2-бөлүм.
Бизди врач балалуу болосуңар деп айткан. Дагы күтсөк болмок...
- Күттүк го айланайын, баягы шаарга барып текшерилип келгенинди айтасынбы? Андан бери төрт жыл өтпөдүбү! Дагы канча күтсө болот? - деп эми Ырыскан эне да өзүнө келе түшүп чечкиндүү сүйлөдү. Муну укканда кайненесинен үмүттөнүп турган Жаркынайдын дароо эле шаабайы сууй түшүп, башын шылкыйткан бойдон аргасы кеткен тейде үн катты:
- Мейли анда, кетсе кетейин...
- Антпеске арга жок. Андан көрө жолоочунун жолдогусу жакшы дегендей камчомунду эртерээк көр. Мен барып Асымбекке айтып, шаарга кетчу таксиге салып жибер деп айдатып келейин,- деп Арипа сыртка жөнөгөндө Жаркынай жолго даярданганы төркү бөлмөгө кирди.
Беш жыл жашап, орун-очок алган үйүнөн бир заматта куугунтук жеп күтүүсүз кетип баратканына катуу ызаланган ал колуна тийген кийимин кийип, оокаттарын эки баштыкка салыштырып көпкө кармалбай чыга калганында көзүнүн жашын кылгыртып оор ойдун кучагында отурган Ырыскан эне чочуп кеткенсиди:
- Алдына кетейин, ушу эки баштыкты эле алдынбы? Жаңы, жакшы кийимдерин көп эле го. Кышкы кийимдерин кайда? - деп эми өзү келининин кийинки жашоосу менен жолуна кам көрө баштады. - Балам, мага Кудайым кыз берген эмес, мындан ары менин келиним эмес кызым болуп жүр. Сени эч качан унутпайм. Ушунча жылдын ичинде эч бир жаман жагынды, суук сөзүндү угузган жоксун, сен бар кезде үйү бүздө кут-береке бар эле. Эми кандай болот билбейм. Сенден аргасыз ажыроого туура келип атат. Биз өз күнүбүздү көрөрбүз, сен бактылуу болсоң болду... Мына бул тыйын кийинки жашоонду жайгарып кеткенинче жетер. Аз да болсо алып кой. Бизди кечир. Ак жолун ачылсын! - деди Ырыскан эне сыртка чыгышкандарында жалооруй карап, жалбара сүйлөп, абышкасы экөө келинине арнап койгон акчасын суна.
- Апа, мен да аргасыз кетип баратам. Сиз дагы мага ушул убакыттын ичинде эч кандай жаман жагынызды көрсөтпөдүңүз, суук сөзүңүздү угузбадыныз. Өзүңүз айткандай кызыныздай көрүп, өз апамдан аша мээрим төктүңүз. Атам экөөңүздөр күүлү-күчтүү туруп, бактылуу өмүр сүрүңүздөр. Мындан ары алыста кызым бар деп жүрүңүз. Кудай буюрган болсо бир кезде келип кетермин. Мына бул катты Уланга берип коюнуз. Ал мени кечирсин, - деп бир бүктөм кагазды Ырыскан энеге карматып, оокаттарын көтөрүп эбак келип эшиктин алдында турган автоунааны карай жөнөдү.
XXX
Эртеси күнү Улан эл жата кайтып келди. Кечээтен бери Жаркынайдын кеткенин ага кантип угузушту ойлогон сайын заарканган абышка-кемпир жаңы жатышты эле, сырттан ат дүбүртү угулуп, ээсин тааныган ит бир аз үрүп токтогондо ордуларынан обдула калышты. Ырыскан эне шаша кийинип, оозгу бөлмөгө чыгып чай койгуча сырттан Уландын Жаркынайдын атын айтып чакырган үнү угулду.
- Апа, Жаркынайга айтып коюнузчу кампанын ачкычын алып чыга калсын, терилерди жаялы, - деп уудан жолу болгон Улан баш баккан апасына жайдары ун катты.
