ШоМи🇹🇯ҒаРиБоН🇷🇺

ГУЛҲОИ ВАТАН НАЧИДААМ...

Гулҳои Ватан начидаам, даҳ сари сол,
Дидори Ватан надидаам, даҳ сари сол.
Мебинамаш, аз харитаи деворӣ,
Дурии Ватан кашидаам, даҳ сари сол.
То хонаи ман масофаи бисёр аст,
Расмам ба ду чашми чор дар девор аст.
Аз рӯи ман оинаи ман сер нашуд,
Оинаи ман мунтазири дидор аст.
Эй акс, нишони рӯи моҳе будӣ,
Аз тозаҷавониам гувоҳе будӣ!
Ман пир шудам, вале ҷавонӣ ту ҳанӯз,
Ҳаққо, ки рафиқи нимароҳе будӣ.
Умрест, ки ҳаст чашми ман абролуд,
Борони сиришки ман даме канда нашуд.
Аз тарки Ватан, ки даҳ сари сол гузашт,
Даҳ сол ҳавои чашми ман соф набуд.
Абарустод Бозор Собир

ЗИНДАГӢ...

****
Он қадар аз зиндагонӣ сер гаштам,
Аз худу аз дигарон дилгир гаштам.
Мекашам, дар пушт бори мардикорӣ,
Зери кӯҳи ранҷу меҳнат зер гаштам.
Пиртар аз худ касе, дигар надидам,
Навҷавониро надида, пир гаштам.
То, ки ёбам, роҳи дигар дар ҳаётам,
Аз паси ҳар чораву тадбир гаштам.
Хонабони ман нашуд, ҳамсояи ман,
Бар дари ҳавлии худ занҷир гаштам.
Аз ҳама ёрон қафо афтодаам, ваҳ,
Дар сафар ман дур мондам, дер гаштам?!...
Абдувоҳид ҶАББОРПУР
Самарқанд – 28.12.2019

АЁ, МОДАР ДУОЯМ КУН!....

****
Аё, модар дуоям кун, ки мӯҳтоҷам дуоятро,
Аё, модар садоям кун, ки пазмонам садоятро.
Биё модар, биё модар, бибӯсам хоки поятро,
Ҷаҳони модарон, ҷуз ту касе беҳтар намедонад.
Бимирам, ман ҷаҳонатро, бинозам, номи покатро,
Аё, модар, аё, модар, куҷо ёбам, суроғатро?
Надорад, зиндагӣ маъно бароям бе ту, ай модар,
Биё, сӯям нигоҳе кун, ки сер бинам нигоҳатро...
Аё, модар дуоям кун, ки мӯҳтоҷам дуоятро...
           ┄┅অঠই✯❀✯ইঠঅ┅┄

ҒАРИБӢ...

****
Эй очаи ҷон, ягон-ягон ёдам кун,
Хокистари кӯи ту шудам, бодам кун.
Хокистари кӯи ту шудам, боди фано,
Аз мулки ғарибӣ гиру озодам кун.

МУҲОҶИР....

Миллатам тоҷик, вале номи муҳоҷирро гирифт,
Ин диёри кофарон меҳри Ватан аз мо гирифт.
Дар Ватан фарзанд, модар чашм ба роҳи интизор,
Сад дареғо, ёди фарзанду модар аз мо гирифт.
Модарам гуфт, ай ҷигарбанд дар ғурбат ҳушёр бош,
Ман чӣ созам, ки ғарибӣ ақлу ҳуш аз ман гирифт.
Ман бигуфтам, дил надиҳам, дил аз худи ман аст,
Ин ҳама дар дил буд маълум, ки дил аз ман гирифт!!!

ПАЗМОНИ ВАТАН ШУДАМ....

*****
Пазмони Ватан шуда, дили ман имрӯз,
Холист, зи банда манзили ман имрӯз.
Баргаштану омадан, бароям мушкил,
Фарёду фиғон, зи мушкили ман имрӯз.
Абдувоҳид ҶАББОРПУР

МУСОФИРАМ....

Дар ин ғурбатсаро мемирам, охир,
Зи ҳаҷраш эй, Худо дилгирам, охир.
Фалак дорам, ба ту ҳардам шикоят,
Зи сӯзу ин фироқ даргирам охир.
Мусофир мондаам, дар шаҳри ғурбат,
Ба зери сояи таҳқирам охир.
Ҷавон будам, шудам рӯзе мусофир!
Кунун пирам бубин, ки пирам охир.
Иззати Хатлони.

ДАРДИ ҒАРИБӢ....

Ҷавонӣ ғам ба сар дорад, чарояшро напурс,
Ҳар ҷавоне чашми тар дорад, чарояшро напурс.
Гар ҷавоне ашк мерезад, ту бе ғайрат магӯ,
Ҳар ҷавон хуни ҷигар дорад, чарояшро напурс.
Зери бори мулки ғариб пир гашта ҳар ҷавон,
Шаҳри ғариб дарди сар дорад, чарояшро напурс.