Предыдущая публикация
НАФАҲМИД...
Таманнои дилам дилбар нафаҳмид,
Рамузи бодаро соғар нафаҳмид.
Дили бишкастам парвоз мехост,
Азоби болҳоро пар нафаҳмид.
Сукуте доштам, самъе намекард,
Ҳадиси гунг гӯши кар нафаҳмид.
Ба рӯи саҳфа бо хун нақш бастам,
Зи асрори қалам дафтар нафаҳмид.
Ба як ҷав этимодамро набигрифт,
Ба ҷон мекардамаш бовар, нафаҳмид.
Забони гуфтанам аз ком афтид,
Ишорат кардаму дигар нафаҳмид.
Чи ҷои роз дигар Аҳлидинро,
Маро аз ман касе беҳтар нафаҳмид.
Аҳлидини Ҳисори.
Следующая публикация
Нет комментариев