ВСЕМ СВЯТЫМ НА ЗЕМЛЕ РОССИЙСКОЙ ПРОСИЯВШИМ
«О всеблаженнии и богомудрии угодницы Божии, подвиги своими Землю Русскую освятивши, и телеса своя, яко семя веры, в ней оставльшии, душами же своими Престолу Божию предстоящии и непрестанно о ней молящиися!
Се, ныне, в эти времена страстные, мы, грешнии меньшии братия ваши, дерзаем приносити вам хвалебное пение. Величаем ваша великия подвиги, духовнии воины Христовы, терпением и мужеством, - до конца врага низложивши, и нас от прелести и козни его избавляющии. Ублажаем ваше святое житие, - светальницы божественнии, светом веры и добродетелей светящиися, и наши умы и сердца богомудренно озаряющии. Прославляем ваши великие чудеса, - цвети райстии, в стране нашей северней, - прекрасно процветши, и ароматы дарований и чудес, повсюду благоухающии. Восхваляем вашу богоподражательную любовь, - предстателие наши и покровителие, и, уповающе на помощь вашу припадаем к вам, и вопиим:
Равноапостольнии просветителие наши! Споспешествуйте людем Русския Земли: переданную вам веру Православную, - твердо содержати. Да спасительное семя, вами всеянное, - не иссушено будет зноем неверия, но дождем Божия поспешения напоенное, - плод изобильный да принесет.
Святителие Христовы! Молитвами вашими утвердите Церковь Русскую, ереси, расколы и нестроения в ней, - потребите, расточенныя овцы, - воедино соберите, и от всяких волков, во одежде овчей, - в стадо Христово входящих, - оградите.
Преподобнии отцы! Сохраните нас от прелестей мира сего лукаваго, да отвергшеся от себе, и вземше крест свой, - последуем Христу, распинающе плоть свою со страстьми и похотьми, и носяще тяготы друг друга.
Благовернии князие! Воззрите милостивно на земное отечество ваше, и вся нечестия и соблазны в нем, ныне сущия, - оружием молитв ваших потребите, да, яко же древле, тако и ныне, и в грядущее время, - прославляется на Святей Руси имя Господне.
Великомученики и мученики за Христа Российстии преславнии! Укрепите нас в молитвенном стоянии, даже до крове за веру Православную и обычаи отечества. Да ни скорбь, ни теснота, ни гонения, ни глад, ни нагота, ни беда, ни меч, - не возмогут нас разлучить от любве Божия, я же, - о Христе Иисусе.
Блаженнии, Христа ради юродивии и праведнии! Посрамите мудрость века сего, возносящуюся на Разум Божий. Нам же помозите, спасительным буйством Креста Христова Честного и Животворящего, к утвердившиеся соблазны мудрости мирския, - незыблемыми бытии, горнее присно, а не земное помышляти.
Богомудрые жены, в немощнем естестве подвиги великия явившия, - молитеся. Да дух нашея любви ко Господу, и ревность об угождении, и о своем и ближняго спасении, - не оскудевают в нас.
Все святии сродницы наши, от лет древних просиявшие, и в последния дни подвизавшиеся: явленнии и неявленнии, ведомии и неведомии! Помяните нашу немощь и уничижения, и молитвами вашими, испросите у Христа Бога нашего. Да и мы, безбедно преплывшия житейскую пучину, и невредимо соблюдше сокровище веры, - пристанища вечнаго спасения достигнем, и в блаженных обителях горнего Отечества, вкупе с вами, и со всеми угодившими Ему от века святыми, - водворимся благодатию и человеколюбием Спасителя нашего Господа Иисуса Христа. Ему же, со Пресвятым и Превечным Отцем Его, и Пресвятым Духом, подобает непрестанное славословие и поклонение от всех тварей во веки веков. Аминь!»
МОЛИТВА ВСЕМ СВЯТЫМ от века на земли просиявшим
Бо́же Святы́й и на святы́х почива́яй, Трисвяты́м гла́сом на Небеси́ от Ангел воспева́емый и на земли́ от челове́к во святы́х свои́х хвали́мый, да́вый Святы́м Твои́м Ду́хом кому́ждо благода́ть по ме́ре дарова́ния Христо́ва и то́ю поста́вивый Це́ркви Твое́й Святе́й о́вы у́бо апо́столы, Овы же проро́ки, Овы же благове́стники, о́вы же па́стыри и учи́тели, и́хже сло́вом про́поведи, Тебе́ Самому́ де́йствующу вся во всех, мно́зи соверши́шася святи́и в ко́емждо ро́де и ро́де, разли́чными доброде́тельми благоугоди́вшии Тебе́, и о́браз нам до́брых подвиго́в свои́х оста́вивше, в ра́дости к Тебе́ преше́дшии, гото́ви су́ще, в не́мже са́ми искуше́ни бы́ша, и нам напа́ствуемым помога́ти! Сих святы́х всех воспомина́юще и их богоуго́дное житие́ похваля́юще, Тебе́ Сама́го в них де́йствовавшаго восхваля́ем, и о́нех благотворе́ния Твоя́ дарова́ния бы́ти ве́рующе, приле́жно мо́лим Тя, Свя́те Святы́х: даждь нам гре́шным после́довати их уче́нию, житию́, любви́, ве́ре, долготерпе́нию, и их моли́твенною по́мощию, па́че же Твое́ю вседе́йствующею благода́тию Небе́сныя с ни́ми сподо́битися сла́вы, хва́лящим Пресвято́е и́мя Твое́, Отца́, и Сы́на, и Свята́го Ду́ха, во ве́ки веко́в. Ами́нь.
Нет комментариев