христиа́ном,/ на Тя наде́ющимся вои́стинну/ и Го́сподеви пою́щим, я́ко просла́вися.
Песнь 3
Ирмос: Утвержде́ние и очище́ние/ пода́ждь нам, Сы́не Бо́жий,/ и спаси́ ны, я́ко Человеколю́бец.
Припев: Святи́телю о́тче Гу́рие, моли́ Бо́га о на́с.
Сло́во Бо́жие пропове́дал еси́ нечести́вым ага́ряном/ и сих научи́л еси́ в Того́ ве́ровати,/ у́чиши же и по преставле́нии твое́м,/ чудесы́, а́ки усты́, велегла́сно вопия́ и уверя́я:/ цельбы́ точа́т честны́я твоя́ мо́щи с ве́рою притека́ющим.
Припев: Святи́телю о́тче Гу́рие, моли́ Бо́га о на́с.
Сло́во Бо́жие пропове́дал еси́ нечести́вым ага́ряном/ и сих научи́л еси́ в Того́ ве́ровати,/ у́чиши же и по преставле́нии твое́м,/ чудесы́, а́ки усты́, велегла́сно вопия́ и уверя́я:/ цельбы́ точа́т честны́я твоя́ мо́щи с ве́рою притека́ющим.
Сла́ва Отцу́ и Сы́ну и Свято́му Ду́ху.
От хра́ма Спа́сова в Богоро́дичен храм преноси́мым бы́вшим моще́м твои́м,/ благоуха́ния град испо́лнися, возду́х освяти́ся,/ ду́си возду́шнии дале́че отбего́ша;/ наро́д же ве́рных, веселя́щеся, прославля́ху Бо́га,/ ди́внаго в тебе́, святе́м свое́м.
И ны́не и при́сно и во ве́ки веко́в. Ами́нь.
Богородичен: Велиа́ра лю́таго рождество́м Твои́м победи́ла еси́,/ Христа́ нам, Де́во, ро́ждши.
Седален, глас 5
Чу́ден вои́стинну измла́да был еси́,/ посто́м, и моли́твами, и до́лу лега́нием Бо́гу угоди́в,/ и терпе́нием твои́м темни́цу отве́рзл еси́;/ чу́дно же и пресла́вно и Той о тебе́ соде́ла,/ а́ки друга́го Па́вла с Небеси́ позна́в,/ на архиере́йский престо́л по жре́бию тя избра́л е́сть./ Того́ ра́ди мо́лим тя, вели́кий святи́телю Гу́рие:/ моли́ спасти́ся душа́м на́шим.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Стра́нно чу́до зача́тия и несказа́нен о́браз Боже́ственнаго рождества́/ в Тебе́ позна́ся, Чи́стая Присноде́во,/ ужаса́ет ми ум и удивля́ет помышле́ния,/ сла́ва Твоя́, Богоро́дице, всем воспростре́ся на спасе́ние душа́м на́шим.
Песнь 4
Ирмос: Стра́нна и неизрече́нна рождества́ Твоего́ та́йна!/ Услы́шах слух Твой, и убоя́хся,/ и, веселя́ся, вопию́ Ти:/ си́ле Твое́й сла́ва, Человеколю́бче.
Припев: Святи́телю о́тче Гу́рие, моли́ Бо́га о на́с.
Ели́ко на земли́ сотвори́л еси́ в терпе́нии твое́м, во а́лчбе и жа́жде пребыва́я,/ толи́ко и Христо́с возда́рствова тебе́,/ архиере́йством почти́в тя и чудесы́ просла́вив твоя́ мо́щи,/ и́хже дне́сь пренесе́ние пра́зднующе, вопие́м Христу́:/ си́ле Твое́й сла́ва, Человеколю́бче.
Припев: Святи́телю о́тче Гу́рие, моли́ Бо́га о на́с.
Ни глад, ни темни́ца, ни ску́дость ри́зная возбрани́ тя от любве́ Христо́вы,/ е́же после́довати страсте́м Его́, всехва́льне о́тче наш Гу́рие./ Того́ ра́ди Госпо́дь тебе́, преподо́бному Своему́, ви́дети истле́ния не даде́,/ но чуде́сным нетле́нием облагода́тствова тя,/ ему́же мы удивля́ющеся, вопие́м Христу́:/ си́ле Твое́й сла́ва, Человеколю́бче.