- Азыр, - деп кайра артка кирип, ачкычты алып кайра чыкканында Улан тан кала түшүп сурады:
- Апа, келиниңизге эмне болгон? Чык дебейсизби. - Ал үйдө жок эле... Оо балам, жолдуу келгенсиң го, - деди Ырыскан эне толо каптан бучкагы чыккан бөрү терисин көрүп, сөздү башка жакка бурду эле, шектенген Улан селейе түшүп такый сурады:
- Кандайча жок! Ал кайда кетти эле? - Ал шаарга кетти, жумуштап, аргасыз калп айтты Ырыскан эне. - Жумуштап... Шаарга... Мен билбеген кандай жумуш экен?
- Жөн жай эле кетти. Үйгө кирчи, калганын ОШОН- до сүйлөшөлү.
- Ии жөн жай элеби? - деп көңүлү жайлана түшкөнсүгөн Улан ачкычты алып, капты көтөрүп кампаны карай басты.
- Ырас жолуңар болгон турбайбы! Канчаны аттыңар? - деп сурады Байөмүр ата үйгө кирип учурашкан уулунан.
- Жолубуз жакшы болду ата. Үчтү аттык!
- Оо жакшы, жакшы. Акыбетинер кайтыптыр да Элге андан бетер жакшы болуптур, малды колдон талашкан немелер атылып.
- Ооба. Жанагы туу бээлерди жарып аткан өгүздөй чон добот экен, ага кошуп дагы бир канчыгы менен быйылкы бир күчүгүн аттык, - деп өзүнө ыраазы тейде жооп бергени менен сөзүнүн аягын күдүктүү суроо менен аяктады: - Жаркынайды шаарга эмнеге жибердинер? Деги жайчылыкпы?
- Жайчылык эле... Ал кетип калды, - деп акыры айтыла турган сөз болгондон кийин создуктурбоону туура көргөн Байөмүр ата уулунан жүзүн ала качты. - Кандайча кетип калат?.. Жөн эле кете береби?
- Жөн эле кетпейт да. Кеткенинин жүйөлүү себеби бар, - деп кичине катаалыраак болбосо уулунун жемесине туруштук бере албасын түшүнгөн Байөмур ата
кесе айтууга аракеттенди.
- Алдына кетейин, ал сага кат калтырды эле, ме өзүн окучу, - деп ортодо чынала түшкөн абалды жумшартууга далбастаган Ырыскан эне уулуна Жаркынайдын катын сунду. Торт бүктөлгөн бир барак кагазды шашылыш ачкан Уландын көзү андагы кыска жазылган эки сүйлөмгө урунду: «Улан бактылуу бол. Мени кечир. Жаркынай».
- Эмне туруп-туруп эле бир заматта жылан чагып, жылкы теппей эле жөнөп кеттиби? Тан калычтуу! Ал мага айтат болчу...
- Улан, ал сага төрөп бере алган жок, ошон үчүн кетти. Түшүнчү, сен биздин жалгыз уулсуң, тукумубузду улашын керек. Же эмне төрөбөгөн аял менен куу баш откуң келеби?
- Алдына кетейин. Биз деле элчилеп небере эркелетип, базар болгон үйүбүздө бапырап жашагыбыз келет да. Жаркынай жакшы келин болчу, бирок согончогу канабай койбодубу, - деген карылардын сөзүнөн Улан жагдайды түшүнө калып:
- Аны ушул сөздөрдү айтып силер кетирген экенсинер да! Ал өзү кетмек эмес! Кетсе да мага айтып кетмек... - деп Улан сөзүнүн аягын таппай туталана түштү.
- Алдына кетейин, ал өзү эле араң жүрүптүр, айтсак эле көп каршы болгон жок. Ал деле сенин багынды байлабайын деди да. Беш жыл күтүп, Кудай чүрпө бербесе эмне кылсын анан...
- Билсеңиздер, Жаркынайда эч кандай күнөө жок. - Мен өзүм... - деп сөзүнүн аягын айта албай мукактанганда эки кары жарыша үн катышты:
Келинди эч ким күнөөлөгөн жок, төрөбөйсүн деп.
Кудайым кылса кубарындын акысы барбы дейт.
Мындан башка арга калган жок, балам. Түшүндүм Жаркынайды мажбурлап кетирипсинер. Мен баары бир аны кайра алып келем...
- Эй бала сен туубаган катын менен куу баш өтөйүн дейсинби! Андан башка деле аял толуп атат билсен. Мындай сөзүңдү угузба мага! - Байѳмүр ата эми чындап жинденди.
