Ўзга элнинг нони қаттиқ бўлар экан,
Ёт чумчуққа дони қаттиқ бўлар экан.
Мусофирнинг жони қаттиқ бўлар экан,
Азиз жонинг омон бўлсин жон биродар,
Ҳалол бўлсин сен тишлаган нон, биродар.
Майли уйинг кошонамас кулбамисол,
Кийиминг ҳам шоҳонамас, телбамисол.
Кутар албат оиланг ва хуш дам, висол,
Оқармоқда сочингдаги толаларинг,
Омон бўлсин жондан азиз болаларинг.
Чин мусулмон бўлгай, бўлса ким мусофир,
Олам кезар тўлиб-тошиб лим мусофир.
Ўз уйини соғинаркан жим мусофир,
Соғинчлардан тўлиб-тошган юрагинг бор,
Ватандошим шу ватанга керагинг бор.
Ҳар инсоннинг ўз манзили, чеки бўлгай,
Ҳар бир чекнинг ўз бекаси, беки бўлгай.
Гар бегона қадам қўйса кеки бўлгай,
Эгалик қил ўз манзил-у чекингга сен,
Посбонисан озодлиг-у эркингга сен.
Бир неча эл бир ерда кўз-қошдек экан,
Бир ёқадан чиққан аҳил бошдек экан.
Тирикчилик юки - оғир тошдек экан,
Минг машаққат, заҳмат юрган йўлингдадир,
Бахт калити қадоқ босган қўлингдадир.
Ўзга элнинг нони қаттиқ бўлар экан,
Мусофирнинг жони қаттиқ бўлар экан.
Присоединяйтесь к ОК, чтобы подписаться на группу и комментировать публикации.
Комментарии 29