Сла́ва Отцу́ и Сы́ну и Свято́му Ду́ху.
И́го Христо́во на ра́мо взем, после́довал еси́ стопа́м Его́,/ трудолю́бное же твое́ те́ло во гроб положи́в,/ душе́ю вшел еси́ в Го́рнее насле́дие Его́, святи́телю Гу́рие,/ мы же вопие́м Христу́:/ си́ле Твое́й сла́ва, Человеколю́бче.
И ны́не и при́сно и во ве́ки веко́в. Ами́нь.
Богородичен: Е́ллинское буесло́вие, Богома́ти, Твои́м рождество́м искорени́ся,/ нов же сад ве́ры насади́ся/ и благода́ть ве́ры процвете́ моли́твами Твои́ми, Чи́стая.
Песнь 5
Ирмос: К Тебе́ у́тренюю,/ от Отца́ пре́жде денни́цы возсия́вшему, У́тро ми́рови,/ помраче́нна согреше́ньми, Спа́се,/ предвари́в, озари́, Бо́же.
Припев: Святи́телю о́тче Гу́рие, моли́ Бо́га о на́с.
Мрак грехо́вный и тьму́ сла́стных страсте́й от души́ отри́нул еси́,/ у́треневал еси́ ко Христу́, взыва́я к Нему́:/ Спа́се, предвари́в, озари́ мя, Бо́же.
Припев: Святи́телю о́тче Гу́рие, моли́ Бо́га о на́с.
Ле́ности и вся́каго мирска́го пристра́стия в жи́зни сей уклони́лся еси́,/ пло́ть свою́ и́ноческими труды́ и архиере́йскими по́двиги истни́л еси́,/ свиде́тельствует о житии́ твое́м нетле́ние твое́,/ вы́ну бо пел еси́ Влады́це Христу́:/ предвари́в, озари́ мя, Бо́же.
Сла́ва Отцу́ и Сы́ну и Свято́му Ду́ху.
Ага́рянскаго суетогла́сия и тще́тнаго их буесло́вия обузда́тель,/ святи́телю Гу́рие, был еси́, вопия́:/ предвари́в, озари́ мя, Бо́же.
И ны́не и при́сно и во ве́ки веко́в. Ами́нь.
Богородичен: Виссо́н чи́стый во чре́ве Твое́м истка́ся, Пречи́стая,/ в него́же облече́ся несказа́нно Ца́рь Сла́вы –/ Христо́с Бог наш.
Песнь 6
Ирмос: Во глубину́ се́рдца морска́го беззако́нии отве́ржен быв,/ я́ко Ио́на, вопию́ Ти: возведи́ мя от тли,/ да возда́м Ти моли́твы моя́, Го́споди.
Припев: Святи́телю о́тче Гу́рие, моли́ Бо́га о на́с.
Ре́вностию Боже́ственною при́сно объя́т быв,/ неукло́нно Бо́гу предстоя́л еси́,/ ми́лостынею и непреста́нными моли́твами Тому́ угожда́я,/ ны́не же моли́ся и о нас, святи́телю,/ пренесе́ние твое́ пра́зднственно почита́ющих.
Припев: Святи́телю о́тче Гу́рие, моли́ Бо́га о на́с.
Ему́же предстоя́л еси́ в жи́зни вре́менней в моли́твах неусы́пных,/ Тому́ ны́не в жи́зни ве́чной наипа́че предстои́ши, Христу́ Бо́гу на́шему,/ помоли́ся у́бо Ему́ за град твой и за вся лю́ди, пою́щия тя/ и пра́зднующия пренесе́ние чудотво́рных моще́й твои́х.
Сла́ва Отцу́ и Сы́ну и Свято́му Ду́ху.
Не бы́сть в тебе́ поро́ка, ниже́ скве́рны в души́ твое́й, о́тче,/ сего́ ра́ди по преставле́нии чудесы́ от Бо́га обогати́лся еси́,/ Гу́рие приснопа́мятне.