- Жаркынай мени адам катарына кошкон. Ал болбосо жок болуп кетмекмин. Үйүбүздүн куту болчу керек болсо, эмне кубалап жибердиңер!
Кубалаган жокпуз эй! Айтсак эле аран жургон экен кетип калды.
- Ал деле сенин багынды байлабайын деди да. Балам андан көрө башка аял алып бизге небере жытын жыттат. Сенден жалгыз суранычыбыз ушул. Башка эч нерсенин кереги жок, – жалооруй түштү Байөмүр ата
- Бизди врачтар балалуу болосуңар деп айткан болчу, күтө турсаңар болмок, - Улан шаабайы сууй сүйлөдү. - Кана болсонор! Андан бери беш жыл өтпөдүбү. Кой балам, айткан тилди ал. Сен жөн гана Жаркынайга көнүп алгансын. Акырындан ансыз жашоого да көнүп кетесин. Айткан тилди ал!
Улан атасынын зекий сүйлөгөнүнөн коюлган талапты эмес жалооруган суранычты сезди, өмүр бою өзүнөн башка бала көрбөгөн аларды аяй түштү, андыктан ичи эзилип турса да, алардын чон ката кетиргенине көзү жеткени менен, эми кандай болуп кетер экен деп санааркап отурган карыларга каяша айта ал бай супсуну сууп отуруп калды.
- Курсагын ачкандыр, чайдан ичип, тамактан ала гой, - деп үстүнө үйрүлүп түшкөн энесинин жалынычы кулагынын сыртынан кетти, курсагы ачып келсе да анын берген ысык чайы муздак, даамдуу тамагы супсак сезилип, алдын мелтирей тиктеп, эмне кылып жатканын билбегендей отура берди. жатып эс ал, төшөгүндү салып койгом. Калганын эртең сүйлөшөлү, - дегенде гана апасы Бара кой эми шалдырай басып
бөлмөсүнө жөнөдү. Каалганы ачып эки кадам жасап, төшөгүнүн этегине жетип шалдайып туруп калды. Ушу азыр жаны жер тартып, ырп этерге дарманы келбей чарчап турса да, өзүн күткөн мамык төшөктөн муздактыкты сезди, музга жатчудай болуп кайра артка кетенчиктей берип, Жаркынайы бар кезде жылуу уядай сезилчү бул куту качып үңүрөйгөн бөлмөдөн кандай кирсе ошондой чыга жөнөдү. Сыртта өзүн үйдөгүдөй эле муздактык менен карангылык күтүп турганын көрүп, кайда басарын билбей шалдайып туруп калды да, бастырманын алдында таң ашууга аса байланып коюлган атынын окуранганын угуп ошол жакты карай басты. Ушул эси жок жаныбар гана өзүн түшүнүп тургансып жалооруй карап окуранып, ооздугун кемире берип, башын силкип тынч туруп калды.
Канттим эми карагер! Бул кордукка кантип чы- дайм! Эч нерсеге карабай ажырата салгандары эмнеси? Бул карыларга Жаркынай күнөөлүү эмес өзүм күнөөлүү экенимди кантип түшүндүрөм. Кудайдын каарына чын- дап калгам го... - деп аты менен күбүрөнө сүйлөшүп, анын ыйык жалына өбөктөп бир топко турду. Бир аздан кийин кеч күзгү сууктан чыйрыкканында үйгө кирип эс алышы керек экенин эстеди, бирок дале болсо куту качкансыган бөлмөсүн көргүсү келбей турганында жогору жактан кобур-собур үн чыкканынан караса кошуна үйдүн айланасына үч-төрт машина токтоп, киши кара көбүрөөк жүргөнсүйт, эмне болуп кетти деген ойдо ошол тарапты карай басты. Жакындай бергенинде эки иниси менен тамеки чеккиче сүйлөшүп турган бул Темике аттуу өзүнөн бир кыйла улуу кошунасы айткан саламына кандайдыр муздак алик алып:
-Аа Улан сенсинби? Тоого кетти деп уктум эле, качан келдин?
- Жана келгем. Темике байке жайчылыкпы?
Уландысы бар.
Присоединяйтесь к ОК, чтобы подписаться на группу и комментировать публикации.
Комментарии 6