Предыдущая публикация
Бо китобе ӯ ҳиҷою ҳарфи худ фаҳмо намуд,
Роҳи хуби зиндагиро баҳри мо маъно намуд.
Меҳри дунёро бадар кун дар талоши зиндагӣ,
Пеш аз тавлиди мо тақдири мо иншо намуд.
Зери пои модарон бошад биҳишти ҷовидон,
Чун фаришта модаронро рӯйи ин дунё намуд.
Иззату ҳурмат намо ту волидонро дар ҳаёт,
Хор гардад он касе бо волидон ғавғо намуд.
Гарчи сарсон моҷарои рӯзгорам кардааст,
Роҳи хуб имони хуш дар қалби ман маъво намуд.
Назди ёрон дарди дил бо ханда пинҳон мекунам,
Сӯзиши дарди диламро чашми ман ифшо намуд.
Рӯзу шаб гар медавӣ ту аз қафои симу зар,
Оқибат хоби абад дар зери хокат ҷо намуд.
Файзро аз зиндагӣ хоҳам барои он касе,
Мисраҳои Мустақимеро пур аз маъно намуд.
06-08-2024
Мустақим
Следующая публикация
Комментарии 1