И ны́не и при́сно и во ве́ки веко́в. Ами́нь.
Богородичен: Тебе́ ублажа́ем, Бо́жию Ма́терь,/ и под кров Твой с ве́рою прибега́ем, Богоро́дице Де́во:/ спаси́ всех нас, ве́рно пою́щих Тя.
Кондак, глас 4
Чу́вственныя стра́сти победи́в,/ чистото́ю, я́ко со́лнце, возсия́л еси́,/ чи́сто житие́ до конца́ сохрани́в,/ и от неве́рия в ве́ру мно́гих ко Христу́ приве́л еси́,/ того́ ра́ди от Бо́га нетле́нием почте́н,/ чудесы́ твои́ми вся удиви́л еси́./ Мо́лим у́бо тя, святи́телю Гу́рие,/ моли́твами твои́ми от бед изба́ви нас, да зове́м ти:/ ра́дуйся, о́тче преди́вный, гра́ду Каза́ни похвало́ и утвержде́ние.
Икос
Пе́рвый се́ятель был еси́ духо́вных доброде́телей,/ и пе́рвый па́стырь, и Це́ркви нача́льник,/ пе́рвый архиере́й и учи́тель христиа́нскому зако́ну в новопросвеще́нном гра́де Каза́ни,/ ве́рныя лю́ди пита́я хле́бом уче́ния благода́тнаго зако́на,/ напоя́я пи́вом духо́вныя благода́ти,/ неве́рныя же уча́ позна́ти и́стину и крести́тися святы́м Креще́нием,/ и мно́жество наро́да от неве́рия в ве́ру ко Христу́ приве́л еси́,/ чи́стым житие́м Бо́гу угоди́ти наста́вив их./ Сего́ ра́ди Христо́с свято́му и трудолю́бному твоему́ те́лу дарова́ нетле́ние и дар чудотворе́ния:/ приходя́щии бо с ве́рою к цельбоно́сным твои́м моще́м/ прие́млют неоску́дныя страсте́й премене́ния, и боле́зней исцеле́ния,/ и грехо́в проще́ние твои́ми, свя́те, ко Христу́ моли́твами./ Те́мже зове́м ти:/ ра́дуйся, о́тче преди́вный,/ гра́ду Каза́ни похвало́ и утвержде́ние.
Песнь 7
Ирмос: Прохлажде́й пла́мень пе́щный/ и Де́ву сохрани́ ро́ждшую Тя Богоро́дицу:/ благослове́н еси́, Го́споди, Бо́же оте́ц на́ших.
Припев: Святи́телю о́тче Гу́рие, моли́ Бо́га о на́с.
Ио́сифа Прекра́снаго чистоту́ возлюби́л еси́,/ диа́вольский наве́т подъя́л еси́,/ беды́ же терпя́, несумне́нно вопия́л еси́:/ благослове́н еси́, Го́споди, Бо́же оте́ц на́ших.
Припев: Святи́телю о́тче Гу́рие, моли́ Бо́га о на́с.
А́ки ка́мень а́нфракс, цветя́ся све́тло,/ смиренному́дрием твои́м в жи́зни сей пребы́л еси́,/ честны́ми же мощми́ твои́ми,/ а́ки дража́йшим би́сером, украша́ется Це́рковь, с ча́ды свои́ми вопия́:/ благослове́н еси́, Бо́же оте́ц на́ших.
Сла́ва Отцу́ и Сы́ну и Свято́му Ду́ху.
Ми́ро источа́я, ми́ро духо́вное яви́лся еси́,/ помазу́я всех, с ве́рою приходя́щих и пою́щих:/ благослове́н еси́, Бо́же оте́ц на́ших.
И ны́не и при́сно и во ве́ки веко́в. Ами́нь.
Богородичен: И́дольская кре́пость разруши́ся,/ зря из Тебе́ Бо́га ражда́ема, да пое́м Ему́:/ Бо́же оте́ц на́ших, благослове́н еси́.
Песнь 8
Ирмос: Покланя́емаго от святы́х А́нгел/ и Сла́вимаго непреста́нно,/ свяще́нницы, по́йте,/ лю́дие, превозноси́те во вся ве́ки.
Припев: Святи́телю о́тче Гу́рие, моли́ Бо́га о на́с.
Творца́, от всех А́нгел покланя́емаго, славосло́вил еси́, вопия́:/ свяще́нницы, по́йте,/ лю́дие, превозноси́те во вся ве́ки.
Припев: Святи́телю о́тче Гу́рие, моли́ Бо́га о на́с.
Росода́тельну от Ду́ха Свята́го ду́шу твою́ сотвори́л еси́,/ от честны́х же моще́й твои́х реку́ ми́ра целе́бнаго источи́л еси́,/ мы же, благода́ть от Тебе́ почерпа́юще,/ превозно́сим Христа́ во ве́ки.
Сла́ва Отцу́ и Сы́ну и Свято́му Ду́ху.
Отца́ и Сы́на и Свята́го Ду́ха прославля́я при́сно, пел еси́:/ свяще́нницы и лю́дие, превозноси́те Святу́ю Тро́ицу во ве́ки.
И ны́не и при́сно и во ве́ки веко́в. Ами́нь.
Богородичен: Повеле́нное та́инство от Бо́га прие́м, Арха́нгел/ прии́де возвести́ти Тебе́, Чи́стая Де́во./ Ты же, ре́кши: се Раба́ Госпо́дня,/ зачала́ еси́ Бо́жия Сы́на,/ Его́же мы со святи́телем Гу́рием пое́м и превозно́сим во вся ве́ки.
Песнь 9
Ирмос: Ма́терь Све́та, и по рождестве́ Де́ву,/ и душ на́ших спасе́ния приста́нище,/ ве́рнии, единому́дренно пе́сньми велича́ем.
Припев: Святи́телю о́тче Гу́рие, моли́ Бо́га о на́с.
О тебе́, о́тче святи́телю Гу́рие, изве́стно спасе́ся ага́рянский род,/ о не́мже моля́ся, и нас всех помина́й, покланя́ющихся тебе́/ и тя единому́дренно пе́сньми похваля́ющих.
Припев: Святи́телю о́тче Гу́рие, моли́ Бо́га о на́с.
Ле́торасль измла́да доброво́нна был еси́/ и ны́не ми́ро благоуха́еши./ Те́мже тя единому́дренно похвала́ми велича́ем.
Припев: Святи́телю о́тче Гу́рие, моли́ Бо́га о на́с.
Илии́ подо́бяся,/ меч духо́вный остр от уст твои́х испуща́еши;/ от моще́й же твои́х исходя́щую чуде́сную си́лу,/ я́ко ору́жие, на супоста́ты изощря́еши/ и тем де́монов полки́ прогоня́еши./ Мы же тя единому́дренно велича́ем.
Сла́ва Отцу́ и Сы́ну и Свято́му Ду́ху.
Тве́рдостию смиренному́дрия твоего́ неве́рных удиви́л еси́/ и ве́ровати во Святу́ю Тро́ицу научи́л еси́,/ ны́не же вся ве́рныя благода́тию чуде́сною, от моще́й твои́х излива́ющеюся, удивля́еши,/ и́хже ны́не пренесе́ние ве́село пра́зднующе,/ тя единому́дренно пе́сньми ублажа́ем.
И ны́не и при́сно и во ве́ки веко́в. Ами́нь.
Богородичен: Ааро́нов жезл, и киво́т одушевле́нный,/ и ру́чку ма́нны нетле́нныя испове́дуем Тя, Пречи́стая./ Моли́ спасти́ся всем нам, рабо́м Твои́м.
Светилен
Пло́ть умертви́л еси́, Гу́рие, посто́м, и бде́нием, и сухояде́нием,/ и диа́вола посрами́л еси́, и си́лу его́, свя́те, разруши́л еси́,/ нечести́вым Тро́ицу пропове́дав, треблаже́нне.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: О Ма́ти Де́во Пречи́стая,/ Еди́ному от Тро́ицы Ты была́ еси́ прия́телище,/ Ада́мово воззва́ние и Е́вино от кля́твы свобожде́ние,/ спаси́ нас диа́вольскаго лука́вства и нахожде́ния.
Следующая публикация
Нет комментариев